Rokstu sagataveja: Edeite Laime, portals lakuga.lv

Ituo gods Latgolys kulturys programys atbaļsteitūs projektu sarokstā pasaruodeja ari “Ziemeļlatgales latviešu biedrība” vuords. Bīdreibai atbaļsteits projekta dasacejums par muokslys filmys “Kuozys Latgolā” scenareja atteisteišonu. Izaruod, ka tys ir rakstnīka, Bolvu nūvoda dūmis deputata i ari latgalīšu sabīdryskuo aktivista Alda Bukša dorbs.

Kai stuosta Aldis Bukšs, scenarejs ir pīraksteits, tok reizē varūt i saceit, ka tys vēļ arviņ teikūt raksteits, jo filmu scenareju raksteišona asūt taids process, kas nasabeidz pat da fiļmiešonys dorbu pabeigšonys. “Ceru, ka scenarejs pylnmetražys filmai “Kuozys Latgolā” eistyn paliks par filmu. Ir padareiti vysi prīškdorbi, koč i reizē nav tai, ka byutu par tū 100 % drūss,” sarunā portalam lakuga.lv soka Aldis Bukšs. Filmys scenareja autors stuosta, ka itys ir juo ūtrais dorbs filmu scenareju žanrā: “Pyrmais beja 2020. godā izguojušajai pylnmetražys muokslys filmai “Maiņa” par vīnu nakti takstista dzeivē Reigā. Taida kai kriminaldrama. Scenarejs tyka pīraksteits vēļ daudzi agruok. Tūlaik pīraksteit scenareju mani uzrunuoja filmys režisors Reinis Kalviņš, kurs beja puorskaitejs munu pyrmū gruomotu “Parādu piedzinēji”. Es pīkrytu, i var saceit, ka asu filmys scenareja leidzautors, jo koč kaidys lītys dorba golā pasamaineja i varbyut nav tai, kai maņ byutu scenarejā gribiejīs. Tok tys deve lobu pīredzi i praksi, lai dorbu turpynuotu. Tai dasagivu jaunam scenarejam muokslys filmai, i niu tūp “Kuozys Latgolā”.”

Aldis stuosta, ka jaunuo scenareja idejis pamatā ir treis draugu otkon sasatikšona Latgolā. “Meklieju īmesli, deļkuo lai Latgolā sasatyktu treis paseņ nasasatykuši draugi i, saprūtams, kuozys ir vīns taids breineigs īmeslis. Kuozys vyspuor ir interesanta tema! Saprūtams, ka Latgolys kuozys ir pylnys vysaidu stereotipu, kas vēļ arviņ volda sabīdreibā. Munā gadīnī scenarejs filmai nav par tim stereotipim, nūtikšonu vydā vaira ir draugu sasatikšona. Ka juoīskicej eisi, tod stuots ir par vīnu puisi, kurs kūpā ar sovu malnuodainū meitini atbrauc iz Latgolu i dūmuoti voi najauši teik kuozuos, kur pi veira īt juo pyrmuo mīlesteiba, a tys jaunais veirs ir puiša lobuokuo drauga bruoļs. Nu i tod tys par reizi raisa vysaidus konfliktus, puorprotumus i nūtikšonu atteisteibu. Tei byus drama ar komedejis elementim,” filmys stuostu skaidroj scenareja autors Aldis Bukšs.

Tūpūšais filmys stuosts, kuruo atteisteišonu atbaļstejuse Vaļsts kulturkapitala fonda Latvīšu viesturiskūs zemu atteisteibys programa, asūt pīraksteits latgaliski, tok producentu kompanejis vajadzeibom tikšūt puorraksteits daleji latvīšu literarajā volūdā. “Aproksti byus literarajā volūdā, tok dialogi byus i latgaliski, daudzi ari angliski, daļa latvīšu literarajā volūdā – kai kurs varūņs runoj. Golā vys jau taipat tys byus atkareigs nu režisora,” skaidroj Aldis. Konkreta režisora, kurs struoduos pi scenareja, vēļ naasūt, nu kūpā ar pīredzejušū producentu kompaneju “White Picture”, kas izsacejuse gataveibu struoduot pi filmys, jis teikūt maklāts. “Es jūs uzrunuoju ar gotovu ideju i scenareju, tok filmai vyss vēļ prīškā! Pi scenareja suoču struoduot pyrma treju godu i niu beja loba motivaceja tū pabeigt,” soka Aldis Bukšs.

