Pavodūt svātku nedeļu patriotiskā jutūnē ar pīspraustu lenteiti pi kryuts i pīsavīnojūt Latvejis 105. godadīnys svineigajim pasuokumim, itūreiz ar kulturys īsacejumim pasadola Latgolys regionaluos televizejis žurnaliste Ausma Sprukte-Kozule. Kasdīnā Ausma dzeivoj Rēzeknis nūvoda Leņdžu cīmā, ir sabīdryski aktiva i īsastuoj par latgalīšu volūdys populariziešonu. Itūgod juos aktivisms eipaši izcalts, partū ka niu Ausma sajims Rēzeknis nūvoda pošvaļdeibys atzineibys rokstu nominacejā “Sabīdryskuo aktivitate” par nūvoda vuorda populariziešonu medejūs, daleibu Leņdžu pogosta dzeivuotouju konsultativajā padūmē, kai ari latvīšu i latgalīšu volūdys vuiceišonu Rēzeknis nūvoda i ukrainu biegļu bārnu nūmetnēs.

Sasatikt ar saimi

Niu prīškā ir treis vaļsts svātku dīnys, kas vairumam byus ari breivdīnys. Partū aicynoju sevkuru izmontuot itū šaļti, kab sasatiktu ar sovejim. Latvejis dzimšonys dīna ir svātki mums vysim i tūs nūteikti juopavoda sūpluok meilajim.

Pīsavīnuot Latvejis sorgim

Īsastuot i aktivi pīsadaleit Zemissardzē i cytuos leidzeiga veida institucejuos, kai ari lapnuotīs ar tim, kas jau tī ir! Myusu – Kozulu – saimē ir vairuoki zemissorgi, karaveiri i policisti, sovpus Spruktu saimē ir rūbežsorgi. Aicynoju ar kotru dūmu, dorbu i īceri byut eistynim Latvejis sorgim!

Baudeit svātkus

Apmeklēt vaļsts svātku pasuocīņus sovā kūpīnā – voi tys ir skriejīņs Rēzeknis piļsātā, voi atzineibys rokstu padūšona kaidā nu apleicejūs pogostu, voi balle Leņdžūs! Izbaudeit nu sirds svātku programu i byut kluotyn asūšim.