Rokstu sagataveja: portals lakuga.lv

Itūrudiņ Latgolys regionaluo televizeja (LRT) turpynoj īprīškejūs četrūs godūs aizsuoktū projektu i taisa jaunus raidejumus saimem ar bārnim i pusaudžim “Žik!” latgalīšu volūdā, informej LRT žurnaliste Ausma Sprukte-Kozule. Televizejis ekranūs nūslādzūšū – pīktū – sezonu varēs vērtīs kanalā TV24 i ReTV kanala vierszemis apraidē jau suocūt ar 1. oktobri.

Kai jau kotru reizi ari itūgod “Žik!” formats mainuos i byus drupeit cytaižuoks. Pīcu raidejumu laikā žurnaliste Ausma Sprukte-Kozule i Rēzeknis vaļsts pūļu gimnazejis škoļneica Adriana Goroščaka izzynuos iedīņu receptis i praktiski tuos ari gataveis, dūsīs iz zoologiskajim duorzim i lauku sātom, kai ari veiks breivpruoteigū dorbu veterinarajuos klinikuos i dzeivinīku patversmēs, vysaiduos vītuos vysā Latgolā sasateikūt ar interesantom personeibom i jūs saimem.

Raidejumu cykla mierkis ir veicynuot lokalpatriotismu, mīlesteibu pret sovu saimi i dzymtū volūdu, kai ari motivēt bārnus i pusaudžus nūviertēt kulturys i viesturis montuojumu, aktivuok īsasaisteit breivpruoteigajā dorbā.

Kotru raidejumu plānuots papyldynuot ar skateituoju pīredzi par sātys dzeivinīkim, saimu kūpeigu ēst gataveišonu, dorbuošonūs lauku sātuos i paleidzeibu dzeivinīku patversmem, partū vysi aicynuoti syuteit tematam atbylstūšus foto, video voi dzejūļus, zeimiejumus i cytus rodūšūs dorbus pa postu iz adresi: Rēzekne, Atbreivuošonys aleja 98, LV-4601 ar nūruodi Latgolys regionaluos televizejis raidejumam “Žik!” voi LRT socialūs medeju lopuos, kai ari e-postā zikraid@inbox.lv. Interesantuokūs dorbu autorim byus bolvys.

Cykla “Žik!” nūslādzūšuos sezonys raidejumi, suocūt ar 1. oktobri da 30. oktobra tiks puorraideiti kotru svātdīni 15.30 stuņdēs kanalā TV24 i kotru pyrmūdīni 17.30 stuņdēs kanala Re:TV vierszemis apraidē Latgolys regionalajā televizejā. Taipat kotram raidejumam sekuos atkuortuojumi: kanalā TV24 pyrmūdīnēs 12.00 stuņdēs i sastdīņu reitūs 9.30 stuņdēs.

Piec kotra raidejuma puorraidis televizejā tūs (kai ari īprīškejuos sezonys) varēs atrast LRT sātyslopā, kai ari “Žik!” Facebook lopā, LRT Facebook lopā, LRT YouTube kontā i platformā XTV. Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Žik!” saturu atbiļd SIA “Latgales reģionālā televīzija”.