Rokstu sagataveja: portals lakuga.lv

“Tradiceju sāta” ir vīta Daugovpilī, kur kasdīnā teik pīvārsta eipaša viereiba tradicionalom vierteibom, tymā vydā senejūs omotu prasmem, latgalīšu volūdai, tradicionalajai kulinarejai, daņčim, dzīsmem i cytom ar tū saisteitom aktivitatem. Aizvadeitajā nedeļā Tradiceju sātā ar latgalīšu rokstu volūdys nūdarbeibu gasteja ari portala lakuga.lv redakcejis puorstuovis, deļtuo itūnedeļ ar sovim īsacejumim aicynojam pasadaleit Tradiceju sātys meistari Baibu Pankjāni. Vaira par Tradiceju sātu var izzynuot portala stuostā ITE.

Dobys smuords spiļvinteņūs i svecēs

Ļauds soka – kai dīnu īsuoksi, tai ari nūdzeivuosi, deļtuo aicynoju vysu itū nedeļu suokt skaisti, mīreigi, dabuot drupeit mīra pyrma svātku skriejīņa, izbaudeit atmosferu i sirsneigu kūpā byušonu ituos nedelis Vīneibys noma Tradiceju sātys meistarklasēs. Nedeļu pyrmūdīnē, 27. novembrī, suoksim ar meistaris Dzintrys Abaronis vaideitū meistarklasi, kurā taiseisim augu smuordu spiļvinteņus. Bet nedeļu nūslēgsim 1. decembrī ar Dzintrys meistarklasi, kurā vuiceisimēs voska sveču taiseišonu ar augim, taisūt sveicis eipašā tehniskā. Vokorūs, kod gribīs aizdegt sveceiti, izbaudeit nastrāpuošonu, mīreigu nūskaņu maņ pošai vysu lobuok pateik dadzynuot voska svecis, kas ir dabyskys i voskam ari ir cīši pateikams smuords. Meistarklasem īprīšk juodasasoka, zvonūt 26377313.

Vide apleik pošim

Maņ ruodīs, ka vidi i vītu sev apleik mes veidojam kotrys pats, deļtuo grybu aicynuot īdzeivuotuojus aktivuok īsasaisteit kūpīnu taiseituos nūtikšonuos. Ka ite ir vēļ kaids, kuram ryup vide i apleik nūteikūšais, tod 1. decembrī aicynoju iz bīdreibys “Cita Daugavpils” seminaru “Kultūra apkaimēs un neatklātās apkaimju kultūrvietas”, kas byus 1. decembrī Daugovpilī, Vīneibys noma Mozajā zālē.

Svātku gaideišonys laiks

Kod nūsvieteiti vaļsts svātki, maņ suocās Zīmyssvātku gaideišonys laiks. Tei naatkuortojama sajiuta, kū pīdzeivoju, gatavejūtīs svātkim, maņ ir eipaša. 3. decembrī, kod kristīšim īsastuoj Adventa laiks, divejuos stuņdēs piec pušdīņu Vīneibys noma Tradiceju sātā byus kaida cīši gorda meistarklase, kurā kūpā ar sātā ražuotuoju Mārīti Kronbergu nūskaidruosim, kai taiseit piparkūku meikli, kai ari varēs izzynuot, kai capumus piečuok dekorēt. Tycu, ka Mārīti izstuosteis sev zynomūs meistara nūslāpumus, lai mums piečuok kotram sāta Zīmyssvātkūs smuorduotu piec gorduokūs piparkūku!