Rokstu sagataveja: portals lakuga.lv

2023. gods 17. oktobrī Namaterialuo kulturys montuojuma padūmis sēdē pījimts lāmums par četru jaunu vierteibu īkļaušonu Nacionalajā namaterialuo kulturys montuojuma (NKM) sarokstā, informej Latvejis Nacionaluo kulturys centra puorstuove Linda Ertmane. Vīna nu itūs vierteibu ir celu jūsteņu ausšonys tradiceja Zīmeļlatgolā, kū pīsacejuse bīdreiba “Upītes jauniešu folkloras kopa”.

Celu jūsteņu ausšonys tradiceja ir vīns nu senejuokūs jūstu ausšonys veidu, kas zynoms vysā Latvejā, bet eipaši izplateits Latgolā. Vēļ NKM sarokstā tykuse Pībolgys kulturtelpa, Bārtys kulturtelpa, kai ari nacionala mārūga tradiceja – sieņu laseišona i izmontuošona, kas teik kūpta vysā Latvejis teritorejā i saisteita kai ar zynuošonom par dobu, tai kulinarajom i cytom prasmem. Pīboldzāni izcalti kai byutyski latvīši nacionaluos identitatis nesieji sovā sovpateibā, kas veiduojusēs, sasavynūt senejom prasmem, dzeivistelpys specifikai i narymstūšajai vajadzeibai piec izgleiteibys zynuošonu, sovpus Bārtys kulturtelpa kūpā ar sābru – Nīcys i Rucovys – kulturtelpom ir nūzeimeiga kulturviesturiska vīta Latvejā, kur teik saglobuotys, vys vēļ dzeivys uzturātys i ari atjaunuotys senejuos tradicejis.

Latvejis Nacionaluo kulturys centra Namaterialuo kulturys montuojuma eksperte Gita Lancere stuosta: “NKM padūme, izviertejūt da 2023. gods 5. juņa īsyuteitūs dasacejumus, nu vīnpadsmit atlaseja deveņus, kurūs īsnīdziejim ar ekspertu paleidzeibu tyka dūta vareiba sovus dasacejumus papyldynuot i precizēt, i gols golā da īkļaušonys Nacionalajā sarokstā tykušys ituos četrys namaterialuo kulturys montuojuma vierteibys, kas ir kai šauruokā kūpīnā, tai vysā Latvejā zynomys i ryupeigai kūptys.”

Svineiguo ceremoneja, kurā tiks padūti aplīcynuojumi par vierteibu īkļaušonu Nacionalajā namaterialuo kulturys montuojuma sarokstā, nūtiks 25. novembrī Jāzepa Vītuola Latvejis Muzykys akademejā. Aplīcynuojumu padūšonys ceremoneju byus vareiba vērtīs tīšraidē Latvejis Nacionaluo kulturys centra sātyslopā www.lnkc.gov.lv, kai ari Facebook lopā.

Nuokušuo dasacejumu īsnīgšona tiks izsludynuota 2024. gods janvarī i tūs sagataveišonai tiks dūts pusgods laika.