Rokstu sagataveja: Edeite Laime, portals lakuga.lv

20. novembrī Reigā i dīnu pyrma tuo, 19. novembrī, Ludzys nūvoda Malnovā nūtyka jaunuo latgalīšu seriala “Fati 2” pyrmizruodis komandai i atbaļsteituojim. Nu 23. novembra, kod paradzāta publiskuo pyrmizruode Rēzeknē, Latgolys viestnīceibā GORS, serials publiski byus nūsaverams kinuteatrūs vysā Latvejā, kas byus taida trešuo reize, kod kaids kinu dorbs latgaliski pasaruoda iz lelūs ekranu tik plotā mārūgā.

“Fati 2” golvonī varūni ir školuotuoji Pīters i Vitaļs, kuri vosorys atvalinuojumā nūlem braukt iz laukim pi rodu Buozovā, nalelā Latgolys cīmā pošā pīrūbežā. Jūs plānūs ir nūpeiļneit kluotyn naudu, struodojūt mežā. Puiši iz dzeivi teik īlikti cīmā pazeistamuo, tok jau myužeibā nūguojušuo bitinīka Modesta sātā. Baudeit vosorys atvalinuojumu īsarūn ari Pītera sīva Anna. Vysus treis īraun nasaprūtamu i mistisku nūtikšonu viertinē, kas vysā satrycynoj ari vītejūs dzeivuotuoju kasdīnu.

Seriala-filmys rodūšū komandu veidoj golvonūs lūmu akteri Māris Kristīne Veinšteina, Ritvars Gailums i Juoņs Krūņs, režisors i scenareja leidzautors Edvards Mikāls, scenareja autors Valentins Lukaševičs, operators Raivo Freimanis. Seriala producenti ir bīdreiba “Latgolys Producentu Grupa”, SIA “Tet”, Latvijas Televīzija i Pīters Ragaušs.

Iz seriala pyrmizruodi Reigā, “Kino māja”, beja sasapuļciejuši kai “Fati 2” treis golvonūs lūmu tāluotuoji, Daugovpiļs teatra akteri Kristīne Veinšteina, Ritvars Gailums i Māris Korsiets, tai epizodiskūs lūmu akteri, seriala tehniskuos komandys puorstuovi, ari “Fati 2” atbaļsteituoji, leidzjutieji i sadarbeibys partneri. Taišni pyrma goda ite nūtyka seriala pyrmuos dalis pyrmizruode i daudzim nu kluotyn asūšūs par reizi beja vareiba saleidzynuot obejis seriala sezonys.

Seriala producents i atbaļsteituojs Pīters Ragaušs soka, ka seriala pyrmuos sezonys stuosts beja vīnkuoršuoks, par reizi saprūtams, bet ūtruo sezona ir sarežgeituoka i, koč jis pats serialu ir nūsaviers jau vairuok reižu, vys tik kotru reizi jam ir kaids puorsteigums i koč kuo jauna pamaneišona. “Maņ ruodīs, ka itūreiz tei ir cyta veida filma ari emocionali. Voi byus “Fati 3”, itūšaļt cikom ir lels i naskaidrys vaicuojums – tys jau byus atkareigs nu skateituoju. Pošim prīca, ka “Fati 2” byus trešais dorbs latgaliski piec “Cilvēka bērna” i “Piļsāta pi upis”, kū varēs nūsavērt iz lelūs ekranu vysā Latvejā – ka skateituojim patiks, tod varēs dūmuot. Taipat ūtrys lelais vaicuojums byus, voi itei komanda, akteri byus gotovi turpynuot, jo, lai sataiseitu taidu filmu, vajadzeigi vysmoz seši mieneši. Ka vaicoj maņ, tod es asu gotovs i “Fatu” trešajai, catūrtajai i vēļ tuoļuokom sezonom!” sovu redzīni atkluoj Pīters Ragaušs.

