Rokstu sagataveja: portals lakuga.lv

Latgolys Turysma asociaceja jau ostoitū godu piec kuortys organizej Latgolys Turysma goda bolvu. Tuos mierkis ir veicynuot Latgolys turysma pīduovuojuma i kvalitatis uzalobuošonu, taipoš ari izceļt i apbolvuot Latgolys regiona (tuo vydā ari kulturviesturiskuos zemis) lobuokūs turysma nūzaris puorstuovus. Itūgod bolvys tyka padūta deveņuos dažaiduos nominacejuos, viestej Latgolys Turysma asociaceja.

Turysma goda bolvu pretendentu dasaceišona ļaun izceļt tuos turysma vītys i puorstuovus, kuri sovā pakolpuojumā voi produktā ir īvīsuši inovacejis, byutyskai papyldynuojuši asūšū pīduovuojumu voi vīnkuorši atstuojuši vyslobuokū pozitivū īspaidu. Dasaceit pretendentus tyka aicynuoti kai uzjiemieji, tai privatpersonys, turysma centri, NVO i cyti. Kasgadeji Latgolys turysma bolvu dizainu veidoj kaids cyts amatnīks, sovā dorbā saglobojūt i īkļaunūt Latgolys turisma zeimyna logo. Itūreiz turysma bolvu autore ir Sintija Bērziņa i zeimyns “Piece of touch” nu Preiļu nūvoda.

Latgolys Turysma asociaceja pastreipoj, ka itūgod nominaceju skaits ir palelynuots – kūpā 9 dažaidys nominacejis. Skaita palelynuojums saistoms ar napīcīšameibu atseviškuos nominacejuos nūdaleit pošvaļdeibu i privatū sektoru. Taipoš ari iz prīšku teik plānuots saglobuot itaidu dalejumu. Itūgod Latgolys Turysma goda bolvai tyka sajimti 49 pretendentu dasacejumi nu vysa Latgolys regiona.

Vysus pretendentus viertēja kompetenta žureja, kurys sastuovā itūgod beja: Latvejis Investiceju i atteisteibys agenturys Turysma departamenta vacuokuo projektu vadeituoja Kristīne Mickāne, “Divu krastu radio” i “Latvijas radio 2” raidejuma “Breivdīnuos iz Latgolu” vadeituoja Laura Sondore, dobys turysma entuziasts i “Purva bridēju” gids Kristaps Kiziks, Latgolys Turysma goda bolvys 2022 sajiemieja, Augšdaugovys nūvoda Lelbornis muižys saimineica Nuora Poiša i Latgolys Turysma asociacejis turysma specialiste Laura Spundere.

Itūgod Latgolys Turysma goda bolvys sajiemieji ir:

1. Turysma profesionaļs – Miropija Petkune, gide Pyrmuo pasauļa kara muzejā Augšdaugovys nūvodā;
2. Lobuokuo turystu mītne piļsātā – glempings “Million Star hotel” Viļakā, Bolvu nūvodā;
3. Lobuokuo turystu mītne laukūs – gostu sāta “Svilpaunieki” Rēzeknis nūvodā;
4. Lobuokais turysma objekts (individualūs komersantu vydā) – “Latgolys šmakovka Malnovā” Ludzys nūvodā;
5. Lobuokais turysma objekts (pošvaļdeibu vydā) – Jaundūmis muiža i Vidis izgleiteibys centrs Kruoslovys nūvodā;
6. Lobuokais jaunais turysma objekts (pošvaļdeibu vydā) – Daugovpiļs Tehnikys i industrialuo dizaina centrs “Inžineru arsenals”;
7. Lobuokais jaunais turysma objekts (individualūs komersantu vydā) – apsavieršonys saimisteiba “Griķu rezidence” Rēzeknis nūvodā;
8. Goda amatnīks – zeimyns “Jašas podi” i keramike Kristīne Nicmane Preiļu nūvodā.

Sovpus nominacejā “Turysma izcileiba 2023” itūgod dasaceiti diveji pretendenti – Rotko muzejs Daugovpilī i Lūznovys muiža Rēzeknis nūvodā. Žureja obejim pretendentim īdeve maksimalū punktu skaitu i topa skaidrs, ka izavielēt lobuokū storp itom divejom turysma i kulturvītom ir naīspiejami, partū ka tū pīnasums regiona atpazeistameibys veicynuošonā i kulturys pīduovuojuma dažaiduošonā ir vīnleidzeigs i naizmāruojami nūzeimeigs. Deļtam nominaceju “Turysma izcileiba 2023” itūgod sajēme diveji Latgolys regiona turysma puorstuovi – Rotko muzejs Daugovpilī i Lūznovys muiža Rēzeknis nūvodā.