Latvejis Arheologu bīdreiba izsludynuojuse Jura Urtāna Dzierkaļu piļskolna bolvu
Rokstu sagataveja: portals lakuga.lv
Latvejis Arheologu bīdreiba (LAB) izsludynuojuse Jura Urtāna Dzierkaļu piļskolna bolvu. Tei teik organizāta pyrmū reizi ar mierki nūviertēt individualū izcileibu i sasnāgumus Latvejis piļskolnu izpietē, apzynuošonā i populariziešonā.
Latvejis Arheologu bīdreiba da 30. oktobra aicynoj LAB bīdrus voi LAB instituacejis īsnēgt dasacejumu Jura Urtāna Dzierkaļu piļskolna bolvai, syutūt tūs iz e-postu: latvijasarheologubiedriba@gmail.com. Bolvys dasacejumu var īsnēgt breivā rokstveida formā, pamatojūt deļkuo tei byutu daškirama konkretajam nominantam. Vysu bolvys nūlykumu var apsavērt ITE.
Paradzāts, ka bolva tiks pasnāgta reizi trejūs godūs i tuos sajiemiejs dabuos ari naudys bolvu 1000 eiro apmārā i ceļojūšū pīminis zeimi, kas ir Lindys Liepinis taiseitais dekorativais škeivs ar arheologiskim motivim.
Juris Urtāns ir Latvejis Kulturys akademejis (LKA) profesors, viesturis doktors, habilitātais muokslys doktors, i Latvejis Zynuotņu akademejis (LZA) akademiks. Jam, izmontojūt jaunys pīejis reljefa pietejumūs, sasadorbojūt ar plašom interesentu grupom, iz vītys pietejūt i apsekojūt īspiejamūs piļskolnus, beidzamūs godu laikā izadevs panuokt cīši lelu piļskolnu skaita Latvejā pīaugumu. Jis ari vīneigais Latvejis arheologs, kam pīdar piļskolns – Dzierkaļu piļskolns. J. Urtāns regulari publicej ari popularzynuotniskus rokstus i izdūd gruomotys, pīmāram, par Latgolys piļskolnim i juo Dzierkaļu piļskolna dīnysgruomotu var skaiteit pādejūs godu “Tāvu zemes kalendarūs”. 2022. godā izguoja Urtāna gruomota “Jaunatklātie pilskalni Latvijā. 1998.-2021.” Plotuoku interveju ar Juri Urtānu skaiti ITE.
