Rokstu sagataveja: portals lakuga.lv

Latvejis Žurnalistu asociacejis (LŽA) apbolvuojuma “Izcileibys bolva 2023” žureja ir izviertējuse 120 īsnāgtūs dorbus i nūsaukuse vysus nominantus, viestej LŽA sātyslopā publicātuo informaceja. Itūgod nominacejā “Regioni i diaspora” bolvai izvierteita ari portalā lakuga.lv publicātuo žurnalistis Martys Puzākys veiduotuo rokstu sereja “Pīrūbeža cīmu stuosti”.

Nominacejā “Regioni i diaspora” bolvai vēļ izvierzeiti: LSM autore Dace Ivanova par rokstu “Daugavpils grib atteikties no cietokšņa saglabāšanas – “tas ir parasts mikrorajons””, Ieva Benefelde nu ReTV par raidejumu cyklu “Tiksimies stacijā!” i laikroksta “Neatkarīgās Tukuma Ziņas” komandys (Oksana Pugačova, Ivonna Plaude, Agita Pukīte, Liena Trēde) kūpdorbs “Ukrainai jāuzvar!”. Ar pylnu nominantu sarokstu var īpasazeit ITE.

Rokstu sereju “Pīrūbeža cīmu stuosti”, kurys tapšonā paleidzēja ari fotografe Amanda Anusāne i korektore Laura Melne, var puorskaiteit ITE. Rokstu sereja 2022. gods rudinī i 2023. gods pavasarī tyka veiduota ar Medeju atbolsta fonda finansialū paleigu.

Portala lakuga.lv žurnaliste Marta Puzāka piec viests izzynuošonys izsoka sovu prīcu: “Maņ kai jaunajai žurnalistei tys ir vīns nu augstuokūs pagūdynuojumu, kas ir pavysam nagaideitai! Ir cīši lela prīca, ka nūzaris profesionali nūviertej ideju izpiļdejumu, kas pošai ir saguoduojs gondarejumu i naaizmierstamu pīredzi, gastejūt vītuos, kur kasdīnys gaituos nabyutu bejuse! Taipoš tys ir eistyns aplīcynuojums tam, ka asu pareizajā vītā storp pareizajim cylvākim! Lels paļdis juosoka breineigajai lakuga.lv komandai, kas atbolsta naparostuokuos idejis, dorbojās profesionali i motivej byut sevis lobuokajai versejai žurnalistikā! Bez jūs nabyutu saguojs tik kvalitativs rezuļtats!”

Kasgadejuo “Izcileibys bolva” teik padūta par izcylim dorbim i sasnāgumim žurnalistikā par periodu nu 2022. gods juļa da 2023. gods juņa. Pīsaceit dorbus i autorus beja īspiejams kai asociacejis bīdrim, tai ari cytim interesentim. Bolvys padūšona nūtiks 8. septembrī 18.00 stuņdēs muzykys i muokslys telpā “Oratorio”. 

Kūpā ar bolvys padūšonu ari itūgod teik reikuota konference par aktualom temom, kas cīši saisteitys ar žurnalistiku. Itūreiz konferencē lela viereiba tiks veļteita taidom temom kai žurnalistu drūseiba, vuorda breiveiba, kai ari tam, kai i kur meklēt papyldu finansiejumu medeju dorba nūdrūsynuošonai, vuiceibom, kai ari par sadarbeibys vareibom, pamatā orientejūtīs iz Eiropys pīduovuotajom vareibom. Konferenci varēs vērtīs tīšsaistē, Latvejis Žurnalistu asociacejis sātyslopā i socialūs teiklu platformā Facebook, 8. septembrī nu 14.00 da 17.30 stuņžu.