Rokstu sagataveja: portals lakuga.lv

Bīdreiba “Atvērtās krātuves” izdavuse latgalīšu dzejneicys Ingridys Tāraudys bilingvalu (latgaliski/latvīšu literarajā volūdā) dzejūļu-haiku kruojumu “Drupanenis”, kas reizē ir Latgolai veļteits suvenirizdavums, kū veidoj spiralveida īsiejumā apvīnuotys 48 postkartis, informej izdevieju puorstuove Ilma Elsberga. Postkartem vīnā pusē ir dzejūļs latgaliski i nalela dekorativa ilustraceja, sovpus ūtrā pusē – dzejūļa puorlykums latvyski, zeimāta Latgolys karte ar nūzeimeiguokajom regiona piļsātom, vīta postmarkai i linejom tekstam. Postkartis gruomotai ir davīnuotys ar perforātu lineju, kas ļaus tuos gleiši i korekti nūplēst, kab izmontuotu syuteišonai, pīmāram, nu kaidys Latgolys vītys.

“Naleluo dzejūļu gruomateņa ir vīgli leidza pajemams suvenirs ar davīnuotu geografiskū informaceju par Latgolu, kluotyn vēļ tei izmontojama na viņ apkūpuotā formā, tok ari kotra lopa-postkarte ar dzejūli ir nalels suvenirs poša par sevi. Īspiejams, cytā Latvejis vītā voi pat cytā vaļstī sajimta postkarte ar Latgolys karti īdvasmuos i radeis vieliešonūs pošim apmeklēt Latgolu,” skaita izdevieji.

Īintrigejūšs moments ir ari kruojumā apkūpuotūs dzejūļu forma – “Drupanenis” saraksteitys haiku – senejā japuoņu dzejis formā. Haiku aba haikys ir Japuonai rakstureiga, 16. godu symtā rodusēs, eipaša, eisa bezatskaņu dzejis forma, kas sastuov tik nu 17 ziļbu, veidojūt 5 — 7 — 5 ziļbu treisrindi. Haiku teik ītvarta eisa spieceiga puordzeivuojuma šaļts saisteibā ar kaidu dobys tālu i myužeibys apjautu. Kaida cylvāka dzeivis škautne teik sasaisteita ar myužeibu, narymstūšajai dobys kusteibai pīsavīnoj cylvāka dvēselis izjiutys nūteiktā šaļtī. Haiku navar byut najaušu detaļu, līku vuordu, jo dzejis telpa ir puoruok moza. Tei ir filozofiska dzeja. Autore, izmontojūt itū lakoniskū dzejis formu, runoj par mums sevkuram byutyskom sajiutom i vierteibom – par ciļvieciskūs attīceibu i reizē sovys pateibys mekliejumim, spylgti emocionalam puordzeivuojumam pakļaunūt reizem kasdīnys vīnmuleibā īsasnaudušu apziņu.

Gruomotys “Drupanenis” izdūšonu finansiali atbaļsteja Vaļsts kulturkapitala fonds (VKKF) mierkprogramā “Latvīšu viesturiskūs zemu atteisteibys programa” i Rēzeknis vaļstspiļsātys pošvaļdeibys agentura “Rēzeknis Kulturys i turysma centrs”. Gruomotys attaiseišonys svātki gaidomi sastdiņ, 3. februarī, 13.00 stuņdēs Rēzeknis Centralajā bibliotekā. Iz tū aicynuots sevkurs interesents, kab runuotu par dzeivi i dzeju, par mīlesteibu – i pret meiļuotū cylvāku, i pret sev tyvajim, i pret dzymtū zemi, i ari par tū, kai saglobuot sovys saknis, dzeivojūt svešumā. Pasuokumā byus vareiba aizdūt vaicuojumus autorei tīšsaistē, baudeit muzyku i prīcuotīs par dzeivi i jaunu gruomotu latgalīšu volūdā.

Ingrida Tārauda ir spylgta, rodūša i aizrauteiga sovys paaudzis latgalīšu dzejneica, kura sevi puorlīcynūši pīruodejuse latvīšu i latgalīšu dzejā, jau nu 90. godu beigu publicejūtīs kai presē, tai vysaidūs dzejis almanahūs i kūpkruojumūs. Koč i itūšaļt dzeivoj Īrejā, autore vysod uzturējuse sevī dzeivu pīsaisti latgaliskajai kulturtelpai i ryupiejusēs par latvīšu i latgalīšu rokstu volūdys i kulturys tradiceju saglobuošonu ari diasporā. Itūšaļt voda pošys izveiduotū Diasporys latvīšu volūdys i kulturys pamatškolu “Kāpnītes”.

Gruomotys izdeviejs – bīdreiba “Atvērtās krātuves” – ir sabīdryska organizaceja, kura eistynoj vysaidus ar Latvejis kulturys i viesturis apzynuošonu saisteitus projektus – ar VKKF atbolstu izdūtys vairuokys gruomotys sadarbeibā ar latvīšu trymdys īvārojamū viesturnīku Andrievu Ezergaili, kai ari īprīškejais Ingridys Tāraudys dzejūļu kruojums “Pajautys”, kas tyka nomināts Latgalīšu kulturys goda bolvai “Boņuks”.

Gruomotu varēs nūpierkt “Jāņa Rozes” i “Latvijas Grāmatas” tierdznīceibys teiklā Reigā i Latgolā, kai ari plānuots uzrunuot Latvejis Posta nūdalis i turysma informacejis centrus Latgolā.