Rokstu sagataveja: Laura Spundere, portals lakuga.lv

Gondreiž pyrma goda itymā laikā aizasuoce pyrmuo seriala latgaliski “Fati” fiļmiešona. Tū uzjēme Dīnavydlatgolā, tok niu Ludzys nūvoda Kuorsovys pusē nūteik aktivs dorbs pi “Fatu” ūtruos sezonys. Ari portals lakuga.lv pagiva šaļtenis nu seriala uzjimšonys laukuma.

Vaira par seriala “Fati” ideju, tapšonys procesu i īsaisteitūs cylvāku sajiutom pyrmuos sezonys fiļmiešonys laikā latgalīšu kulturys ziņu portals stuosteja rokstā ITE i piec pyrmizruodis ITE. Atguodynojam, ka seriala nūsaukums aizajimts nu Ingys Ābelis romana “Klūgu mūks” i vuorda skaidruojums varātu byut – cylvāki, kas ir jauni, glupi i panaivi. Serials “Fati” sajēme ari Latgalīšu kulturys goda bolvu “Boņuks 2022”.

Seriala ūtrajā sezonā ir īvārojami puorsamejs fiļmiešonys komandys rodūšais sastuovs, prūti, niu seriala režisors ir Edvards Mikāls, operators – Raivo Freimanis, bet skaņu režisors – Kārlis Butins. Interesanti, ka scenareja autors itūreiz ir Valentins Lukaševičs i daleji ari režisors Edvards Mikāls. Sovpus golvonūs akteru sastuovs palīk gondreiž namaineigs – akteri Ritvars Gailums, Māris Korsiets i Kristīne Veinšteina. Producents namaineigai ir Arņs Slobožanins.

Interesanti, ka lelai daļai seriala rodūšuos komandys nav gondreiž nikaidys saisteibys ar Latgolu, par pīmāru, režisors Edvards Mikāls ir kūrzemnīks, jis ari saleidzynūši jauna personeiba Latvejis kinys industrejā. Kai stuosta producents Arņs Slobožanins, da šam jis Edvardu napazyna, vys jam jū kai lobu variantu īsacejuši muziki bruoli Kauperi. Kai stuosta pats režisors, “Fati” ir juo pyrmuo pīredze seriala fiļmiešonā: “Mums kai komandai ir daudz energejis i rodūšūs ideju, tys ari maņ kai režisoram ļaun struoduot vīgļuok.”

“Golvonais, ar kū itei sezona atsašķir nu pyrmuos, ir žanrs, mes iz reizis zynuojom, ka gribim paraudzeit jaunu vierzīni. Itamā sezonā mes ari vaira strudojam ar apleicīnis dzeivuotuojim, kab jī kai zynuotu, kas ite nūteik, tai ari poši īsasaisteitu i boguotynuotu kūpejū vidi ar sovu latgaliskumu,” stuosta režisors Edvards Mikāls.

“Kod Kuorsovā beja seriala akteru atlase aba kastings, atguoju puorsteidzūši daudz cylvāku, tys myus kai komandu reali īprīcynuoja. Da šam muna pīredze ar dorbu Latgolā voi latgalīšim ir cīši nalela, vystik varu saceit, ka eistyn sajiutam, ka cylvāki ir cīši atvārti, sirsneigi i varu saceit ari, ka nu jūs pusis ir taida eipaša pošatdeve i uzaticiešona,” tai Edvards Mikāls.