“Fatu” idejis autors, vierzeituojs i producents Arņs Slobožanins īprīšk publiski paude, ka leidza ar seriala pyrmū sezonu juo mierkis beja latgaliskajā vaira paruodeit i izceļt ari Daugovpili, Dīnavydlatgolu, tok itūreiz seriala nūtikšonys i fiļmiešona nūtyka Kuorsovā i apleiciejūs cīmūs. Arņs soka: “Ar “Fati 2” saprotu, ka vys tik Kuorsova ir Zīmeļlatgola. Maņ varbyut beja ilūzejis, ka tai nav, tok tī ir zīmeli! Itūreiz vīns nu munu mierku beja sataiseit pylnvierteigu filmu sovā dzymtajā pusē. Buozova, Malnova, Saļņova, Kuorsova principā ir vītys, kur es ari izaugu. Nu vysu nadorbu, kū es sovulaik asu tī darejs, nazkas ir juodzeš, i varbyut itys ir tys veids.” Arņs atkluoj, ka itūreiz ar fiļmiešonu apzynuoti vaira ir īts iz filmys formatu, lai tū varātu paruodeit ari kinuteatrūs vysā Latvejā kai pylnvierteigu filmu. “Pyrmuo sezona beidzēs ar veiksmeigu latgalīšu uzvaru par Reigys mafeju, tyka atdūti Vitaļa poruodi, školneica Marta nūbrauce iz Reigu, kai tū beja gribiejuse, bet golvonī varūni piec školys goda brauc atsapyust i nūpeļneit kaidu līku eiro. Sasaiste ar pyrmū sezonu ir, tok rūkroksts ūtrajai ir jau cyts, kas beja atkareigs vaira nu režisora. Ūtrei sezona ir piļneigi sovaiduoka! Piec pyrmuos sezonys atsauksmu asam vaira pīstruoduojuši pi latgalīšu volūdys, kas palykuse lobuoka, koč ari taipat vēļ byutu pi kuo struoduot. Ir tī stereotipi par Latgolu: šmakovka, dzāruoji, bazneica, kauteni i itamā filmā vyss tys ari byus! Šmakovkys byus daudz, cīši daudz i pat vēļ vaira nakai var īsadūmuot, tok tei šmakovkys burka, kuru redzim ari iz banera, ari nav cik vīnnūzeimeiga – suokumā smejīs, tok piec filmys daudzi dūmuos, kas tys beja? Varbyut tei ir tei vacuo Latgola, kas ir pamatuse montuojumu. Mes drupeit filmā paironiziejom ari par vysaidom varom, kas ir Latvejā – par politikim, par izpyldvaru, par tīsu varu, deputatim, par naudu. Tok golvonuo dūma ir, ka sovu reizi varbyut i vajag kūpā īdzert, tok tys nav juosaprūt tai burtiski, tys var byut i gareigā leiminī,” ūtruos sezonys stuosti i atškireibys nu pyrmuos īzeimoj Arņs Slobožanins. Arņs taipat kai Pīters Ragaušs portalam lakuga.lv soka, ka tuoļuokais filmys liktiņs byus atkareigs nu skateituoju.

Pi seriala “Fati 2” kai režisors struoduoja Edvards Mikāls, kas pats vaira dorbojās kai montažys režisors i serials jam ir pyrmais taida leimiņa projekts kai kinu režisoram, kas kai profeseja izstudāta Latvejis Kulturys akademejā. Jis pats īt nu Kūrzemis pusis, Saldus, i, cik zynūt, rodu Latgolā naasūt. Pyrma tuo Latgolā bejs viņ ekskursejuos, bet bierneibā prīškstotu par latgalīšu volūdu davušys ari Guntix taisuoteis kinys, kas sovulaik bejs sova veida fenomens. “Maņ ruodīs, ka lela daļa nu dvēselis, kas ir “Fatim”, īt taišni nu volūdys, runys ritma, vuordim, izteicīnim, raksturim, kai ari tys, cik daudzi seriala veiduošonā īsaisteiti vītejī ļauds, jūs atbolsts, cytur nabyutu īspiejams. Tok filmys stuosta linejis ir taidys, kas byus atpazeistamys naviņ Latgolā i latgalīšim, tok ari sevkuram, jo eipaši tim, kuri īt nu kaidys mozys vītys, kod vīns napareizs sūļs var golā sasaveļt kai taida nūtikšonu snīga bumba,” soka seriala režisors, kurs ir prīceigs par vareibu pīsadaleit itymā projektā i nūsasmej, ka niu gaideis jaunus pīduovuojums. “Gribiešona paruodeit sevi, ka mums ir kū saceit, ka te ir koč kas interesants, kas nanūteik cytā Latvejis voi pat Eiropys daļā ir tys, kū cīši nūvierteju. Latgalīšim ir tys spors. Ka byus tys, tod jau i atsarass ļauds, kas zynuos, paleidzēs. Piec ituos pīredzis vysu vaira latgalīšūs apbreinoju gribiešonu dareit, kas nav vīgli i ir cīši daudzi škieršļu,” nūsoka Edvards Mikāls, kuram seriala-filmys vieršonuos Reigā pošam ir pyrmuo reize, kod nūsaver vysu dorbu gola variantā. Piec nūsavieršonys jis atkluoj, ka vēļ ir puora lītu, kurys pyrma izruodeišonys kinuteatrūs, varātu pīluobuot. “Ir tuos mozuos lītys, tok raugu izbaudeit sajiutu, ka dorbs ir gotovs!” soka Edvards. Tok taipat atkluoj, ka dorbs ari itū nasabeidz, jo tys ir gotovs filmys variantam ruodeišonai kinuteatrūs, bet niu prīškā tehniskuo sadaleišona serejuos, lai “Fati 2” byutu daīmams ari televizejis skateituojim nu 7. decembra izklaidis platformā “Tet+” i piečuok jaunā godā ari Latvejis Televizejā.

