Rokstu sagataveja: portals lakuga.lv

Sastdiņ, 11. novembrī, Leivuonā i caturtdiņ, 23. novembrī, Preiļūs nūtiks rodūšūs seminaru cykla “SPĀKA LAB” rudiņa sezonys pasuokumi, portalu lakuga.lv informej seminaru reikuotuoju puorstuovi. Seminaru cykla mierkis ir styprynuot Latgolys kulturys dzeivis organizātuoju i navaļstiskūs organizaceju puorstuovu, kai ari jaunīšu izaugsmi, sadarbeibys spiejis i izpratni par myusu dīnu kulturys procesim. “SPĀKA LAB” Leivuonā jaunīšus aicynuos izzynuot tradicionalū kulturu i latgalīšu repa muzyku, bet Preiļu seminara mierkis byus īsavuiceit izmontuot kotrys vītys unikalitati jaunu kulturys ideju radeišonā, kai ari vīnuotīs, kai 2025. godā varātu svieteit Latgolu i tuos vierteibys – kai iz vītys Latgolā, tai uorpus tuos.

Sastdiņ, 11. novembrī, 10.00 stuņdēs reita Leivuonā (Leivuona nūvoda Multifunkcionalajā jaunīšu iniciativu centrā “Kvartāls”) nūtiks “SPĀKA LAB” seminars “Kurs dreižuok(s): apdziedāšana vai reps? Tradicionaluo kultura i jaunīši”. Tymā ar sovu pīredzi tradicionaluos dzīduošonys prasmu pylnveiduošonā daleisīs Kate Slišāne nu Upītis kulturtelpys, par īspiejom, kū dūd aktiva pīsadaleišona tradicionaluos kulturys nūrisēs, stuosteis folklorys kūpys “Tarkšķi” daleibneica i socialūs medeju satura veiduotuoja Katrīna Karele, Latvejis Nacionaluo kulturys centra direktore Signe Pujāte izceļs tradicionaluos dzīduošonys elementus, kas varātu byut interesanti ari laikūs iz prīšku, tok latgalīsu repere Ūga stuosteis par sovu pīredzi hip-hop kulturā i tuos perspektivu Latgolā. Seminara ūtrajā daļā paradzāta diskuseja “Tradicionaluos kulturys i džen Zī idealais randeņš. Kur sasatikt?”. Piec tuos pasuokuma daleibnīkus gaida praktiskuos darbneicys, kuruos varēs vuiceitīs apdzīduošonys i repuošonys prasmis, lai nūslāgumā darbneicu daleibnīki paraudzeitu spākus improvizātā obeju muzykys stylu saceņseibā. Repuošonys nūdarbeibu vadeis Ūga, tok apdzīduošonys prasmis paleidzēs styprynuot folklorys kūpys “Turki” vadeituoja Terēzija Rubene i folklorys kūpys “Rūtoj” vadeituoja Ilze Valaine. Seminara mierkauditoreja ir jaunīši, kurūs interesej dažaidu stylu muzyka i kultura, jaunuotnis lītu specialisti, folklorys kūpu daleibnīki i vadeituoji. Pylna Leivuona seminara programa: https://ej.uz/SPAKA-LAB_Leivuons.

Catūrtdiņ, 23. novembrī, 11.00 Preiļūs (Preiļu pilī) nūtiks “SPĀKA LAB” seminars “Kur dabuot ideju sovai kulturtelpai i kai Latgolu svinēt 2025. godā?”. Tymā aicynuoti pīsadaleit Latgolys kulturys īstuožu i organizaceju, navaļstiskūs organizaceju puorstuovi i cyti interesenti. Seminarā namaterialuos kulturys montuojuma centra “Upīte” direktors Andris Slišāns snēgs īskotu, kaidi lobumi i aizdavumi ir pošam sovā kulturtelpā, Latvejis Nacionaluo kulturys centra Viesturiskūs zemu i namaterialuos kulturys montuojuma nūdalis vadeituoja Jana Vērdiņa pīduovuos plotuok izzynuot Latvīšu viesturiskūs zemu lykumu, tuo īspiejis, Siguldys nūvoda Kulturys centra vadeituoja Jolanta Buorīte (Borīte) stuosteis par tū, kaidi ir izaicynuojumi i īspiejis, Latvejā reikojūt jaunu festivalu, tok Ideju i inovaceju instituta dybynuotuoja Elīna Mikelsone (Miķelsone) paleidzēs saprast metodis, kai radeit jaunys idejis kulturā. Taipat itymā “SPĀKA LAB” aicynuotys dasasaceit organizacejis/īstuodis/interesenti, kas eisā stuostā grib pasadaleit ar sovim veiksmeigajim/drūsmeigajim pīmārim, struodojūt kulturā Latgolā voi latgalīšu kulturā ari uorpus Latgolys. Seminara ūtrajā daļā kluotyn asūšī grupu dorbā i diskusejā aicynuoti vīnuotīs ideju vātrā par tū, kai Latgola varātu sevi pozicionēt i kū pīduovuot svieteit (kaidu nūtykumu, vierteibu, personeibu, prasmi, objektu) 2025. godā kai iz vītys viesturiskajā zeme, tai cytuvīt Latvejā i pasaulī. Pylna Preiļu seminara programa: https://ej.uz/SPAKA-LAB_Preili.

Pyrmī “SPĀKA LAB” rodūši seminari, kas veļteiti Latgolys kulturys dzeivis organizātuoju i navaļstiskūs organizaceju puorstuovju kapacitatis styprynuošonai i ideju apmaiņai nūtyka ituo gods janvarī Daugovpilī i Kuorsovā, dabojūt jaunys voi nūstyprynojūt asūšuos prasmis komunikacejis i nūvodpietnīceibys vītu/stuostu veiduošonys nūzarēs. Video īroksti nu seminaru nūsaverami ITE. Rodūšūs seminaru cyklu reikoj latgalīšu kulturys kusteiba “Volūda” i bīdreiba “New East”, sasadorbojūt ar Leivuona nūvoda jaunīšu centru “Kvartāls”, bīdreibu “riktīgi NAISS”, Preiļu nūvoda pošvaļdeibu i Latgolys Turisma asociaceju. Pasuokuma nūrisi pabolsta Latvejis Republikys Kulturys ministreja, Latvejis Nacionalais kulturys centrs, kai ari Sabīdreibys integracejis fonds.

Obeji seminari nūtiks kluotīnē i interesentim byus daīmami bez moksys. Dasasaceišona Leivuona seminaram par jaunīšim i tradicionalū kulturu vālama da 9. novembra ITE, tok Preiļu seminaram par idejom kulturai da 20. novembra ITE. Grybātuoji, atzeimojūt dasacejuma anketā, varēs sajimt Latvejis Nacionaluo kulturys centra aplīcynuojumu par pīsadaleišonu seminarā. Pasuokumu reikuotuoji vys lyudz jimt vārā, ka obejūs seminarūs vītu skaits ir īrūbežuots.