Rokstu sagataveja: portals lakuga.lv

Sastdiņ, 2. martā, Latgolys viestnīceibā “Gors” Rēzeknē byus Latgalīšu kulturys goda bolvys “Boņuks 2023” svineiguo ceremoneja – gaideituokuo kasgadejuo nūtikšona latgalīšu kulturā. Tamā nūskaidruos 10 bolvys sajiemiejus par padareitū latgaliskajā kulturā 2023. godā. Nu 16. da 29. februara portali LSM.lv i lakuga.lv aicynoj kotru atbaļsteit sovu simpateju – kaidu nu 30 bolvys pretendentu.

Latgalīšu kulturys goda bolvys “Boņuks 2023” ceremonejā publikys simpatejis bolsuojuma bolvys – Žyks – sajiemiejs tiks apbolvuots sastū reizi. Ari itūogod bolsuot par sev simpatiskuokū i spūdruokū nu vysu 30 “Boņuks 2023” nominantu aicynoj latgalīšu kulturys ziņu portals lakuga.lv i Latvejis Sabīdryskūs medeju portals LSM.lv. Bolsuojums suocās pīktdiņ, 16. februarī, 7 stuņdēs nu reita portalā LSM.lv i byus da 29. februara pusnakšu, bet bolvys sajiemiejs tiks paziņuots ceremonejā 2. martā Rēzeknē. Bolsuot par sovu simpateju var vīnu reizi dīnā, dasaslādzūt ar sovu socialūs medeju profilu voi e-postu.

Bolsuot par sovu simpateju var ITE.

Bolsuojuma uzvarātuojs sajims keramikis Vēsmys Ušpelis taiseitū muola statueti – Žyku. Tymā radzams Boņuka suņs Žyks, kurs ari sovulaik plotuok tyka īpazeits car režisora Juoņa Streiča kinu “Cilvāka bērns”, kas baļsteita taida poša nūsaukuma rakstnīka Juoņa Klīdzieja romanā. Taišni Vēsmys i Aivara Ušpeļu darbneicā “Malny Wylky” Rēzeknis nūvodā tūp ari pošys “Boņuka” statuetis.

Pīcuos īprīškejuos bolsuojuma reizēs treis reizis publikys simpateju bolsu sajēme rūkdarbneica, tautystārpu entuziaste i “Latgolys etnografiskuos viestnīceibys” vadeituoja Iveta Seimanova, taipat bolvu sajēme folklorys kūpa “Upīte” i īrokstu studeja “Bigmaar’s Records”.

“Boņuka 2023” svineiguo ceremoneja 2. martā byus nūsaverama ari LTV1 eterā, kai ari LSM.lv i replay.lv.

Latgalīšu kulturys goda bolva “Boņuks” pyrmū reizi nūtyka 2009. godā, bet nu 2013. gods bolvu reikoj Latgolys viestnīceibys “Gors” komanda. Vaira par bolvu “Boņuka” sātyslopā htpp://bonuks.lv.

Bolvys nūtikšonu atbolsta Vaļsts kulturkapitala fonds latgalīšu kulturys kusteibys “Volūda” (bīdreibys “LgSC”) projektūs “Atbalsts biedrības “LgSC” latgaliskās kultūras aktivitātēm 2023.-2025.” i “Latgaliskās kultūras dokumentēšana 2022.-2024. gadā portālā lakuga.lv”.