Rokstu sagataveja: portals lakuga.lv

Bīdreiba “Varakļōnīts” Martys Bārbalis (1933–2003) jubilejis godā izdavuse juos dzejis kruojumu “Pie loga putna spārns”, kurā var puorskaiteit dzejūļus kai latvīšu literarajā volūdā, tai ari latgaliski.

“Īprīcynoj dzejis tālu poetiskums, ryndu plyudums i labskaneigums. Nui, Martys Bārbalis dzeja ir liriska, tradicionala, īspiejams, vacmūdeiga, tok lobā nūzeimē, eistyn kai komponista Ringolda Uoris naaizmierstamuos melodejis. Tok golvonais, kū grybu atzeimēt, – tei ir gorā stypra cylvāka dzeja,” par kruojumu roksta dzejneica Anna Rancāne.

Martys Bārbalis dzymtuo puse beja Murmastīne, tī jei ari vuicejusēs pamatškolā, pi videjūs izgleiteibys tykuse Varakļuonu vydsškolā. Studējuse Latvejis Vaļsts universitatis Viesturis i filologejis fakultatis Latvīšu volūdys i literaturys nūdaļā vīnā kursā ar dzejnīku Ojāru Vācieti. Struoduojuse par školuotuoju i bibliotekari Slūkā, piečuok – Latvejis Vaļsts izdevnīceibys Originalliteraturys nūdaļā. Pīsadalejuse Dzejis dīnuos, tok, kai ituos gruomotys prīškvuordā roksta tuos sastateituoja, “nikur naizavierzēja prīškplanā, jo juos dzejā faktiski nav nūdavu voldūšajai īkuortai, jei namaloj sev i naroksta, kab tik koč kas tyktu īspīsts”.

Laikā nu 1960. leidz 2003. godam izguojušys četrpadsmit Martys Bārbalis dzejūļu gruomotys. Jei ir vīna nu zynomuokūs latvīšu autoru, kas rakstejuši ari latgaliski. 90. godūs Bārbalis dzejūli tyka publicāti ari taidūs latgalīšu izdavumūs kai “Latgolas Bolss”, “Mōras Zeme”, “Jaunuo Dzeive” i cytūs. Ar Martys Bārbalis dzeju ari vairuoki komponisti radejuši dzīsmis, tymā skaitā grupys “Leijerkastnieki” labi zynomū “Ai, Latgale, tu dvēselīte mana”.

Gruomotys sakuortuotuoja i redaktore ir Dace Zvirzgdiņa, muokslinīcyskū nūformiejumu i maketu taiseja Margarita Selicka i Ketrina Kļaviņa. Gruomota izdūta sadarbeibā ar izdevnīceibu “Sava grāmata”, tū finansiali atbaļsteja Valsts kulturkapitala fonda mierkprograma “Latvīšu viesturiskūs zemu atteisteibys programa”, Varakļuonu i Modūnis nūvoda pošvaļdeiba.