Rokstu sagataveja: portals lakuga.lv

Decembrī Rēzeknē durovys atdarejs restorans “WeKnow”, kura paralelais nūsaukums latgaliski viestej “MesZynom”. Taipat ari restorana iedīņkarte ar gostim “runoj” latgaliski. Nedeļai storp svātkim aicynuojom restorana vadeituoju Inetu Lontoni īsaceit nazkū gordu vysom prīcom – vādara i ocu. Atsasaucūt aicynuojumam, Ineta soka: “MesZynom, ka vēļ daudzi kuo nazynim. MesZynom, ka gribim saglobuot sovys saimis kulinaruos tradicejis. MesZymom, ka mes varim. MesZynom, ka byus daudzi juostruodoj i juosavuica, lai rezultats byutu uzmaneibys vārts!”

Saimis receptu kladis

Decembra pyrmajā nedeļā mes attaisejom restorana durovys, lai plašuokai publikai pīduovuotu tūs iedīņus, kas īmeiļuoti myusu sātā. Saimis receptu pyrmsuokumi meklejami jau vaira nakai pyrma symta godu kaida muižinīka vyrtuvē, izbraukuojuši Sibireju, atsagrīzuši Latvejā i 80. godūs pa mozeišam īguoja ari munā receptu klasē. Pa itū laiku daudzi kas pasamainejs – produkti, garšys, bet receptu pamats i gatavuošonys tehnologejis ir saglobuotys nu munys babys Veronikys laiku. Īsoku kotram raudzeit saglobuot saimis receptis i pīraksteit kaidā kladē! Bet myusu saimis receptis drūsai aicynoju īt gostūs i paraudzeit restoranā “WeKnow”. Taipat aicynojam ari myusu gostus pasadaleit ar sovys bierneibys garšu stuostim, kas jū zyna – varbyut ar kaidu varēsim papyldynuot ari restorana pīduovuojumu!

Vītejī produkti

Iedīņu gatavuošonā mes izmontojam daudzi vītejūs produktu, kuri īt tepat nu Rēzeknis nūvoda. Garbuzs sovu vītu atrads nu “Joniku” sātys saimisteibys, vuškys gaļa nu saimisteibys “Rekļagols”, gordais smiļstieršku zapte i čajs nu “Saulainie dārzi”, bezglutena veganī produkti nu “SainVie”, kai ari iz vītys capam maizi nu zemnīku saimisteibys “Liepkalns” myltu. Myusu sapyns ir, ka kod nabejs varēsim struoduot viņ ar vītejuos izceļsmis produktim. Īsokom atbaļsteit sovejūs i, cik saīt, izmontuot iz vītys augušus, ražuotus i taiseitus produktus!

Latgalīšu iedīni svātkim i na viņ

Svātku nedeļā restoranā mes pīduovojam Zīmyssvātku putruomu dasys. Juosoka gūdeigi, ka cikom decembrī viņ, ka pasyuta aiz laika. Tok nu janvara mums byus daīmama plotuoka iedīņkarte ari latgaliski, kur bez myusu sātys receptu byus ari autentiski iedīni piec munys babys receptu. Tok cikom īsoku vēļ itymā svātku laikā paraudzeit atrast recepti i pagataveit kaidu latgalīšu iedīni – varbyut tei ir taišni putruomu dasa!