Rokstu sagataveja: portals lakuga.lv

Niu ir suokusēs pyrmuo rudiņa dorba nedela, kod jau vaira suocam dzert čajus i sasarytynuot syltuok, tok taipoš vēļ varim baudeit saulainū laiku pi dobys. Ar ituos nedelis īsacejumim pasadola aktivais jaunīts Dāvids Rubens nu Leivuona nūvoda Rudzātu pogosta, kurs pavysam naseņ pats debitēja ar sovu dzejis kruojumu. Jaunais autors īsoka ļautīs dzejai, pasainteresēt par viesturis līceibom Madumā, taipoš arī nūsavērt vēļreiz tik senejū, tok popularū kulta kinu “Kareibu jiurys pirati”.

Dzejis dīnys 2023

Rudiņs Latvejā atīt na tik ar uobelim ci gladiolu puškim, bet taipoš ar dzeju. 2023. godā Dzejis dīnu programa aptver pasuokumus vysā Latvejā. Latgalīšu auditorejai eipaši interesanta byus dzejnīku saceņseiba “Rogovkys dzejis voga”, kas nūtiks 9. septembrī Rēzeknis nūvoda Rogovkā.

Pyrmuo pasauļa kara vītom pa pādim

Pyrmais pasauļa kars Latveju skuore nūpītnai, i viesturis līceibu nu tūs laiku natryukst. Maduma pogostā Daugovpiļs nūvodā pa šai dīnai sasaglobuojuši vacuo betona bunkuri. Pyrma tūs mekliešonys, vierteigai aizcīmuot iz Pyrmuo pasauļa kara muzeju Madumā, kur var izzynuot vaira par viesturi i sovom acim redzēt, kai kara rokumi i tranšejis izavēre pyrma vaira kai symtu godu.

Kinai “Kareibu jiurys pirati” 20 godu

Natycamai, ka paguojs jau 20 godu, kai pasauļs pyrmū reizi īraudzeja kapteini Džeku Sperovu i juo kugi “Malnuo pērle”. Atzeimejūt kulta kinys jubileju, “Forum Cinemas” aicynoj iz svātku seansu, tok i tym, kas nagrib laistīs uorā nu sātys, ir vareiba īsarytynuot pledā i ar korstu čajis krušku rūkuos baudeit Depa akterspēli.