Sovpus operators Raivo Freimanis par sevi soka, ka jis ir pa vydu, prūti, juo mama īt nu Latgolys, tāvs – nu Reigys, deļtam vysmoz iz 50 procentu jis sevi skaita par latgalīti. Raivo ir aptyvai 15 godu pīredze televizejis dorbā, sovpus kino industrejā “Fati” ir juo pyrmais lelais projekts. Raivo pīzeist, ka seriala “Fati” projekts jam ir izaicynuojums i vareiba paraudzeit kū na viņ cytaižuoku. “”Fatu” uzjimšonys laukumā ir fantastiski cylvāki, eipaši grybu pastreipuot, ka golvonī akteri, jūs emocejis i attīksme, ar kaidu jī īsagulda seriala fiļmiešonā, ir apbreinuojama. Ari tehniski rodūšuo komanda ir cīši entuziastiski i energiski cylvāki, kuri varātu guozt kolnus.” Sovpus sovu operatora stilu, Raivo raksturoj kai nūsaceiti klasisku: “Mes pīsaturom pi klasisku i izjustu kompoziceju, vys tymā poša laikā pīsalāgojam situacejom. Ka scenarejā ir kaidys dinamiskuokys ainys, mes ari ar kameru skrīšus sekojam vysam leidza.”

Vīns nu golvonūs akteru Māris Korsietis pīzeist, ka, juopruot, kai pyrmajā sezonā, tai i niu serialam atlasāta cīši loba rodūšuo komanda.

“Es saceitu, ka pyrmuo seriala sezona beja vaira baļsteita iz humoru, tok niu maņ redzīs, ka humora ir drupeit mozuok, vys tys nav švaki, tys vīnkuorši ir cytaižuok. Mes ari kotru ainu pyrma fiļmiešonys puorrunojam ar režisoru, deļtam tys, kas raksteits suokuma scenarejā, beiguos var stypri atsaškiert.”

Interesanti, ka Māris Korsiets ari nav latgalīts, jis ir sieļs, i da 18 godu vacuma jis vyspuor narunuoja latgalīšu volūdā, cikom niu breivi runoj i spieļoj lūmys latgaliski Daugovpiļs teatrī.

Daugovpiļs teatra aktrise Kristīne Veinšteina pīzeist, ka, dazynojūt par vareibu īsasaisteit “Fatu” ūtruos sezonys fiļmiešonā, jei iz reizis pīkrytuse. “Es prīcojūs, ka muna saime ir pīroduse pi vysaiduokim munim dorba izbraucīnim, deļtam jī zyna, kū tys nūzeimej. Ari Daugovpiļs teatra direktors myus vysā atbolsta, tok, saskaņojūt ar fiļmiešonys komandu, ir dīnys, kod mes nūbraucom iz mieginuojumim teatrī.” Kristīne pastreipoj, ka “Fati” juosaver, kab sajust tū eistynū latgaliskū suoli i redzēt, ka ari latgalīši var kū na viņ dareit i radeit.

Seriala producents Arņs Slobožanins pīzeist, ka pyrmuo seriala sezona beja gona veiksmeiga, ari SIA “Tet” beja apmīrynuoti ar seriala popularitati, deļtam pīkryta finansiali atbaļsteit ari ūtrū sezonu. “Ituos sezonys rodūšū komandu es komplektieju caur personeigim kontaktim i īsacejumim. Kotrs režisors i operators, taipoš kai sevkurs komandys dalinīks, muokslinīcyski atnas kū naviņ cytu. Itamā daļā byus drupeit vaira misterejis, ari šmakovkys lūma nabyus taida, kaidu tū asam paroduši zynuot, detaļuos pagaidom naatkluošu, tok skateituojam byus vareiba drupeit aizadūmuot. Es saceitu – golvonuo seriala dūma ir, ka cylvāki vysā pasaulī dzeivoj ar vysaidom maskom, sovpus Latgolā cylvākam ir dūta vareiba nūmest sovu masku, pīdzeivuot taidu kai atsateireišonu. Ka cylvāks tū iztur, jis pats sevi var paceļt cytā goreigajā leiminī.”

Iz ekranu serialu varim gaideit tyuļuok decembram. Nu suoku serials byus radzams kinuteatrūs, tod “Tet” platformā i aptyvai iz Latgalīšu kulturys goda bolvys “Boņuks 2023” laiku, marta suokumu, ari Latvejis Televizejā.

Fotogalerejā: seriala “Fati” uzjimšona, foto Amanda Anusāne/portals lakuga.lv