Rokstu sagataveja: portals lakuga.lv

Sastdiņ, 2. martā, Latgolys viestnīceibā “Gors” Rēzeknē byus Latgalīšu kulturys goda bolvys “Boņuks 2023” svineiguo ceremoneja, kurā nūskaidruos 10 bolvys sajiemiejus par padareitū latgaliskajā kulturā 2023. godā. Nominantu vydā ir lītuotne “Latgalian Verbs”, i itūnedeļ īsacejumus vaicojam tuos izveiduotuojam Arņam Grosam.

Tradicionaluos muzykys vokori

Reizi mienesī Reigys krūdzeņā preteimā Vydzemis tiergam nūteik tradicionaluos muzykys vokori, kur skaņ ari tautys dzīsmis latgalīšu volūdā. Itymūs vokorūs saīt kai profesionali, tai muzykys entuziasti i latvīšu kulturys cīneituoji – lai atkluotu i baudeitu latvīšu muzykys boguoteibu. Organizātuoji aicynoj pajimt leidza sovus muzykys instrumentus, tok es pats lobpruot pīsavīnoju dzīduošonā. Bīži skaņ maņ nadzierdātys dzīsmis, kuras es ar teleponu īrokstu, lai piec tam varātum papyldynuot musu “Tautasdziesmas” lītuotni. Itamā lītuotnē ir ari izveiduota eipaša latgalīšu sadaļa.

“Waze” latgaliski

Kotru reizi kai īkuopu mašynā, mani sveicynoj vuorda bruoļs Arņs, kas latgalīšu volūdā ar “Waze” navigacejis reiku mani nūvad da gola punkta. Itys reiks mani mudynuoja īsuokt seņ lūluotūs planus pi darbeibys vuordu latgalīšu volūdā lūceišonys lītuotnis. Nu Arņa īsavuiceju vaira par atgrīzeniskajim darbeibys vuordim, par pīmāru, “nūsagrīzt”, kur īlīkūt “sa” storp prīdiekli i verba sakni, piļneigi mainuos verba kuorta. Arņs myus itymā nedeļgolā aizvess iz Rēzekni, lai pyrmū reizi dzeivē varātu kluotīnē izbaudeit leluokū nūtikšonu latgalīšu kulturā – Latgalīšu kulturys goda bolvys “Boņuks 2023” svineigū ceremoneju.

Latgalian verbs

Tyvojūtīs latgalīšu kulturys goda bolvys ceremonejai ir pīauguse interese par myusu latgalīšu darbeibys vuordu lūceišonys reiku “Latgalian verbs”. Sajiemu sveicīni “Lai lūbās!”, ar reizi īguoju lītuotnē puorbaudeit, kas tys par vuordu. Pyrma dažu dīnu socialajūs teiklūs kaids konstatēja, ka vieliejuma izteiksme ir napiļneiga. Bejom pateikami puorsteigti, ka lītuotnis lītuotuojs beja seikuok izpietejs vysys izteiksmis – bīži lītuotuoji nateik tuoļuok par eistinebys izteiksmi. Da šam vieliejuma izteiksmi uzruodejom ar vīnu namaineigu formu, par pīmāru, “ceļt” -> “caltu” vysuos personuos (leidzeigi kai latvīšu volūdā). Konsultiejomēs ar profesorem i izsprīdem īkļaut papyldu formys, kai tū vysu bīžuok izmontoj Dīnavydlatgolā. Jau piec 24 stuņžu pasaruodejuos jaunuokuos iOS i Android versejis, i tagad lītuotnē vieliejuma izteiksmē ir: es caltu, tu ceļtim, jis/jei caltu, mes caltumem, jius caltumet un ji/juos caltu.

Vaira par lītuotni izzynoj ITE.