Rokstu sagataveja: portals lakuga.lv

Reigys dūme trešdiņ, 21. februarī, izsprīduse puormeit vairuoku piļsātys īlu nūsaukumus, tymā skaitā leluokuo daļa Moskovys īlys tiks puorsaukta par Latgolys īlu. Sovpus niu asūšuo naleluo Latgolys īla iz prīšku ness rakstnīka Juoņa Klīdzieja vuordu, bet Lomonosova īlys vītā byus Valerejis Seilis īla.

Itaidu lāmumu Reigys dūme pījāmuse, kab piļsātā vaira nabyutu imperialiskuos Krīvejis ideologeju nasūšu īlu nūsaukumu. “Moskovys īla ir vīna nu centralūs Reigys īlu, i tuos nūsaukums nav pareizs signals na vītejai, na storptautyskai sabīdreibai. Tuos asūšais nosaukums graun myusu nacionalū nūstuoju i ari vaļstiskumu,” saceja Reigys vicemers Edvards Ratnieks. Niu tiks suokti dorbi, kab jaunī nūsaukumi pasaruodeitu ari kartē i iz kuormu pluokšņu.

Moskovys īlu puorsauks pamatā par Latgolys īlu, kas beja viesturiskais ituos īlys nūsaukums nu 1938. da 1940. goda. Reigā jau ir nalela īla, kas nūsaukta par Latgolys īlu, i ari tai ir vajadzeigs jauns atbylstūšs i ar Latgolu saisteits nūsaukums, partū asūšū Latgolys īlu puorsauks par Juoņa Klīdzieja īlu. Sovpus nalelū Moskovys īlys suoku pūsmu nu 13. janvara īlys da Solu tylta (Luočplieša īlys) puorsauks par Lastadejis īlu. Tys pamatā teik dareits dzeivuotuoju drūseibys deļ, kab operativajim dīnastim nabyutu klaidainu izsaukumu iz īprīškejom adresem. Tikom Lomonosova īla tiks puorsaukta par Valerejis Seilis īlu.

Valereja Seile (1891-1970) beja īvārojama latgalīšu izgleiteibys, sabīdryskuo i politiskuo darbineica, bibliografe i zynuotneica. Jei bejuse ari Latvejis Tautys padūmis i Satversmis sapuļcis lūcekle, izgleiteibys ministra bīdre. Vadejuse Daugovpiļs školuotuoju institutu, izdavuse žurnalu “Latgolas Škola”.

Juoņs Klīdziejs (1914-2000) beja rakstnīks i dzejnīks, vyslobuok zynoms juo romans “Cilvēka bērns”, piec kura motivu radeita legendaruo Juoņa Streiča kina. Cyts Klīdzieja romans “Sniegi” beja Streiča kinys “Likteņdzirnas” pamatā, tys dramatizāts ari iz Daugovpiļs teatra skotivis Viestura Ruoziņa izruodē “Kliedzēji”.

Leluokuo daļa Reigys jaunūs īlu nūsaukumu veļteiti konkretom personeibom. Niu golvyspiļsātā byus ari Kārļa Mīlenbaha, Vilhelma Purvīša, Viļa Plūduoņa, Emīlijis Benjaminis i Augusta Spariņa īla. Reigys dūme nūruoda, ka tei sovā ziņā ir gūda atdūšona itim cylvākim par tūs īsadreikstiešonu i sasnāgumim myusu tautys atteisteibā.

Atguodynuosim, ka 2022. godā piec latgalīšu navaļstiskūs organizaceju rūsynuojuma Moskovys duorzs Reigā tyka puorsaukts par Latgolys parku. Tys niu atsarass pi Latgolys, na Moskovys īlys.