Aldis da ituo ir vaira pazeistams kai romanu autors – 2015. godā izdūts autora debejis kriminalromans “Parādu piedzinēji” latvīšu literarajā volūdā, bet 2020. godā kriminalromans “Bruoli” latvīšu literarajā i latgalīšu rokstu volūdā. Kaidu laiku jaunu publicātu dorbu nav bejs, bet autors stuosta, ka dailradi gribiejs paturpynuot taišni ar scenareju, jo vizualī stuosti, filmys asūt lobs veids, kai uzrunuot auditoreju, reizē ari nūdūt viesti par latgaliskū. “Sižetu idejis maņ puorsvorā rūnās skrīnūt, aust taidys kai biļdis. Ari ideja par scenareju “Kuozom Latgolā” “uzause”, kod austeņuos klausejūs repu latgaliski. Beja vīna dzīsme, kas raiseja taišni ideju par atsagrīzšonu Latgolā,” idejis dzimšonu atkluoj Aldis.

Scenareja autoram nasagrybātu, kab piečuok maineitūs filmys nūsaukums, jo “Kuozys Latgolā” labi raksturojūt tū, kas īcarāts. Taipat Aldis pīkreit, ka tys jau pats par sevi raisa koč kuo naprognozejama, pīdzeivuojumu versejis. Filmys scenarejā byušūt kai juo poša pīredze, jo saguojs byut vysā daudzi kuozuos, draugu pīredze i ari rodūšuo fantazeja.

2023. gods pavasarī pyrmizruodi pīdzeivuoja Alda Bukša kriminlaromana “Bruoli” radejis īstudiejuma verseja – da ituo vierīneiguokais radejis dorbs latgaliski. Iz vaicuojumu, voi nabeja baist, ka audio stuosts var likt aizmierst gruomotu, Aldis beišonūs nūraida: “Vysa pyrma lels paļdis komandai par itū dorbu! Pats sajiemu viņ pozitivys atsauksmis, ari nu napazeistamu cylvāku i taidu, kurim nav nikaida sakara ar latgaliskū. Maņ ruodīs, ka radejis īstudiejums paleidzēs “Bruoļu” stuostu nest vēļ tuoļuok. Nui, nu vīnys pusis tys ir ryskys, tok nu ūtrys latgaliski kriminalromans tyka izdūts cīši mozā tiražā, nu kuruos kaidu eksemplaru niu ari guni navar atrast, deļtuo izskaniešona radejā latgaliski paleidzēja sasnēgt mierki, kū izvierzieju, kod stuostu raksteju latgaliski – lai piec vareibys vaira ļaužu tū īpazeist.” Aldis tur nūceju, ka varbyut radejis īstudiejums paleidzēs ari “Bruoļu” tuoļuok puordūšonai i uorvaļstīs. Rakstnīks atkluoj, ka jau niu kriminalromans teik tulkuots angliski i igauniski, ar izdevnīceibu Igaunejā jau asūt nūslāgts leigums, tok kotra tulkuošona taipat saīt pagars process. Atguodynuosim, ka 2021. godā kriminalromans tyka izdūts ari leitovīšu volūdā.

Portalam lakuga.lv Aldis atkluoj, ka niu paraleli cytim dorbim struodoj ari pi kriminalromana “Bruoli” turpynuojuma, tok pošam ruodūtīs, ka cikom ar raksteišonu tuoļuok likšūt pauzi. “Asu vysā daudzi pīrakstejs, tok niu ir sajiuta, ka vēļ nav pabeigts, ka vajag pajimt pauzi. Tys kai ba byus “Bruoļu” turpynuojums, tok cytaiduoks. Varbyut pat vaira mess tyltus iz pyrmū kriminalromanu “Parādu piedzinēji”. Kotrā ziņā mums mierkis ir, lai ari tei gruomota, kod byus gotova, byutu daīmama kai latgaliski, tai latvīšu literarajā volūdā,” par plānim iz prīšku stuosta Aldis Bukšs.