Rokstu sagataveja: portals lakuga.lv

Kulturys īsacejumus itai nedeļai sagatavejuse dzejneica Gunta Ločmele, kura sevi sauc ari par “nanormalu Saļņovys popularizātuoju i vīnkuorši jautru cylvāku”. Gunta sacynoj, ka itymā nedeļgolā daudzi nūteikti sekuos leidza “Muzikālās bankas 2023” finalam Daugovpilī i baudeis Daugovpiļs turysma objektu i uzjāmumu eipašūs pīduovojumus ituo pasuokuma apmaklātuojim. Sovpus tim, kuri grib pabaudeit lobu humoru, jei īsoka treis veseleiga humora pylnus pasuokumus Latgolā.

“Soka, ka janvara beigys ir goda depresivuokais laiks, kod pamozam pagaisuse Zīmyssvātku prīca i atmastys cereibys par Jaunuo gods apsajimšonom, partū vajag uzlobuot nūskaņojumu, jautri pavodūt pādejū janvara nedeļgolu,” tai Gunta.

Komedeja par kopu svātkim

Pīktdiņ, 26. janvarī, 19.00 stuņdēs Rībeņu kulturys nomā Leivuona nūvoda kulturys centra amaterteatris ruodeis Aivys Birbelis komedeju “Kapusvētku PR”. Tys ir ironisks stuosts par tū, kai Latvejis laukūs, kod kopu svātkūs sasateik rodi i jauneibys draugi, pieški atsakluoj, ka kaids apskuodiejs beņču pi vīnys saimis kopu kūpeņu. Vītejuos taņtenis līk vaini iz nazkodejū jauneibys mīlesteibu, i, lai tū nūskaidrotu, paleigā sauc vītejū kuorteibys sorgu. Iznuokums vysim ir lels puorsteigums.

Kuram gon nav kaida kopu svātku pīdzeivuojumu stuosta! A tai kai režisors itai izruodei ir koloritais Oskars Bērziņš, smīklu ite nūteikti natryuks.

Pasasmīt ari par sevi

Sastdiņ, 27. janvarī, 16.00 stuņdēs Viļakys kulturys nomā i 18.00 stuņdēs Bolvu Kulturys i atpyutys centrā jūkus stuosteis stand-up komiks Maksims Trivaškevičs. Gaumeigs humors par vysaidom kasdīnys lītom, kas daudzim ļaus pasasmīt ari par sevi. Vīnaldzeigūs nūteikti nabyus, smīsitēs vādarus turādami!

“Zombijs” Saļņovā

Grandiozuokais ituo nedeļgola nūtykums 27. janvarī 19.00 stuņdēs gaidoms Saļņovys kulturys nomā – Saļņovys amaterteatra pyrmizruode Aivara Bankys komedeja “Zombijs”. Komedejis pamatā ir natycams, tok, kai zynuotuoji stuosta, pavysam patīss nūtykums. Svātku sviniešonys korstumā nagaideiti aizsaulē nūguojušais kungs kaidu nakti pavysam dzeivs atsagrīž pi sovys sārojūšuos atraitnis. Tai suocās vysaidi amizanti puorprotumi i pīdzeivuojumi, kurus papyldynuos kapelys “Sveicynojam, vielejam” lusteiguos dzīsmis. Sovpus vokora nūslāgumā 22.00 stuņdēs tīpat Saļņovys kulturys nomā sevkurs varēs izadoncuot ballē kūpā ar grupu “Vīri laivā”.