Rokstu sagataveja: portals lakuga.lv

Portals lakuga.lv jau viesteja, ka folklorys kūpa “Upīte” suokuse apzynuot, īraksteit i vuiceitīs Upītis kulturtelpā i tai pīguļūšajā teritorejā kolhoza laikūs dzīduotuos dzīsmis. Daļa nu salaseitūs dzīšmu teik atjaunuotys, dūdūt tom jaunu, myusdīneigu skaniejumu i kotru mienesi 21. datumā vīnu nu tūs publicejūt. Februarī teik izdūta dzīsme “Marička”, kas veļteita Ukrainys tautai kai atbolsts ceiņā par breiveibu.

Kai informej folklorys kūpys vadeituojs Andris Slišāns, izalosūt februara dzīsmi, jim cīši īpasatykuse Līvijis Supis teiktuo dzīsme “Marička”: “Veicūt ituos dzīsmis izzynuošonu i pietejumus, atkluojom, ka tei ir ukraiņu tautys dzīsme, kura jau tuolajūs 20. godu symta 60. godūs ir bejuse iztulkuota latvyski. Tai vēļ vaira nūsastyprynuoja dūma, ka asam iz pareizuo ceļa taišni itū dzīsmi publicejūt februarī, kod apritēs diveji godi nu Krīvejis pylna mārūga ībrukuma Ukrainā.”

Andris Slišāns ir ari ituos dzīsmis video režejis autors. Par video jis stuosta: “Dzīsmis video stuosts ir veiduots kai puiša-karaveira puordzeivuojums, meklejūt sovu meiļuotū, kura beja palykuse sātā, jam dūdūtīs aizstuovēt dzimtini. Atsagrīžūt sātā, dīvamžāļ meiļuotū naatrūn, jo karā na viņ kreit karaveiri, bet bīži teik nūgalynuoti mīreigī dzeivuotuoji. Dzīsmis video versejā meitinis ir myrušuos dvēseleitis, kurys rauga izstuosteit, ka tik dūmuos i atmiņuos jī vysod byus kūpā, tok sirds suop.”

Folklorys kūpa “Upīte” ir salasejuse vaira par 100 kolhoza laikūs dzīduotūs dzīšmu. Nu tūs īplānuots vysmoz 10 dzīsmis atjaunuot, dūdūt tom jaunu skaniejumu, bet vēļ vysmoz 30 dzīsmis kvalitativi īraksteit, lai tuos napagaistu, jo itūs dzīšmu zynuotuoji palīk vacuoki i dzīsmis dzīd rešuok. Īdzeivynuotys i atjaunuotys teik tuos dzīsmis, kuruos jiutama smeļdze par breiveibu, kuruos dzīd par mīlesteibu, attīceibom, sadzeivi i pat okupacejis laiku izsmejūšom temom.

21. novembrī tyka prezentāta pyrmuo dzīsme “Kara laukā”. 21. decembrī tika dāvināta klausītājiem jauna dziesma “Kod īt iz balli”. 21. janvarī tyka prezentāta dzīsme “Brigaders”. Februarī teik duovuota Līvijis Supis teiktuo ukraiņu tautys dzīsme “Marička”. Muzykys autors Stepans Sabadašs, vuordu autors Mihailo Tkačs, aranžeju veice FK ”Upīte” muzykanti i dzīduotuoji. Īroksts tyka veikts studejā “Bigmaar’s Records”, bet video verseju dzīsmei taiseja “Waltz Visuals” kūpā ar režisoru Andri Slišānu. Video akteri – folklorys kūpys “Upīte” daleibnīki. Folklorys kūpa soka paļdis par atbolstu Vaļsts kulturkapitala fondam.

Folklorys kūpa “Upīte” dybynuota 2002. godā, atteistūt Upītis bārnu folklorys kūpys, kas dybynuota 1980. godā, darbeibu. Da ituo FK “Upīte” ir izdavuse jau četrus albumus: “Vusi ļauds breinovuos”, “Dzīduot muoku, doncuot muoku”, “Ryugts” i “Padzīdam i…”. Kūpa aktivi pīsadola vysaidūs Latvejis festivalūs i nu 2016. goda Latveju puorstuov ari vysaidūs storptautyskajūs festivalūs vysā Eiropā – Leitovā, Igaunejā, Pūlejā, Itālejā, Čehejā, Rumanejā, Portugalē, Slovakejā, Fraņcejā, Kosovā, Boltkrīvejā.