Rokstu sagataveja: portals lakuga.lv

Februara beiguos Daugovpiļs Vīneibys noma vadeituojis omotā tyka Diāna Soldāne, kura īprīšk struoduoja piļsātys kulturys puorvaļdē i ari vadeja Daugovpiļs dasacejuma Eiropys kulturys golvyspiļsātys statusam 2027. godā izstruodis grupu. Daudzim Diāna zynoma ari kai deju ansambļa “Laismeņa” muokslinīcyskuo vadeituoja i aktiva bīdreibys “Cita Daugavpils” dalineica. Nav puorsteigums, ka ari juos ituos nedelis kulturys īsacejumi aicynoj apmeklēt Daugovpili – teatri, izstuodis atkluošonu i deju koncertu.

Igauņu i ukraiņu kūpdorbs ar latvīšu režisoru

21. martā 19.00 stuņdēs Daugovpiļs teatrī aicynoju apmeklēt Igaunejis teatra “Vaba Lava” i Kijivys Dramaturgu teatra kūpdorbu “Izalosi lobuoku verseju” (“Вибери Кращу Версію”). Izruode ir ukraiņu dramaturgis Natalkys Blokys i režisora Valtera Sīļa kūpdorbs, kurs viestej par kara laika izvēlem. Teatra kritike Kitija Balcare rakstejuse: “Izruode “Izalosi lobuoku verseju” vieršās skateituoju rynduos osai i bez līka sentimenta, pošironiskai izgaismoj apjukumu i gryutū lāmumu par tuos fiziskuos vītys izvēli, kur atsarast kara apstuokļūs. Itys ir laikmats, kurā teatram vaira nav laika globuotīs aiz metaforom, i tys runoj tīšu volūdu.”

Storptautyskuo Latgolys grafikys simpozeja atkluošona

22. martā 16.00 stuņdēs Rotko muzejā 12. Storptautyskuo Latgolys grafikys simpozeja izstuodis atkluošona. Simpozejā pīsadola grafiki nu Pūlejis, Fraņcejis, Horvatejis, Itālejis, Igaunejis, Latvejis i Taivanys. Īsadvasmojūt Daugovpiļs piļsātvidē, muokslinīki roda unikalys laikmeteiguos grafikys kompozicejis par temu “Laiks”, kas itūgod nūsaceita par simpozeja vadmotivu.

Senioru deju kolektiva jubileja

23. martā 17.00 stuņdēs Daugovpiļs Vīneibys nomā 35 godu jubileju svieteis Vīneibys noma Latvīšu i latgalīšu kulturys centra senioru deju kolektivs “Atbalss” i kūpā ar draugim izdoncuos skaistuokuos latvīšu skotiviskuos dejis, ļusteigus latgalīšu daņčus, jaunys horeografejis, kai ari leitovīšu dejis.