Rokstu sagataveja: portals lakuga.lv

Janvara suokumā izīs literaturzynuotnīka i rakstnīka Valentina Lukaševiča gruomota “Dīnvydlatgolys stuosti”, informej izdevieju puorstuovi. 39 stuostūs autors īpazeistynuos ar Latgolys dīnavydu daļu, vaicojūt – voi var dzeivuot bez vītys i voi vīta ir ari tod, kod nivīns tī nadzeivoj?

Stuosti saraksteiti laikā nu 2016. da 2023. goda i periodiski tykuši publicāti žurnalā “A12” i laikrokstā “Latgales Laiks”. Valentins Lukaševičs izceļ mozuoku i leluoku Latgolys vītu cylvākus, geografiskūs objektus, nūtykumus i liktiņus, kas ir leidza svareigi vysa nūvoda kulturviesturis ainovā, partū ka kūpeiguo viesture i socialuo atmiņa ir tys, kas styprynoj i apvīnoj. Tī nav klasiski, viņ faktūs i dokumentūs baļsteiti nūvodpietnīciski aproksti. Autors napagaisynoj ari sovu “es” – poša redzīni i sajiutys par nūteikūšū voi radzātū. Jau gruomotys pyrmajūs stuostūs mes varim skaiteit, kai jis atsazeist mīlesteibā Dagdys paugurainei, Ondrupinis izlūksnei i saullāktim viers Daugovys Koškovcūs.

Latgalīšu literaturys raidīrokstā “Puslopys” sovulaik par Valentinu Lukaševiču saceits tai: “Ar Valentina Lukaševiča stuostim kūpā var brist leluokus i mozuokus Latgolys ceļus”. Itūreiz autors 39 stuostūs “izstaigoj” Latgolys dīnavydu dalis apdzeivuotuos vītys nu Nauļānu da Madalenis, papyldynojūt tekstu ar boguoteigom ilustracejom – viesturiskim foto, dokumentim, kartem, portretim i ainovom.

Gruomotys redaktore ir Ilze Sperga, muokslineica – Inese Dundure, izdeviejs – SIA “Cymuss”.

Gruomotys izdūšonu atbaļstejuse Vaļsts kulturkapitala fonda mierkprograma “Latvīšu viesturiskūs zemu atteisteibys programa” i bīdreiba “Latgolys regiona atteisteibys agentura”.