Rokstu sagataveja: portals lakuga.lv

Goda nūgale atguojuse ar prīceigom viestim par jaunom golda spēlem latgaliski, kurys kai reize var nūderēt svātku laikam ar draugim i rodim. Rēzeknis nūvoda Maltys pogostu puorvaļde eistynuojuse projektu, sataisūt golda kaitu “Latgalīšu Re-Mi-Do” aba “Redzi, mini, dori”, sovpus latgaliskuo plānuotuoja “Giut breidi” komanda pīduovoj jaunu produktu – golda kaitu “A kas ite?”.

Golda kaita “Latgalīšu Re-Mi-Do”

“Re-Mi-Do” ir izgleitojūša golda spēle, kura sastuov nu 60 latgalīšu rokstu volūdys vuordu i 50 zeimiejumu, kuru autoris ir septenis rodūšys mārgys, kurys apmeklej Maltys Bārnu i jaunīšu centra puļceņus (Egija Babre, Elizabete Utināne, Selīna Svikša, Una Pranča, Agate Barovska, Jūlija Razumejeva i Sintija Svikša). Interesanti, ka mārgom topā ir taidi vuordi kai: beseni, obrozs, ozbors, mārga, stuņdinīks, vuška. Kai pīzeist pošys golda kaitys autoris, tuos izveide ir ļuovuse jom rodūši izapaust, bejuse breivuoka izalaseišona zeimiešonā, kas atsaškir nu tuo, kas juodora školys stuņdēs.

Spēlis idejis autore i puļceņa “Volūdu detektivi” školuotuoja Skaidreite Svikša pastreipoj, ka bārnim ir cīši svareigi sajimt sova veikuma rezuļtatu taustomā veidā. “Pa munam, spēlei vierteibu dūd ari latgaliskuo vuorda tulkojums latvīšu, angļu i krīvu volūduos, tai byutiski paplašynojūt spālātuoju auditoreju i ļaun īpazeit latgalīšu volūdys unikalitati,” stuosta Skaidreite Svikša. Spēli var spielēt piec domino principa, meklejūt zeimiejumam atbylstūšu vuordu, taipoš spēlis vadeituojs dalinīkim var izdaleit zeimejuma kartenis, cikom pats vadeituojs sauc latgaliskūs vuordus nu vuordu karteņu. Uzvar tys, kurs pyrmais atmiņ vuordus, kas ir sadereigi ar zeimiejumim i palīk bez karteņu. Spēle tiks paduovynuota Rēzeknis nūvoda školu voi pogostu bibliotekom i nav paradzāta puordūšonai.

Golda kaita “A, kas ite?”

Latgaliskuo plānuotuoja “Giut breidi” komanda ir sataisejuse latgalīšu vuordu spēli vysim vacumim ļusteigai i izgleitojūšai laika pavadeišonai saimē, školā voi draugu lūkā. Spēle sastuov nu 100 kartu, kuruos ir apkūpuoti 600 dažaidi vuordi latgalīšu volūdā, tok paraleli ir nūdrūsynuots puorlykums ari latvyski. Spēli var izmontuot vysmoz treis veidūs: nu vuordu taiseit teikumus i stuostejumus, spēlēt “Māmū šovu latgaliski” i komanduos sasaceņst vuordu skaidruošonā. Jaunū golda kaitu var nūpierkt “Giut breidi” sātyslopā ITE. Kai soka spēlis veiduotuoji, tod “A, kas ite?” var byut breineiga duovona zam egleitis, amizanta izklaide svātku laikā, tok tuos leluokuo vierteiba ir spēlis izmontuošona ilgtermiņā – školuos voi interešu izgleiteibā, veicynojūt latgalīšu rokstu volūdys i pareizraksteibys vuiceišonūs.