Vīna nu golvonūs lūmu tāluotuoju ari seriala ūtrajā sezonā ir Daugovpiļs teatra aktrise Kristīne Veinšteina. Kristīne “Fati” pyrmajā daļā beja naviņ aktrise, tok īsaisteita kai pi scenareja, tai pošu fiļmiešonys dorbu, bet ūtrajā daļā varēja izbaudeit fiļmiešonys procesu tik kai aktrise. “Dorbs ar seriala ūtruos dalis režisoru Edvardu Mikālu beja piļneigi cytaiž i ruodīs, ka ir cīši labi, ka saguojuši diveji vysā dažaidi dorbi. Prīcojūs, ka lītys dzeivoj, atsateista i īt iz prīšku, napalīk viņ tymā īprīškejā vacajā,” soka Kristīne. Aktrisis runuotī teksti filmā izacēle ar eipašu dzeiveigumu i izteicīņu boguoteibu. Kristīne stuosta, ka taida beja vīnuošonuos ar režisoru, ka jis ļuovs ari pošai improvizēt, dalikt, ka īdareigi, koč kū nu seve. “Asu daudzi kuo tulkuojuse iz latgalīšu volūdu, vārusēs, i tys vyss tai palics vydā. Maņ ir pīraksteiti vysaidi suleigi teicīni i niu varēju attaiseit, apsavērt, ka itys voi cyts varātu īsaderēt,” sovu volūdys boguotynuošonys metodi atkluoj aktrise, kura kai Anna ari iz prīšku byutu gotova ļautīs jaunim pīdzeivuojumim ar Vitali i Pīteri. “Es grybātu, ka byutu vēļ kaida daļa, kas ir saisteita ar svātkim. Nu, par pīmāru, Zīmyssvātki voi Juoni, koč kas taids! Kai jau i suokumā saceja, ka na cik daudzi izsverūt šmakovku, bet vaira par latgalīšu labesteibu, dzeiveigumu, spāku i energeju, kas jimūs ir,” soka Kristīne. Vaicuota, kaida jai ir sajiuta par situaceju ap latgalīšu volūdu i voi “Fatu” pyrmuo daļa, kai tys beja grybāts, ir dagrīzuse vaira viereibys latgaliskajam ari Daugovpilī, Kristīne soka, ka nav gona viņ ar tū, ka latgalīšu volūda byutu školuos voi tamā runuotu mīstā. “Vajag, lai latgalīšu volūda ir ari televizejā, skaņ radejā. Parkū koč vīnu reizi nedeļā navarātu byut viests latgaliski? Lai ļauds verās i dzierd. Daugovpilī ari daudzi runoj latgaliski, cylvāki vaira nasakautrej,” sprīž aktrise.

