Rokstu sagataveja: portals lakuga.lv

Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā.

“Kotrys dorbs sovā byuteibā ir unikals i naatkuortojams, kotram ir sova funkceja i nūzeime. Kas tū spiej nūviertēt? Voi var saredzēt koč kū eipašu? Kaidys dūmys voi asociacejis izraisa vīns voi ūtrys keramikys dorbs? Sevkura meistara dorbs ir unikals ar formys i tūņu izteiksmem, ar tymā īlyktū pozitivū jutūni. Kotram keramikys izstruoduojumam kai sevkuram rūku dorbam ir sovs radeišonys stuosts – voi tys byutu vyrpuots i izrūtuots ar ornamentim i glazurom, voi taiseits asketiskā minimalisma stylā. Keramika dorbs aba daiļrade pylnā mārā ir saisteita ar juo raksturu, sovpateibom, dūmom i dzeivis strategeju. Meistars nūdūd sovu energeju i jiutys tūpūšajam muola izstruoduojumam, vyrpojūt tū iz pūdnīka vyrpys voi veidojūt izvālātajā tehnikā,” viesteits izstuodis aprokstā.

Pūdnīceiba ir vīna nu senejuokūs tautys muokslys nūzaru, kurys tradicejis Latgolā sasagloboj i atsateista myusu dīnu kulturvidē. Tautys lītiškuos muokslys studejis “Latgale” daleibnīki ar sovim darynuojumim aplīcynoj, ka pūdnīceibai ir na tik utilitara materiala vierteiba, bet tai pīmeit ari tautys goreiguo kulturys vierteiba i identitate.

Izstuode daīmama apmaklātuojim Daugovpiļs Muola muokslys centra dorba laikā nu trešdīnis da sastdīnis nu 12.00 da 18.00 stuņžu i svātdīnēs nu 12.00 da 16.00 stuņžu.