Rokstu sagataveja: portals lakuga.lv

Leivuona nūvods atsarūn iz Latgolys regiona rūbeža storp Zemgali i Sieleju, deļtam na par veļti vīns nu nūvoda saukļu ir “Atslāgs Latgolys vuortūs”. Voi Leivuons ir ari latgalisks? Piec gasteišonys Leivuona jaunīšu centrā “Kvartals” portals lakuga.lv var dīzgon drūsai apgolvuot: “Nui, ir!” Dīnā, kod portala puorstuovis beja “Kvartalā”, nūtyka ari kaida projekta nūslādzūšais pasuokums latgaliskuos nūskaņuos, kuru apmeklēja aptyvai 70 jaunīšu.

“Kvartala” kasdīna

Kasdīnā Leivuona nūvoda jaunīšu centrā dorbojās tuo vadeituoja Mareja Driksna, kura ir kai centra aktivitašu koordinators, tai ari vysaiduoka veida projektu raksteituojs i realizātuojs. “Kvartals” ir myusdīneigs centrs ar plotom vareibom sevkuram jaunīšam – te var apmeklēt trenažeru zāli, īrokstu studeju, spēlēt golda spēlis, kuopt pa “kuopšonys sīnu”, īsasaisteit organizātajūs pasuokumūs i vīnkuorši atsapyust breivā, drūsā vidē. Taipoš “Kvartals” ari vidē ir eistyns “kvartals”, partū ka jaunīšu atpyutys īspiejis naapsarūbežoj viņ ar centra telpom, uorpus tūs, sūpluok pošam centram, ir skeitparks, futbola, volejbola i basketbola laukumi, ari vyss vajadzeigais inventars. “Pyrma desmit godu mums cīši pasaveice ar vairuokim sovstarpeji saskaneigim projektim, kurim pasasokūt, tyka izveiduots “Kvartals” i tuo apleicīne,” stuosta centra vadeituoja Mareja Driksna, jei ari dasoka, ka centrā ar jaunīšim teik runuots naviņ par regionali voi vaļstiski svareigim vaicuojumim, tok ari par globalom lītom, pīmāram, zaļū dūmuošonu, jaunīšu tīseibom, taipoš teik organizātys ari gona regularys sarunys ar Eiropys Parlamenta deputatim.

Kasdīnā centrā nūteik aktiva darbeiba – ir vysaiduoka veida nūdarbeibys, izbraucīni iz nūvoda školom, taipoš Mareja pastreipoj, ka svareiga centra darbeibys daļa ir dūt jaunīšim vareibu aizbraukt iz uorzemem pīredzis apmainis braucīņūs. “Jau nu pošu suoku sasaskuoru ar tū, ka jaunīši na tik Latgolā, tok lauku regionūs kūpumā, skaita, ka tuoļuok kai da Reigai tikt nav vareibys, tys radzams ari situacejuos, kod tu ej ar konkretu pīduovuojumu, ka “hei, te var nūbraukt iz itū vaļsti”, tok jaunīts eisti natyc, ka eistyn var i tys ir bez moksys. Deļtam mums īškejais mierkis ir paruodeit jaunīšim, ka jī var ceļuot i dabuot pīredzi, kuru piec tam puorvest i izmontuot sātā. Ari es poša sovu pīredzi asu uzkruojuse taišni taidūs braucīņūs,” stuosta Mareja.

Latgaliskais Leivuonā

Mareja Driksna kūpā ar Leivuona nūvoda jaunuotnis darbineicu Lāsmu Kursīti-Kozuli bīdreibā “Riktīgi naiss” pīraksteja mozūs grantu projektu “Latgaliskums, kas rit jaunatnes dzīslās”. Ar granta atbolstu tyka realizāti četri pasuokumi jaunīšim, kurūs eipašs uzsvors tyka lykts iz aktivitatem par i ap latgalīšu kulturu, muzyku, sabīdryskū dzeivi i cytim vaicuojumim. “Svareigi atzeimuot, ka taišni jaunīši beja tī golvonī iniciatori, kuri saceja, ka vajag latgaliskus pasuokumus,” stuosta “Kvartala” vadeituoja Mareja. Tū iniciēja piļsātys Jaunīšu dūme, kurā dorbojās aptyvai 20 jaunīšu, kurim, kai sevkurai īstuodei, goda beiguos ir juoveidoj pasuokumu i budžeta plans. “Tai paguojušā godā, kod “Kvartalā” jau beja nūtics vīns pasuokums latgaliski, jaunīši maņ saceja, ka grib vēļ kū na viņ leidzeigu, deļtam jī poši pasuokumu planā īlyka Latgolys kongresa dīnu,” stuosta Mareja.

