Rokstu sagataveja: portals lakuga.lv

Rēzeknis nūvoda vokaluo studejis “Skonai” jaunīšu grupa pīduovoj Uģa Vilcāna dzīsmis “Tik lānai kai munys dūmys”, kū, īspiejams, daudzi īpazynuši grupys “The Sound Poets” izpiļdejumā, a cappella verseju. Tai radeits ari video klips, kas uzjimts Latgolys viestnīceibā “Gors”.

Vokaluos studejis “Skonai” vadeituoja Guntra Kuzmina-Jukna stuosta, ka jei kai komponiste vysod meklej īdviesmi jaunim dorbim. Cytureiz jei škūrstūt latgalīšu dzejnīku gruomotys, meklejūt dzīšmu tekstus, tok itūreiz atškeiruse Edeitis Laimis sastateitū “Munu dzīšmu gruomotu”, kurā atroduse dzīsmis “Tik lānai kai munys dūmys” notys. “Īsadūmuoju, ka itai dzīsmei asu dzierdiejuse dažaidys versejis, bet a cappella verseju eisti naasu dzierdiejuse. Tyvuojuos Latvejis vokalūs ansambļu skate, kurai vajadzēja gataveit jaunu repertuaru. Pīraksteju dzīsmis aranžeju i aiznešu jaunīšim paruodeit. Jim tei cīši labi aizguoja kai dzīduošonys ziņā, tai emocionali,” Guntra nūruoda, ka piečuok dzīsmi izpiļdiejuši ari vysaidūs pasuokumūs, cikom tykuši pi dūmys, ka tū vajadzātu ari īraksteit. “Dzīsme eistyn dūd taidu zīmys lirisku, romantisku nūskaņu, partū varbyut ari jaunā skaniejumā varātu cylvākus cīši uzrunuot. Kai varim redzēt, tys jau ir nūtics,” jei atsasauc iz video popularitati Facebook.

Dzīsmis “Tik lānai kai munys dūmys” muzykys i teksta autors ir Uģis Vilcāns, aranžiejumu veikuse Guntra Kuzmina-Jukna, par īrokstu pasaryupiejs “Skonai” daleibnīks Ģirts Ločmelis, bet video autors ir Gatis Baltiņš. Tuos īrokstā pīsadaleja Rēzeknis nūvoda vokaluos studejis “Skonai” jaunīšu grupa: Elīna Spridzāne, Everita Štekele, Marta Paula Sejāne, Ģirts Ločmelis, Sigita Kuzmina, Laura Doropoļska, Viktorija Radomane, Kaspars Bačkurs i soliste Laura Svikša.