Koncerts “Celīs, bruoļ!” itūgod izskanēs VEF Kulturys pilī Reigā
Rokstu sagataveja: portals lakuga.lv
25. aprelī VEF Kulturys pilī Reigā koncertā vīnuosīs kai populari i labi pazeistami, tai i pavysam jauni, vysaidus muzykys stylus puorstuovūši muokslinīki ar vīnuotu vodmotivu – “Celīs, bruoļ!”, kurs aizsuokts par gūdu Latgolys kongresa symtgadei 2017. godā, viestej publiski daīmamuo informaceja.
Kai stuosta vīns nu pasuokuma organizatoru i bīdreibys “Latgolys producentu grupa” puorstuovs Guntis Rasims: “Kotrs “Celīs, bruoļ”! koncerts atsaškir kai ar muziku sastuovu, tai ar programys repertuaru. Izpiļdeituos dzīsmis ir, suocūt nu patriotiskuoku, senejuoku i atmūdys laika latgalīšu himu da breineigu jaunuoku myusu dīnu muokslinīku radeitu dorbu.” Vaicuots par koncerta vītys – VEF Kulturys piļs – izalaseišonu, jis skaidroj: “Reigā pagaidom nav leluokys koncertzālis, kur taidu pasuokumu kūpeigi sataiseit. VEF Kulturys piļs šudiņ ir lobuokuo nu vītu itaidai sasatikšonai ar Reigys i tyvejuos apleicīnis seņuok i naseņuok īsadzeivuojušim latgalīšim,” tai Guntis Rasims.
Koncertā pīsadaleis kai jau populari i labi pazeistami, tai ari pavysam jauni, vysaidus muzykys stylus puorstuovūši muokslinīki – Juoņs Aišpurs (grupa “The Sound Poets”), Arņs Slobožaņins (grupa “Dabasu Durovys”), Guntis Rasims i Jurs Vucāns (grupa “Bez PVN”), Jurs Ostrovskis (grupa “Dvinskas Muzykanti”), repere Ūga (apvīneiba “Ausmeņa Records”), Ēriks Zeps i Mārcis Lipskis (grupa “Rikši”), Oskars Bērziņš (kapela “Augusti”), Jana Dudare i Amanda Lapa (grupa “Piparmētra”), Ingars Gusāns (aba Sovvaļnīks), Inga Zeile (grupa “Laimas Muzykanti”) Vinsents Kūkojs (grupa “Trikmīņs”), Veiru kors “Graidi”, Ojārs Tūmiņš, Gints Ratnieks, Jānis Livdāns (ansamblis “Daugavpils BRASS”).
Muzykys albums “Celīs, bruoļ!” tyka izdūts par gūdu Latgolys kongresa 100 godu jubilejai 2017. godā. Ari itūšaļt koncerta programā izskanēs dzīsmis nu albuma “Celīs, bruoļ!” i cytys skaneigys latgalīšu melodejis, tymā skaitā atmūdys laika himnys “Pīmiņ, bruoļ!”, “Skaidruo volūda”, tai ari jaunuokūs laiku kompozicejis, kai “Kalado”, “Screen”, “Pusnakts triādis”, “Tik lānai kai munys dūmys”, “Latgaleite”, i taidys myužeigys melodejis kai “Tuoli dzeivoj”, “Rūžeņa”, “Jezups” i cytys. Beletus var īsaguoduot ITE.