Projekta pādejais pasuokums, kura laikā beja vareiba sasatikt i pasarunuot ar muziki i akteri Kristapu Rasimu i radejis DJ i socialūs kontu puorvaļdeituoju Lauri Zalānu, pulcynuoja aptyvai 70 jaunīšu. Pasuokums beja sadaleits vairuokuos daļuos – nu suoku kūpeiga diskuseja ar Kristapu i Lauri, kurys laikā jaunīšim beja vareiba aizdūt tim interesejūšus vaicuojumus, sovpus piec diskusejis jaunīši kūpā ar Kristapu i Lauri devēs piļdeit aizdavumus treis dažaiduos centra “Kvartals” vītuos. Tī beja golda spēlis “Čipierksneits” vaicuojumi, aizdavums atminēt latgaliskus vuordus voi puorskaiteit i pīraksteit tekstu latgaliski. Vystik Mareja pīzeist, ka gona daudzi jaunīši vyspuor nazyna latgalīšu volūdu, deļtam ir svareigi saglobuot balansu storp latgalīšu i latvīšu volūdom, kab jaunīts nasajustu naārtai, ka vysa pasuokuma garumā navar izsekuot leidza i saprast vysu saceitū.

“Mes īmam preteimā i nasam Leivuonā latgaliskumu, na tū mīdzam viersā,” tai “Kvartala” vadeituoja Mareja Driksna.

Iznest latgaliskumu caur sovu prizmu

Ari poša Mareja pīzeist, ka kasdīnā latgalīšu nav juos pyrmuo volūda. “Es varu parunuot, maņ baba i mama ir latgalītis, tok es dzymu, augu i vuicejūs Reigā.” Vydsškolys laikā Mareja iz treis godu atsagrīze Latgolā, tok studeju godūs vuiceibys beja Reigā i uorzemēs. “Kod es aizbraucu iz laukim, kuri atsarūn Augšdaugovys nūvoda Vabalis pogostā, tī vīnkuorši navar narunuot latgaliski. Koč voi, ka tev vajadzēs sarunuot traktoru, kab apart lauku, tevi latvyski vīnkuorši najims par pylnu. Interesanti, ka ar veiru i draugim nupat saspieliejom golda spēli “Čipierksneits”, kai izaruodeja – lela daļa draugu runoj latgaliski,” smaidūt stuosta Mareja.

Mareja beja ari iniciatore, kura saimē vysus pīrunuoja puorsavuokt iz Latgolu. “Nazynu, varbyut tuos ir kaidys seņču saknis manī voi kas nu tys ir, tok maņ cīši pateik itei vide. Maņ ir cīši skumeigai, kod sabīdreibā Latgola otkon teik nūsaukta par nabadzeiguokū, atpalykušuokū voi koč kai tamleidzeigi, mums ir tik forši jaunīši, tik foršys sovstarpejuos komunys i ļauds!”

Jei ari pīzeist, ka sova dorba vidē gona bīži sasastūp ar jaunīšim, kuri prūt runuot latgaliski, tok kautrejās tū dareit, vys jei ari pastreipoj, ka tai ir ar vysom volūdom, kurys tu da gola napuorzyni. Ari nūsaslādzūt itam projektam, Leivuona nūvoda jaunīšu centrā “Kvartals” latgaliskums naapseiks, Mareja soka, ka nūteikti grib turpynuot aizsuoktuos aktivitatis, īspiejams, ari rokstūt jaunus grantu projektus.

Leivuons – “Latvejis Jaunīšu golvyspiļsāta 2024”

Konkursu “Latvejis Jaunīšu golvyspiļsāta” organizej Izgleiteibys i zynuotnis ministreja sadarbeibā ar bīdreibu “Latvijas Jaunatnes padome”. Itūgod konkurss tyka organizāts septeitū reizi, i tuo mierkis ir popularizēt dorbu ar jaunuotni pošvaļdeibu vydā, veicynuot pošvaļdeibu sadarbeibu i pīredzis apmaiņu jaunuotnis jūmā. Itūgod Leivuons nu suoku tyka da konkursa ūtruos kuortys, kur startēja kūpā ar Siguldu i Ciesim i piečuok dabuoja pyrmū vītu. Leivuons ir pyrmuo Latgolys piļsāta, kura ir sajāmuse Latvejis Jaunīšu golvyspiļsātys titulu. Jaunīšu centra vadeituoja Mareja Driksna skaidroj: “Kab mes vyspuor varātu startēt itymā konkursā, piļsātai i jaunīšu centram jau da konkursa dasacejuma juobyut radzamam dorbam ar jaunuotni, juobyut pasuokumim i aktivitatem. Taipoš mums beja ryupeigi juoizpietej asūšuo situaceja Leivuonā i juopīduovoj nuokušuo goda pasuokumu plans. Pasuokumu planā īkļuovem myusu vierteibys, kurys skaitom par svareigom, taipoš ari tuos lītys, kurys kai svareigys atzeimej vaļsts, Izgleiteibys i zynuotnis ministreja i Eiropys Savīneiba. Dasacejums itam konkursam beja cīši apjūmeigs, treis cylvāku komanda struoduoja vairuokys nedelis i gola rezuļtatā tyka īsnāgts aptyvai 60 lopu dasacejums i obligatuo video vizitkarte, kuru taisejom kūpā ar jaunīšim.” Pasasokūt itam konkursam, Leivuonā tiks styprynuota vairuoku leimiņu sadarbeiba ar Izgleiteibys i zynuotnis ministreju, bīdreibu “Latvijas Jaunatnes padome”, tiks organizātys daudzveideigys aktivitatis, kuru golvonais mierkis ir styprynuot jaunīšu pīdareibu sovai piļsātai i regionam.

Fotogalerejā Leivuona nūvoda jaunīšu centrs “Kvartals”. Foto autore Amanda Anusāne, portals lakuga.lv