Rokstu sagataveja: portals lakuga.lv

Pi skaiteituoju tics žurnala “A12” februara/marta numers i tymā var puorskaiteit sarunys ar apgierbu dizaineri Egiju Žihari, keramiki Līgu Skariņu, metalmuokslinīku Norbertu Kudiņu i cytys sarunys i stuostus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce ituo numera īvodā soka: “Žurnala “A12” satyktī varūni puorlīcynoj, ka var dzeivuot lānuok i radeit lobuok. Sastruoduotom rūkom i myrdzūšu aizrauteibu acīs jī stuosta par sovu sapynu pīpiļdejumu i mīlesteibu iz tū, kū dora. I tū jau var saprast tik ar sirdi. Bīži viņ saime i škola izmīdz redzīni, ka svareiguokais ir īnuokumi, na tei nūsadorbuošona, kura pīpylda ilgys i sirdi. Ka taida ir, tod dzeivis prioritatis i sasnāgtais pošsaprūtamai sasakuortoj vierteibu plaukteņūs.”

Žurnala “A12” februara/marta numerī skaitit:

• Interveja ar uzjiemeigū Egiju Žihari par vacu žakešu gluobšonu, doktera Klauna profeseju i gribiešonys byut pošai eistynuošonu.
• Horeografe Arina Buboviča runoj kusteibu volūdā i prīcojās par vareibom struoduot ar bārnim i jaunīšim ari Latgolā.
• Kas ir Juoņs Strods i parkū Ludzā ir juo vuordā nūsaukta īla – pietej geografs Ivars Matisovs.
• Parkū svareigi saglobuot atminis par 2. pasauļa kara biegļu gaitom – Kristys Svalbonys viestejums pasauļam.
• Metalmuokslinīka Norberta Kudiņa spieja puorvaļdeit guni.
• Parkū svareiga lānuo dzeuvuošona i ūtra pošsajiuta – Vijis Pizičys i Elitys Eglītis atzinis.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – itūreiz ar aktivū viļānīti Viju Piziču sasarunuoja žurnaliste Marta Puzāka, bet rokstu par horeografi Arinu Buboviču sagatavejuse lakuga.lv redaktore Laura Melne. Taipat žurnalā puorskaitoma portala redakcejis sagataveituo informaceja par jaunuokajim gruomotu izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.