Reigys pyrmizruodē kluotyn beja ari “Tet” TV i izklaidis pakolpuojumu dalis direktore Inga Alika-Stroda, kura poša īt nu Leivuona. Inga soka, ka jim kai platformai ir svareiga satura daudzveideiba: “Pyrmū reizi, izdzieržūt par itū projektu, ruodejuos drūsmeigs eksperiments i gribiejom apsavērt, kaida byus atsauceiba skateituoju vydā i vars saceit, ka goda suokuos itys beja vīns nu vysu vaira nūsavārtūs serialu i asam cīši gondareiti par itaidu sadarbeibu. Ūtrū sezonu jau pamatā nūsaceja skateituojs, leidza ar tū serialu “Fati” var saukt par veiksmis stuostu i vielejam kai trešū, tai i catūrtū sezonu!” TV i izklaidis pakolpuojumu dalis direktore atzeist, ka vītejī stuosti vysā pīduovuojumā ir cīši svareigi i tū var redzēt ari piec vieršonuos ruodeituoju, ka topa augšgolā ir vītejī produkti – seriali, filmys, bārnu raidejumi –, deļtuo paruodeit ari Latvejis byušonu vysaidai asūt svareigi. “Mes asam cīši atvārti jaunom idejom, i “Fati” ir pīruodejums, ka tys nūstruodoj. Pyrmuo sereja voi pyrmuo sezona nareši var byut viņ kai marketinga veiksme, tok, ka teik da ūtruos, tys jau ari ir kvalitatis ruodeituojs. Ituo seriala gadīnī nav tai, ka skateituoji ir viņ nu Latgolys, dorbu verās vysā Latvejā. Saprūtams, ka redzīni par serialu ir vysaidi, vīnaldzeigūs nav, bet taišni tū i vajag – stuostus, par kurim runuot,” stuosta Inga Alika-Stroda.

Kai “Fatu” pyrmuos sezonys sereju pyrmizruodē, tai i niu pasuokumā kluotyn beja režisors Viesturs Kairišs. Jis soka, ka interesanti ir apsavērt, kai idejis turpynojās. “Pyrmais gods vysod ir puorsteigums, styla spruodzīņs, kurā kūpā ir vysa kas, sova energeja. Tuoļuok, kod suoc jau tū profesionalizēt, tī jau ir gryušuoki aizdavumi – kai īt iz prīšku, voi tū vyspuor dareit. Klasika ir, ka ūtruos sezonys saīt švakuokys. Gryuši ir atkuortuot panuokumus, vysod juomeklej jauni celi. Nu sovys pusis varu saceit, ka skaidrys, ka ūtruos dalis scenarejs ir sovaiduoks. Pīļaunu, ka skateituojim patiks pat vaira, jo tys ir īvītuots lauku lokacejā, skaidruokys situacejis, humors varbyut nav tik uorpruoteigs kai beja seriala pyrmajā daļā, mīreiguoks, drupeit vaira pi zemis. Maņ ruodīs, ka pamata sižeta lineja byutu juotaisa daudzi branguoka i tod jau var vysu tū apleik taiseit. Te raudzeits savīnuot daudzi žanru, kas stilistiski ir cīši gryuts aizdavums. Radzu, ka itys ir ceļš iz koč kū jaunu, kū varātu atteisteit vēļ, ceru, ka piec goda otkon sasatiksim. Tok juopadūmoj, kai saglobuot tū humora izjiutu, dzeivis izjiutu i nataiseit māranu cylvāku humoru. Nu struodoj taipat!” seriala ūtrajā sezonā radzātū viertej režisors, atzeistūt, ka dorbs tehniski ir profesionals, var just, ka daudzi vaira dūmuots par volūdu, lobi tipaži i akteru atlase. Jam pošam vysu vaira patics Kristīnis Veinšteinys Annys tāls, kū īsaceitu iz prīšku pat vaira izceļt. Kairišs smejūtīs nūsoka, ka asūt jau īsacejs seriala komandai taiseit “Fati Ma”, kod vodūšū lūmu uzajem sīvīte. “Es prīcojūs par serialu “Fati”! Jau pārņ prīcuojūs i eisti nasaprotu tūs, kas “gauduoja”, jo maņ ruodīs izadevs dorbs,” soka Viesturs Kairišs.

