Rokstu sagataveja: portals lakuga.lv

Garum školuotuoju dīna i Nikodema Rancāna bolvys padūšona, partū ituos nedelis īsacejumus īsoka N. Rancāna bolvys sajiemieja, Kruoslovys gimnazejis školuotuoja Ilga Stikute. Jei īsacejumus suoc ar dūmu: “Kotra nedeļa atīt ar puorlīceibu, ka laiks vysu varons i tys nivīnu nagaida. Ari dzeive ir gudruoka par mums, i kotrai lītai īruodejuse sovu laiku. Tok steiga ite naīsadar, jo tei vysod saisteita ar stresu. Partū dzeive juobauda, izgaršojūt kotru šaļti, nasteidzeigi i mīreigi.”

Gatavejīs jaunai nedeļai svātdiņ

Muna nedeļa suocās ar svātdīni, kos savuoreju zuoļu čaju, pajemu nu plaukteņa kaidu gordumu i veļteju laiku sev. Vysbīžuok tei ir adeišona voi gruomotys skaiteišona, siežūt šyupeļkrāslā i ļaunūt kliepī īsarytynuot Mincei, tok pi kuoju nūsaguļt obejim sunānim. Itūšaļt ūtrū reizu puorskaitu Initys Silys “100 vēstules sievietei” na jau partū, ka aizmiersuse, tok partū, ka maņ tei paleidz nūsaturēt iz škautnis strop kasdīnys skriejīni i puorlīceibu, ka kotra dīna ir moza svātku dīna. I es vuicūs dīnu svieteit, nasaverūt ni iz tū, ka na vysod vyss ir ideali i tai, kai grybātūs maņ.

Izaraun nu kasdīnys iz kulturys pasuokumu

Nedeļā juobyut vīnai izaraušonai nu īrostuos vidis, tys ir, školys kasdīnys, i dūšonuos iz kaidu kulturys pasuokumu. Ari itei nedeļa nav izjāmums. Latvejis Nacionalajā bibliotekā asu bejuse vairuokys reizis kai ekskursejuos ar audzynomū klašu školānim, tai vysaidūs projektūs, kai ari sasatykuse ar rakstnīkim, konkursūs. Kur var vysu atguoduot! Tok kotru reiz asūt Gaismys pilī – myusdīneigā pasauļa kulturys i informacejis centrā –, izjiutu svātkus i lapnumu par sovu vaļsti. Tū stuostu ari sovim audzieknim. Tai ari itūreiz trešdīnē kūpā ar audzieknim izstaiguošu lelū āku i vysi kūpā pīsadaleisim nūdarbeibā “Laseišona kai pretuošonuos jeb pošizdūts”. Dūmoju, ka byus interesanti, jo biblioteka pīduovoj vydsškolys pūsma jaunīšim improvizātā sēdē īpasazeit ar aizlīgumim, kas saisteiti ar raksteitu i laseitu vuordu vysaidūs Latvejis viesturis pūsmūs – nu gruomatnīceibys pyrmssuokumu da tai dīnai. 

Catūrtdīne – muni profesionalī svātki. Nūteikti kūpā ar kolegim, nūteikti kūpā ar školānim.

Izbaudi breivdīnys ar meilajim

I tod pīktdīnis vokora gaideišona, kod sabrauc bārni. Es cīši gaidu pīktdīnis, jo tod vēļ prīškā ir diveji vokori i dīnys, lai nasteidzeigi baudeitu tuos kūpā ar sovim meilajim, kas tik mudri izauguši… Sarunys pi vakareņu golda, kūpeigys sastdīnis pastaigys mežā, tradicionaluo piertī īšona ar sirsneigū nūvieliejumu “Vīglu goru!”, čajs ar madu i pošcaptuos smolkmaizeitis piec pierts. Tī ir kūpā byušonys svātki, kas snādz gondarejumu, mīlesteibu i energeju vysai nuokušajai nedeļai.

Ka gribi izgluobt pasauli, dūdīs iz sātu i meiļoj sovu saimi. /Muote Terēze/