Rokstu sagataveja: portals lakuga.lv

26. janvarī 11.00 Preiļu kulturys nomā nūtiks Latgolys piļsūniski aktivūs dzeivuotuoju forums, kurā ir aicynuoti pīsadaleit vysi Latgolys dzeivuotuoji i interesenti, informej projekta koordinatore Ilga Šuplinska. Forumā sprīss par Latgolys dzeivuotuoju leidzdaleibys vareibu, ītekmejūt procesus i nūtikšonys regionā i vysā Latvejā.

Par tū, kai asūšūs resursus puorvērst kaidā peļnejūšā ci nūdereigā projektā, kaidi ir dzeivuotuoju konsultativūs padūmu īgivumi i kai tuos dorbojās, kai dzeivuotuoji poši var uzlobuot socialū i kulturys vidi sovā apleicīnē, pīsadaleit vysaidūs projektūs i sajimt finansiejumu idejom – diskutēs i pīredzis stuostūs pasadaleis Sielejis aktivuokūs piļsūniskūs organizaceju puorstuovis Ieva Jātniece i Daina Alužāne, kai ari Preiļu pošvaļdeibys dzeivuotuoju padūmu puorstuovi.

Kai foruma moderatoris byus Preiļu nūvoda pošvaļdeibys vacuokuo eksperte sadarbeibā ar NVO Ineta Liepniece i Latgalīšu kulturys bīdreibys vadeituoja Ilga Šuplinska. Kai nūruoda Ineta Liepniece: “Bīži viņ kasdīnys sarunuos var dzierdēt, ka pošvaļdeibu dzeivuotuoji syudzuos par “dūmis neizdareibom”, tok ir vārts saprast, ka myusu dīnuos kotrys var ītekmēt aktualūs dūmis dorbus, īvīst kaidu nūdereigu projektu sovā apleicīnē. Vajag tik suokt i dareit. Dzeivuotuoju konsultativuos padūmis ir veids, kai dūmis darbinīki uzklausa dzeivuotuoju idejis, diskutej par aktualitatem i dūd konsultacejis par vysaidim vaicuojumim, pīvadumam, īsnāguma raksteišonu.”

Kluotīnis forums nūtiks 26. janvarī 11.00 Preiļu kulturys nomā. Daleiba ir bez moksys, tok pyrma tam interesenti ir aicynuoti pīsaregistrēt daleibai ITE.

2. februarī byus foruma turpynuojums tīšsaistē, kurā vaira apsavērs dzeivuotuoju leidzdaleibys vareibu jau vaļsts mārūga aktivitatēs i analizēs vairuoku projektu rezultatus, atkluojūt, cik gotova īsasaisteit i uzajimt atbiļdeibu ir Latgolys sabīdreiba i juos piļsūniskuos organizacejis. Tīšsaistis forumu varēs vērtīs Latgolys kongresa YouTube kontā.

Pasuokumu organizej: Latgalīšu kulturys bīdreiba (LKB), Preiļu nūvoda pošvaļdeiba i Latgolys kongresa lāmumu izpiļdis padūme (LKLIP).