Rokstu sagataveja: portals lakuga.lv

2023. gods 26. septembrī (piec vacuo styla – 13. septembrī) paīt 153 godi kai dzims izcylais katuoļu goreidznīks i pedagogs, Latgolys pyrmuos atmūdys darbinīks, monsinjors Nikodems Rancāns (1870–1933). Lai gūdynuotu juo īspaideigū davumu Latgolys kulturā i izgleiteibā, jau ostoitū reizi teik izsludynuota Nikodema Rancāna bolva Latgolys izcyluokajim pedagogim, informej organizatoru puorstuove Ilga Šuplinska.

Nikodema Rancāna bolvys mierkis ir styprynuot pedagoga profesejis prestižu i atpazeistameibu sabīdreibā, gūdynojūt izcylu veikumu pedagogiskajā darbeibā i veicynojūt latgaliskuos kulturys tradiceju īaudzynuošonu jaunajā paaudzē.

Pretendentu pīsasaceišona itūgod ir da 15. septembra. Pasuokuma organizatori – Latgalīšu kulturys bīdreiba – aicynoj pīsasaceit pedagogus nu pyrmsškolys da augstuokuos i profesionaluos izgleiteibys par latgaliskuos vidis radeišonu i latgaliskūs vierteibu styprynuošonu, kai ari par rodūšu i psihologiski atbolstūšu darbeibu školā īprīškejā vuiceibu godā.

Izsludynuotys pīcys nominacejis: par latgaliskuos vidis radeišonu i latgaliskūs vierteibu saglobuošonu i styprynuošonu pyrmsškolys izgleiteibys īstuodēs; par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školys vuiceibu vidē; par sasnāgumim latgalīšu volūdys, literaturys i kulturviesturis  īdzeivynuošonā augstuokuos izgleiteibys īstuodis studeju vidē; par rodūšu i psihologiski atbolstūšu pīeju vuiceibu procesa organiziešonā (aicynoj pīsaceit izgleteibys īstuožu vadeituojus).

Pretendenti vysuos nominacejuos aicynuoti paruodeit modernūs tehnologeju pīlītuojumu vuiceibu dorbā. Apsveicama jaunu metožu i pīeju, strategeju, metodiskūs dorbu izstruode, publikacejis, pīredzis populariziešona, dorbs ar vacuokim i c.. Vysuos nominacejuos pretendentim tiks pīškierti papyldu punkti pi izviertiešonys, ka vuiceibu process teik organizāts ari latgalīšu volūdā.

Nikodema Rancāna bolvys padūšonys pasuokums paradzāts 23. septembrī Rēzeknis Tehnologeju akademejā.

Konkursa nūlykums i dasacejuma anketa ir atrūnama ITE.

Latgalīšu kulturys bīdreiba, kas organizej konkursu, kai sevkuru godu vaicoj piec pošvaļdeibu atbolsta i nūruoda, ka prīcuosīs par sadarbeibu.