Ari seriala ūtrajā sezonā Vitaļa lūmā īsajuta Daugovpiļs teatra akters i režisors Māris Korsiets. Jis soka, ka ūtrajā daļā Vitaļs beja sovaiduoks nakai pyrmajā, ari pi latgalīšu volūdys raudzejs vaira struoduot, jo pa dzimšonai pats ir nu Sielejis i latgalīšu volūdu vuicejīs. “Latgalīšu volūda maņ ir svareiga. Es tū īsavuiceju, atbraucūt iz Daugovpili, niu vosoruos, dzeivojūt Leiksnā, varu styprynuot,” stuosta Māris, kurs ari pīzeist, ka Dīnavydlatgola i Zīmeļlatgola cīši atsaškir ari taišni volūdys ziņā. Akters soka, ka jam patyka tys latgaliskums, kū jī spēlēja serialā, koč ari atzeist, ka kotram režisoram bejs sovs pīguojīņs. “Golvonais, kū gribīs saceit, ka latgalīši nav dzāruoji! Jī vysaiži rauga izagrūzeit i dareit, bet nav dzāruoji,” styngrys ir Vitaļa lūmys tāluotuojs Māris Korsiets, kurs pats ari kai režisors Daugovpiļs teatrī ir īstudiejs dorbus latgaliski. Māris stuosta, ka niu ari ar kolegim asūt Daugovpilī sataisejuši ansambli, kas dzīd nu latvīšu literaruos volūdys latgaliski puorliktys dzīsmis. Iz vaicuojumu, ka ļautu sepiniešonai bez rūbežu, kai Mārim ruodīs, kas varātu byut Vitaļa pīdzeivuojumi trešajā sezonā, akters nūsmej, ka cigaretis beja, alkohols beja i iz prīšku Vitaļs varātu attaiseit bordeli.

Nasaverūt iz tū, ka šmakovkys vuords seriala “Fati” ūtrajā sezonā skaņ vysu bīžuok, šmakovkys dadzynuotovys “Latgolys šmakovka” Malnovā saiminīks i vīns nu seriala epizodiskūs lūmu tāluotuoju Juoņs Krivtežs soka, ka iz cīši lelu biznesa pīaugumu nacer, jo Latveja vys tik nav ASV voi cytys vaļsts, kur kinu ītekme byutu tik lela. “Pošam ruodīs, ka nūtāluoju labi!” nūsmej Juoņs. “Beju dūmuojs, ka iz ekrana varēs redzēt ari vysys munys īškejuos sajiutys i bailis, tok golā izaver labi, deļtuo aicynoju vysus pošus īt i dareit, jo, kod tu dori, tys izaver lobuok nakai, kod siedi i nu molys vāroj,” soka Juoņs Krivtežs. Tok Juoņs nav viņ epizodiskuos lūmys tāluotuojs i fiļmiešonys paleigs, bet vīns nu seriala kai taida idejis autoru, kura sovulaik izstuosteituo informaceja par kaida cyta gadīni nu dzeivis, ir “Fatu” pyrmuos dalis sižeta pamatā. “Suokuos raudzejom globuot, kas ir tuos idejis autors, informacejis “nūpludynuotuojs”, tok tys niu publiski ir izskaniejs. Ari ūtrajai sezonai, siežūt ar Arni nazkur iz sūla voi piertī, sprīdem par pamata ideju i tai tys aizguoja. Suocem meklēt īspiejis i resursus, kai tū dabuot gotovu, kab tiktu da lelūs ekranu vysā Latvejā. Ka pyrmuos sezonys stuosta pamatā beja gadīni nu dzeivis, ūtruos sezonys stuostu raiseja kaidys klauseituojis zvons Latvejis Radejai, kura pīzvaneja iz eteru i beja naizpratnē, kas tei par taidu filmu par Latgolu? Jei beja gaidejuse kaidus “Likteņa līdumniekus” voi cytu muokslinīcysku stuostu, tok golā bejs nazkais trešs. Ka jau tys beja trešs, tod ar Arni dūmuojom, ka vajag sataiseit koč kaidu šausmu filmu voi vēļ nazkū brīsmeiguoku tai, lai pavysam “salyuzt pruots”, lai ir vaicuojumi: “Kas te nūteik?”. Gribiejom šausmu filmu, bet saguoja vaira mistereja, detektivs” suosta Juoņs. Jis sprīž, ka šmakovkys vuords turpynuos skanēt – loba voi švaka reklama Latgolai tys asūt juosprīž kotram pošam –, tok ari švaka reklama asūt loba.

Jau catūrtdiņ, 23. novembrī, “FATI 2” publiskuo pyrmizruode byus Rēzeknē, Latgolys viestnīceibā GORS. Piec tuos “Fati 2” kinys verseja par reizi byus nūsaverama kinuteatrūs “Forum Cinemas”, “Cinamom Alfa”, “Apollo Kino” Reigā, “Kino Cinamon Balle” Līpuojā i kinupunktūs vysā Latvejā. Nu 7. decembra “Fati 2” kai serials byus daīmams “Tet+” straumiešonys servisā i jau 2024. godā ari Latvejis Televizejis eterā. 

Fotogalerejā: “Fati 2” pyrmizruode Reigā, foto Edeite Laime/portals lakuga.lv