Rokstu sagataveja: portals lakuga.lv

Itūšaļt nūteik dorbs pi jauna raidejumu cykla “As asmu muokslinīks”, kas byus izklaidejūši informativs vuiceibu materials par tim Latgolys regiona muokslinīkim i jūs dailradi, kuri ari itūšaļt ir daļa nu Latgolys kulturys jūmys (gleznuotuoji, keramiki, tekstilmuokslinīki, tieļnīki, grafiti, tetoviejumu i cyta veida muokslinīki), stuosta projekta autore Sandra Poplavska aba muokslineica Sanri.

Nu suoku projektā beja paradzāti diveji raidejumi, kotrys aptyvai 24 minutu garumā. “Vystik es drupeit aizaruovu i, kab saveiduotais materials naītu zudeibā, byus pīci raidejumi,” stuosta projekta autore Sandra Poplavska. Projekta “As asmu muokslinīks” mierkis ir īmyužynuot spylgtys Latgolys personeibys i tūs īguļdejumu regiona kulturtelpys dzeivē. Taipoš ar itū projektu cer plotuokā sabīdreibā aktualizēt tū, cik nūzeimeigs ir vysaidu nūzaru Latgolys regiona muokslinīku īguļdeitais dorbs regiona kulturvidis saglobuošonā. Raidejumā tiks aktualizāti vairuoki problemvaicuojumi i vylktys paralelis ar myusu laiku sarežgeitajim ceņtīnim saglobuot latgaliskumu.

“Itys projekts ir izaicynuojums maņ pošai, partū ka itūreiz ir vareiba nūviertēt kai tys ir – byut video i skaņu operatoram, montažys cylvākam i režisoram vīnā personā,” stuosta projekta autore Sandra Poplavska.

Raidejumu cyklā byus vareiba plotuok īpasazeit ar 25 Latgolys kulturys personeibom, tūs vydā ir ari Lilija Zeiļa, Edgars Vronskis, Annele Slišāne, Una Gura, Ilze Griezāne, Inga Salmiņa, Aleksandrs Nesterjuks, Ksenia Šinkovskaja, Kristīne Nicmane, Mairita i Ivo Folkmani, Artūrs Nakolet, Viktorija Valujeva, Anatolijs Zelčs, Vjačeslavs Fomins, Māris Čačka, Edgars Largo, Sanri, Emīlija Sneško, Viktorija Grappa, Jānis Saikovskis, Valda Mežbārde, Inga Onževa, Ingūna Levša.

Projektu ar Vaļsts Kulturkapitala fonda Latvīšu viesturiskūs zemu atteisteibys programys atbolstu realizej bīdreiba “Talented borders”. Itūšaļt paradzāts, ka aptyvai da decembra vyds raidejumi tiks publicāti YouTube, tok, kai stuosta Sandra Poplavska, raidejumu garums atbylst televizejis raidejumu standartam, deļtam potencialai sadarbeibai teik plānuots uzrunuot ari vairuokus televizejis kanalus.