Rokstu sagataveja: portals lakuga.lv

Latgalīšu kulturys ziņu portals jau viesteja, ka folklorys kūpa “Upīte” niu struodoj pi jauna albuma izdūšonys i 21. decembrī publicējuse ūtrū dzīsmi nu tuo. Dzīsmi “Kod īt iz balli” kūpa īsavuicejuse nu dzīduotuojis Līvijis Supis, i reizē ar tuos jaunū aranžeju skateituojim teik pīvuovuota dzīsmis video verseja, viestej folklorys kūpys atsyuteituo informaceja.

Dorbu pi jaunuo albuma pamudynuojs itūgod aizsuoktais dorbs – lauka pietejums, apzynojūt, īrokstūt i vuicūtīs Upītis kulturtelpā i apleicejā teritorejā kolhoza laikūs dzīduotuos dzīsmis. Daļa nu tūs teik atjaunuotys, dūdūt tom jaunu, myusdīneigu skaniejumu. Itūšaļt savuokts vaira nakai 100 dzīšmu i folklorys kūpys plāni ir, ka vysmoz 10 tiks atjaunuotys i īraksteitys myusu dīnu skaniejumā, tok vēļ vysmoz 30 tiks vīnkuorši kvalitativi īraksteitys, lai napagaistu. Albuma tapšonu atbolsta Vaļsts kulturkapitala fonds.

21. novembrī kūpa publicēja pyrmū dzīsmi “Kara laukā”, bet decembrī kai duovona svātku laikā teik pīduovuota dzīsme “Kod īt iz balli”. Dzīsmi kūpa īsavuicejuse nu Upītis etnografiskuo ansambļa dzīduotuojis Līvijis Supis, dzīsmis aranžeju padarejuši folklorys kūpys “Upīet” muzykanti i dzīduotuoji. Īroksts taiseits studejā “Bigmaar’s Records”, bet video verseju veiduojuse “Waltz Visual”, tymā nūfiļmāti doncuotuoji Alise i Kristiāns Keiši.

Da ituo folklorys kūpa “Upīte”, kas dybynuota 2002. godā iz Upītis bārnu folklorys kūpys pamata (kurei dorbojās jau nu 1980. gods), izdavuse četrus studejis albumus: “Vusi ļauds breinovuos”, “Dzīduot muoku, doncuot muoku”, “Ryugts” i “Padzīdam i…”.