Rokstu sagataveja: portals lakuga.lv

Itamā nedeļā Latvejis Piļu i muižu asociaceja aicynoj iz Legendu nakts nūtikšonom vysā Latvejā. Vīns nu leluokūs pasuokumu Latgolā gaidoms Kruoslovā. Deļtuo ituos nedelis kulturys īsacejumus sagatavejuse Kruoslovys rajona partnereibys administrativuo vadeituoja i vīna nu pasuokuma “Leģendas Krāslavā” reikuotuoju Zane Ločmele.

Dzīdūšī akteri i sasatikšona ar kieneņu Sigismundu III Vāsu

Tai kai Legendu nakts Kruoslovā itūgod plānuota kai lels pasuokums i muna pošys nedeļa paīt viņ dūmuos ap jū, deļtuo itūreiz vysi treis nedelis īsacejumi byus aicynuojums sastdiņ braukt gostūs pi myusu. Vīns nu īmesļu ir tys, ka sūpluok vysim stuostim i legendom, kas vokorā skanēs par Grafu Plateru pili, ir arī vokora koncerti. Vīnam vokoram asam saryupiejuši vasalus divejus koncertus – 17.00 stuņdēs aicynojam iz Kruoslovys Kulturys nomu, kur byus Latvejis dzīdūšūs akteru saliduojums koncertā “O, kādi kungi!”. Latvejis teatru akteri Jurs Hiršs, Gundars Grasbergs, Edgars Pujāns i Juoņs Kirmuška Anatolija Livča grupys “ARmaestro” pavadejumā nūvess kinu i teatra izruožu dzīšmu ceļuojumā. Bet 20.00 stuņdēs piļs staļūs skanēs baroka muzykys koncerts “Leģenda par satikšanos ar karali Sigismundu III Vāsu”, kas viesteis par Pūlejis-Leitovys vaļstsi i kūpeigū viesturi Latvejis teritorejā. Koncerta muzikis byus apsaviļkušs Fraņcejis kieninīnis Marejis Antuanetis laika kostimūs. Ka kaids gribēs, pyrma koncerta (nu 18.30 da 19.30) Kruoslovys Amatnīceibys centrā varēs pīsadaleit meistarklasē “Grāfa broša” i ari sev sataiseit nazkū volkojamu – stykla mozaikys rūtu – īsadesmojūt nu tūs laiku. Koncerti i cytys Legendu nakts nūtikšonys byus bez īīšonys moksys.

Atkluosim Kruoslovys pili nu jauna

Legendu nakts byus cīši loba vareiba izzynuot vysa kū ap Plateru pili i parku. Piļs staļa kuormā nu 16.00 stuņžu varēs vērtīs eiskinys par pili i parku, bet nu 18.40 da 19.00 – apsavērt fotokonkursa “Atklāj Krāslavas pils kompleksu no jauna!” i pīsadaleit fotokonkursa daleibnīku sveikšonā. Bet piec tuos 19.00 stuņdēs lekcejā “Atklāsme” Kruoslovys nūvoda muzeja, Kruoslovys nūvoda bibliotekys puorstuovi kūpā ar Antazaves muižys gostim nu Zarasu (Leitovā) stuosteis par Kruoslovys grafu Plateru piļs, parka teritoreju i senejūs gruomotu kolekceju.

Klusais disko i gaismenis prīcai

Kruoslovys Legendu naktī varēs pīsadaleit vairuokuos aktivitatēs, kurys Kruoslovā byus pyrmū reizi, par pīmāru, Kruoslovys Kulturys nomā pyrmū reizi Kruoslovā dorbuosīs 360° video platforma, kurā kotrys grybātuojs varēs īmyužynuot sovu gasteišonu svātku video “Leģendas Krāslavā”, taipat pyrmū reizi Kruoslovā (tīpat kulturys nomā) byus klusuo diskoteka aba kai pasaulī sauc “Silent Dico”. Bet Legendu nakts pādejā stuņdē, nu 21.00 da 22.00, byus vareiba īt klausompastaigā pa izgaismuotū grafu Plateru piļs kompleksu i izzynuot Plateru dzymtys viesturi i klauseitīs legendys par pili. Lai prīceiguoka īšona, pastaigys dalinīki sajims Glow Stick viezenis. Navajadzēs sasatraukt ari par tukšu vādaru, jo piļs staļu terasē dorbuosīs kopejneica, kurā varēs dabuot čaju voi kopeju, kai ari paraudzeit Kruoslovā captus tortus.