Rokstu sagataveja: portals lakuga.lv

2022. godā pūļu volūdā izguoja Vojceha Vidlaka i Radoslava Budziņska gruomota bārnim “Inflancki konik, czyli podróż z panem Gustawem”, kurys skaiteituojim ir vareiba ceļuot pa nazkodejū pūļu Inflantejis teritoreju kūpā ar muižinīku i Latgolys pietnīku Gustavu Manteifeli (1832-1916) i juo zyrgu. Pārņ gruomota izguoja ari latvīšu literarajā volūdā, i ir breivai daīmama elektroniski.

Latvyskajam izdavumam dūts nūsaukums “Jāšus cauri poļu Inflantijai jeb ceļojums kopā ar Gustavu Manteifelu”. Gruomota paradzāta apmāram 8-12 godus vacim bārnim. Kai pūliskū, tai latvyskū verseju izdevs Pūļu kulturys montuojuma uorzemēs nacionalais instituts “Polonika”. Gruomotys teksta autori ir Vojcehs Vidlaks i Radoslavs Budziņskis, ilustracejis radejušys Monika Dluska i Joanna Guravska, bet latvyski tū puortulkuojuse Zane Štāla.

Gruomota dūd vareibu apceļuot vysaiduokys myusu dīnu Latgolys vītys i īpazeit nūzeimeigys personeibys, kas tī nazkod dzeivuojušys, pīmāram, Stanislavu Kerbedzu, Janu Augustu Hilzenu, Kazimiru Buinicki, Celīnu Plāteri, Emīliju Plāteri, Marku Rotko i cytus. Par ceļā pīdzeivuotū teik stuosteits Gustava Manteifeļa bolsā, tok ospruoteigys pīzeimis izsoka ari juo zyrgs.

Gruomotu latviski var bez moksys puorskaiteit ITE, sovpus tuos pūļu volūdys variantu var nūpierkt ITE.

Gustavs Manteifels (1832–1916), byudams puorpūļuots vuocu muižinīks, sevi i sovu dorbu veļteja Latgolai i latgalīšu volūdys atteisteibai. G. Manteifels dorbuojīs kai viesturnīks, izdeviejs, etnografs, goreigūs dzīšmu melodeju autors i latgaliskūs kalendaru tradicejis īdybynuotuojs, folklorys apkūpuotuojs, interesiejīs par tautys tradicejom, muokslu, literaturu i volūdnīceibu. Nūsadorbuojs ari ar gruomotu izdūšanu, raksteišonu i tulkuošonu latgalīšu volūdā. Tulkuojs Beibelis stuostus, lyugšonys, svātūs dzeivis stuostus, izdevs pyrmū riekinuošonys vuiceibu gruomotu latgalīšu volūdā.