Rokstu sagataveja: Laura Spundere, portals lakuga.lv

Nu 9. da 11. februara pyrmū reizi Rēzeknis nūvoda Viļānūs nūtyka storptautysks masku festivals, kuruo mierkis beja vērst plotuoku viereibu iz Latgolys regiona maskuošonuos tradicejom. Festivals ir kasgadejs, tū organizej Latvejis Folklorys bīdreiba, kotru godu festivala nūtikšonys vīta ir cyta.

Latvejis Folklorys bīdreibys vaļdis prīšksādātuojs Andris Kapusts, vaicuots partū, kai tyka izdūmuots organizēt festivalu taišni Viļānūs, paskaidruoja, ka kasgadeji festivala mierkis ir piec vareibys paplašynuot auditorejis lūku i maineit festivala nūtikšonu vītys, kab tyktu sasnāgti i varbyut drupeit īinteresāti ari cyti ļauds. “25 godu pastuoviešonys laikā festivals Latgolys regionā ir nūtics Dagdā, Leivuonā i Kuorsovā, sovpus cikom ni reizi natyka byuts Latgolys vidīnē. Mums beja zynoms, ka Viļānūs ir gona aktivys folklorys kūpys, kas ari ir cīši svareigs aspekts, kab festivals izadūtu, prūti, vītejūs ļaužu īsaiste,” stuosta Andris Kapusts, kurs ari paslavej Rēzeknis nūvoda i Viļānu piļsātys festivala organizatorus, pasasokūt kurim, festivala sagataveišonys process asūt bejs gona vīglys.

Itūgod festivalā pīsadaleja aptyvai 20 dažaidys masku grupys nu vairuoku Latvejis nūvodu, tymā skaitā Dagdys, Preiļu, Ambeļu, Muolpiļs, Lelvuordis, Modūnis, Vydsmuižys, Limbažu, Saunys, Kotlakolna, Ugālis, Pībolgys, Viļānu i Reigys, taipoš beja gosti ari nu Dīnavydigaunejis. Itūgod festivalā pīsadaleja gona daudz jaunu dalinīku, kurim tei beja pyrmuo taida veida pīredze, tok beja daudz ari taidu, kuri ir pīsadalejuši desmit i vaira reižu.

Portals lakuga.lv Viļānu piļsātys īluos satyka ari vairuokus masku festivala dalinīkus. “Maska “Mīžvylks” (Miežvilks) ir senejs tāls, kurs nazkod ir guojs nu lauka iz sātu, vylkdams leidza žogorus i mīžus. Tys eipaši saisteits ar tū, ka gona bīži vylki aplence zemnīku laukus, sovpus “miežvylki” beja tī, kuri aizsorguoja labeibu laukus,” tai sovu ītārpu aproksta folklorys kūpa “Garataka” nu Reigys. Jī ari papyldynoj, ka, gastejūt kaidā nu Viļānu sātu, sajāmuši unikalu duovonu – vylka uodu nu Rēzeknis nūvoda Dekšuoru pogosta. Svareigi pīminēt, ka Latvejā tikt pi vylka uodu niu ir gona lels izaicynuojums, vylka uodys ir palykušys par gryuši dabojamu rešumu, deļtam taids duovynuojums sovu folklorys tārpu boguotynuošonai ir cīšyn svareigs.

Taipoš vysi satiktī dalinīki nabeidze slavēt, cik labi i pateikami tykuši uzjimti Viļānūs: “Beja cīši pateikams festivals, myus labi uzjēma, klausiejuos i poši īsasaisteja, cīši labi,” stuosta vīna nu foklorys kūpys “Garataka” dalineicu.

Sovpus kaids dalinīks nu Limbažu, kurs ar lapnumu nese Muorteņbārna tārpu, pasadaleja ar sovu redzīni: “Ir taids uzskots, ka Latgola ir cīši gostmīleiga, tok, pa munam, itys redzīņs ir stypri pīzamāts – Latgola ir tik gostmīleiga, ka nu itīnis pat gryuši tikt paceli! Mums nupat beja masku guojīni pa sātom, parosti festivala laikā ir kaidys 3-4 sātys, pa kurom izīt festivala dalinīku grupa, tod ir tai, ka vīnā sātā tevi sagaida labi, puorejuos – nu tai. Tok ite beja tai, ka kotrā sātā sagaideja kai tamā vīneigajā, sovpus pādejā sātā vysu īprīškejūs sātu saiminīki saguoja kūpā i beja vēļ boguoteiguok,” tai limbažnīku Muorteņbārns, kurs smejūtīs paturpynoj: “Mes nūkaviejom pušdīnis, konferenci, beiguos daļai nu grupys nabeja jaudys nūīt ari da vokora pasuokuma!” Sovpus kaidi cyti dalinīki nu Ugālis saceja, ka ir puorsteigti partū, ka Viļāni asūt lelpiļsāta, jo taids tiergs varūt byut viņ lelpiļsātā.

Sovpus gosti nu Dīnavydigaunejis pīzyna, ka tradicionaluos maskuošonuos tradicejis te asūt stypruokys, nakai Igaunejā, taipoš ari pastreipuoja, ka kūpumā pasuokuma programa asūt bejuse cīši boguoteiga i interesanta.

Fotogalerejis autore: Amanda Anusāne, portals lakuga.lv