Rokstu sagataveja: portals lakuga.lv

Bīdreiba “LVC” i izdevnīceiba “Byumani” izdavuse kruosojamū aba maļavojamū gruomotu – puorsoku “Saldats i čorti”, informej izdevieju puorstuovs Aņss Ataols Bierzeņš. 29. februarī 17.00 stuņdēs Rudzātu vydsškolā paradzāts tuos prezentacejis pasuokums, kur kūpā varēs skaiteit gruomotu, vērtīs vysaiduokys uzastuošonys i īt rūtaļuos.

Aņss Ataols Bierzeņš pastreipoj, ka vīns nu pošu svareigūs dorbu, kab saglobuotu latgalīšu volūdu, ir bārnu literaturys izlaisšona, kab dzymdynuotuojim byutu vareiba skaiteit bārnim gruomotuos dzymtajā volūdā. Taipat itom gruomotom juobyut šmukom, kab juos varātu konkurēt ar cytom gruomotom, kab bārnim juos cīši patiktu i jī tamuos grybātu skaiteit.

Bīdreiba “LVC” jau īprīšk izdavuse kruosojamuos gruomotys bārnim – 2015. godā izguoja “Duraceņš īsmīdynoj kieneņa meitu”, bet 2019. godā – “Bruoli i lelais tuorps”, kurā jau beja īkļauti ari vysaiduoki aizdavumi.

Jaunajai gruomotai izalaseita latgalīšu tautys puorsoka “Saldats i čorti”, kas teik raksturuota kai interesanta, ar nazynomu sižetu i šmukim tālim. Taipoš puorsoka asūt aizraksteita skaistā latgalīšu volūdā. Puorsoku nu Byumaņu solā dzymušuo i augušuo Andreja Byumaņa (1875-1968) 1926. godā aizrakstejs Juoņs Skuteļs, jei publicāta Juoņa Byumaņa sastateitajā gruomotā “Ošas upes krastu dziesmas un raksti”.

Īīšona gruomotys prezentacejis pasuokumā 29. februarī 17.00 stuņdēs Rudzātu vydsškolā byus bez moksys. Vysim bārnim, kuri pasuokumā publiski varēs pastuosteit kū nibejs latgaliski, jaunuos gruomotys tiks paduovuotys. Gosti aicynuoti jimt leidza gordumus deļ kūpeiga golda.