Rokstu sagataveja: portals lakuga.lv

Gaidūt Latgalīšu kulturys goda bolvys “Boņuks 2023“ padūšonu, nūskaidruoti 30 bolvys nominanti, informej Latgolys viestnīceibys “Gors” puorstuove Santa Kļaviņa. Ceremonejā tiks paziņuoti 10 bolvys “Boņuks 2023“ sajiemieji i gūdynuots ari bolvys “Par myuža īguļdejumu latgalīšu kulturys atteisteibā“ sajiemiejs. Itūgod bolvys padūšonys ceremoneja nūtiks kai ar skateituoju byušonu kluotyn 2. martā 18.00 stuņdēs Latgolys viestnīceibā “Gors”, tai ari tū varēs vērtīs LTV1 translacejā 21.10.

Itūgod bolvys par aktivitatem, dorbu i sasnāgumim latgaliskajā kulturā tiks padūtys jau sešpadsmytū reizi. Latgalīšu kulturys goda bolvys “Boņuks” mierkis ir apkūpuot lobuokū, spūdruokū i svareiguokū padareitū i nūtikšonys pārnajā godā latgaliskajā kulturā, gūdynojūt aktivuokūs latgalīšu kulturys puorstuovus, popularizātuojus, kai ari veicynojūt jaunradis i kulturys daudzveideibys atteisteibu iz prīšku. Itūgod tyka īsnāgti 106 pretendentu dasacejumi, kurūs izviertēja žurejis komiseja, tuos sastuovā īkļaunūt īprīškejūs godu bolvu sajiemiejus, medeju puorstuovus, bolvys reikuotuoju puorstuovus, latgaliskuos kulturys sabīdryskūs aktivistus i attīceigūs sferu daaicynuotūs ekspertus, kuru kasdīna nav saisteita ar latgaliskū kulturu.

Pretendentus viertēja piec snāguma kvalitatis, aktivitatis vysa goda laikā, regionā, vaļstī voi plašuokā mārūgā raiseituos rezonansis, latgaliskuma i/voi Latgolys kulturys vierteibu nesšonys, pretendenta ilgtspiejis – ītekmis iz latgaliskuos kulturys procesim iz prīšku.

Latgalīšu kulturys goda bolvys “Boņuks 2023” nominanti ir (alfabeta parādā):

Animacejis kina “Vydsmuižys Annužys acim”
Baļtinovys teatris “PALĀDAS”
Dagnejis dzejis kruojums “Ups, kūki i mes”
Daugovpiļs teatra izruode “Divejis vyrtuvē, naskaitūt nabašnīku”
Dzīšmuspēle “Trasuns. Fabulas”
Folklorys kūpa “Ceidari” ar albumu “Dzīduotumi, ļustātumi”
Golda spēle latgaliski “Čipierkstneits”
Grupys “Bez PVN” albums “PARALELI HORIZONTI” i prezentacejis koncerti
Inta Pujāta vidis objekti “Oduma meitys”
Kapela “Bumburneicys” ar albumu “Bumburneicys”
Komikss bārnim latgaliski “Sunāns breiveibā”
Konkurss “Latgolys prozys skaitejumi 2023”
Kulturvīta “Rancāna pogolms”
Laimas Muzykanti ar albumu “Turu Buru!”
Latgolys karūga apstyprynuošona
Latgolys regionaluo televizeja
Lindys Vorpis gruomota “Viņpus upes. Abrene atmiņu stāstos”
Lītuotne darbeibys vuordu lūceišonai latgaliski
Ludzys nūvods – pyrmuo pošvaļdeiba Latvejā ar saukli latgaliski
Muzykys projekts “Latgalian Evergreens” (Fonds Mūsdienu Mūzikas Centrs)
Namaterialuos kulturys montuojuma centra “Upīte” renovaceja
Ontona Slišāna puorsokys
Oskara Seiksta gruomota “Atīsmis”
Projekts “Bolsu tolka”
Radejis īstudiejums “Bruoli”
Raidīroksts “Pīci breinumi”
Rokstu i raidīrokstu sereja “Latgolys vaicuojums”
Storptautyskais etnodžeza muzykys ansambļu konkurss “Guoyu pa Jazz”
Tradicionaluos dzīduošonys grupa “Saucējas”
Veiru kors “Graidi”

Da februara vyds tiks publiski paziņuots ari bolvys „Par myuža īguļdejumu latgalīšu kulturys atteisteibā“ sajiemiejs.

“Boņuka 2023” ceremonejis vadeituoji byus bruoli Kozlovski – Oskars, Jurs, Juoņs i Muorteņš aka Kozmens – vaira zynomi kai humora šova “Četri brāļi” daleibnīki. Skateituojus kluotīnē i LTV1 translacejā prīcynuos veiru kors “Graidi”, “Laimas muzykanti”, apvīneiba “Sabia Music”, kapela “Bumburneicys”, “Latgalīšu reps”, “MARYSANA band”, MIKC “Latgolys muzykys i muokslys vydsškola” džeza apvīneiba “Sipisnīks ar madu”, JDK “Dziga” i VPDK “Dzimta”. Latgalīšu kulturys goda bolvys padūšonys ceremonejā tiks nūskaidruoti ari publikys simpatejis bolsuojuma bolvys – Žyka – sajiemiejs. Sovu simpateju variesi atbaļsteit Latvejis Sabīdryskūs medeju portalā LSM.lv, kurā bolsuošona nūtiks sadarbeibā ar latgalīšu kulturys ziņu portalu lakuga.lv. Bolsuojums suoksīs 16. februarī i byus da 29. februara.

Beletus iz “Boņuks 2022” ceremoneju var nūpierkt i GORS, i “Biļešu Paradīze” beletu tierdznīceibys sistemuos škārsteiklā, kai ari kasēs kluotīnē.

“Boņuka 2023” nūtikšonu atbolsta Vaļsts kulturkapitala fonda mierkprograma “Latvīšu viesturiskūs zemu atteisteibys programa” i bīdreiba “Latgales reģiona attīstības aģentūra”, kai ari Leivuona, Ludzys, Preiļu, Kruoslovys nūvoda pošvaļdeibys i Rēzeknis piļsātys dūme. Bolvys informativī atbaļsteituoji ir Latvejis Televizeja, latgalīšu kulturys ziņu portals lakuga.lv, Latvejis Radejis Latgolys studeja i Latvejis Sabīdryskūs medeju portals LSM.lv.