Rokstu sagataveja: Marta Puzāka, portals lakuga.lv

Latgalīšu repa princese Ūga 5. martā izdeve jaunū albumu “Čardaukšu rūtaļa”, tok sīvīšu dīnys vokorā, 8. martā, kopejneicā “Ausmeņa kebabs” tyka aizvadeits albuma prezentacejis koncerts, puļcejūt kūpā kai muokslinīkus, kuri dalykuši sovu rūku albuma tapšonā, tai ari kvāluokūs hip-hopa i repa fanus.

Tei nav pyrmuo reize, kod repere Ūga albuma prezentacejis svātkus svietej taišni “Ausmeņa kebabā”. Ari juos pyrmais solo albums “LG ir HH” tyka prezentāts taišni tī. Kasdīnā sovpateiguo āstive ari tymā vokorā radeja eistynu underground sajiutu – cīša kūpeiba, vīnkuoršeiba i breiveiba – tai var raksturuot vokora atmosferu. “Ite mes jiutomēs eistyn labi. Zynit, laikam jau kai sātā, partū ka eistyneibā mes vysi asam vīna lela saime. Mes vysi cyts cytu pazeistam,” soka Ūga.

Jaunais albums “Čardaukšu rūtaļa” sevī ītver rūtaleigumu, kur mejīdorbojās sīviškeigums i seksualitate. Kai jau īprīšk viestejuse repere, dzīsmēs teik lauzti stereotipi par sīvītem kai vuojū dzymumu, izceļūt sīvyškū, magiskū i rogoniskū dobu i spāku. Na veļti Ūga prezentacejis dīnu izalasejuse 8. martā, kas veļteita dāmom – bandidom. “Mes kotra sovā ziņā asam bandida. Mes asam tikai sīvītis, i cytys taidys radeibys iz pasauļa nav,” sauce repere.

Tok par albuma nūsaukumu “Čārdaukšu rūtaļa” Ūga auditorejai viestejuse: “”Čardaukši” ir seneja latgalīšu ciļts, par kuru dzeivis veidu kleist vysaiduokys natycamys legendys. Čardaukši saguojuši kūpā, pīsaukuši dobys skaistumu i vuicejuši baudeit dzeivi bez materialūs vierteibu pīlyugšonys.”

“Plyki cylvāki skrīņ sovvaļā! Tev jūs naatrast, naizprast, naizgluobt, napakļaut!” Vīneigais, kū tu vari dareit, – īt jim leidza. Myusdīnuos mes skrīnam i aizmierstam par tik vīnkuoršom lītom, a skrīnam piec kuo? Taipat ari mes, čardaukšu mozuo paaudze, baudom dzeivi, nalīkūt pyrmajā vītā materialuos vierteibys. Asam tikai pošu uztycamuokūs bīdru pulkā – atbolstam cyts cytu kai varim i saprūtam, jo asam eisti taidi, kaidi asam – cylvāki,” viestej Ūga.

Albuma tapšonā pīsadalejuse lela rodūša i spieceiga komanda. Albuma komponists ir bītmeikers Nikita Grapp, dzīsmis īraksteitys kūpā ar reperi Bruolānu i apvīneibu “Ave Pohus”, taipoš sovu rūku dalykuši ir ari Jezups, “Bigmaar’s records” i cyti.

“Vysa ituo albuma komponists ir Nikita Grapp –  jis ir breineigs komponists, uztycams kolegis, ar kuru vysod var riekinuotīs i work hard every day (gryuši struodoj kotru dīnu – angļu vol.). Jis dora gondreiž voi vysu. Mes jau godim ilgi struodojam kūpā. Maņ eistyn cīši ir pasaveics ar sovu komandu. Ari Bruolāns vysod atbolsta, vysod roksta ar mani studejā repu,“ soka Ūga.

Prezentacejis pasuokumā pīsadaleja ari Bruolāns i apvīneiba “Ave Pohus”. Kūpeigi tyka izpiļdeitys kai jau seņuok publicātys dzīsmis, tai ari jaunuos. Kūpā ar grupu “Ave Pohus” teik izpiļdeitys vairuokys dzīsmis, vīna nu tūs ir “Suņu murgi”, kas ari ītver sovu zamtekstu.

“Nasaklausitēs, kū cylvāki runoj, jo tī var byut vīnkuorši koč kaidi suņu murgi. Itū dzīsmi mes ari taisejom kūpā ar grupu “Ave pohus”, i tys process beja taids – jī iztaisa pavadejumu i es atīmu i asu šokā! Jī taisa cīši lobu muzyku! Vīnkuorši nūsalomuot var!” tai Ūga.

Sovpus ar Bruolānu ari izskaņ vairuokys dzīsmis, par pīmāru, “Vātra nuok”.  Teik dzīduota ari Ūgys dzīsme “Vivaldi”, par kuru jei soka: “Kod tu kavej i navari paspēt vysys kasdīnys lītys, dīna ir piļneigi nikaida, tod tu vīnkuorši brauc mašynā i klausīs Vivaldi. Tys cīši paleidz.”

Jaunajā albumā īkļautys dzīsmis kai “Bandidas in Adidas”, “Moteļs” (feat. Bruolāns), “Naktstaureņu saīts” (feat. Ave Pohus), “Auksts Karsts” (feat. Tomijs) i cytys.

Ūga prezentacejis koncertā uzrunuoja ari sovus klauseituojus, kuri pīzyna, ka ir puorsteigti par Ūgys burveibu i spieju radeit, dzīduot par breiveibu i tū radeit ari puorejūs. Taipoš cyti pīzyna, ka nu koncerta sajēme tū, kū gribēja. “Saīt, tod muna miseja ir izpiļdeita! Es asu prīceiga i ceru, ka muni klauseituoji ari ir. Koč kaids kaifs īs nu ituos muzykys, kū mes radejom,“ ar smaidu soka Ūga.

Sveicīņus ar albuma prezentaceju i uzslovys reperei izsaceja ari juos komanda. “Myusu grupa pyrma desmit godu spielēja pavysam cytu muzyku, tok Ūgai vīnys dīnys laikā, burtiski puors stuņžu laikā, saguoja savuokt vysus kūpā, nasaverūt tū, ka mums kotram ir sova dzeive, muzykaluo dzeive. Mes sasavuocem i vīnkuorši baudejom tū laiku. Mieginuojumu beja moz, tūs pītryuka, bet mes izbaudejom. Paļdis Ūgai par tū!” soka apvīneiba “Ave Pohus”.

Par dorbu pi albuma Ūga soka: “Ir izdareits lels dorbs. Es sveidu studejā. Šaļtim tys nav vīgļi, tok es ļūbeju tū, kū doru. Es nūvieleju vysim dareit tū, kū ļūbej i ļūbēt tū, kū dori.”

Fotogalereja: Ūgys jaunuo albuma prezentacejis koncerts, foto Marta Puzāka/portals lakuga.lv