Rokstu sagataveja: portals lakuga.lv

Tiuleņ jau kluotyn byus Leldīne i puors breivys dīnys, kurys varim pavadeit sātā, ar draugim i atsapyušūt. Svātku laikam pīdar ari kaids eipašuoks gordums. Ar sovom receptem itūreiz pasadola sātys restorana “Dzīles” saimineica Aina Barsukova nu Ludzys nūvoda Malnovys i recepšu bloga lindasvirtuve.lv autore Linda Tellgrena.

Atīt Leldīna caur augstu kolnu,
Caur augstu kolnu, caur zaļu bierzi,
Sorkonys ūlenis kāčuodama,
Sudobra pūdzenis buorsteidama.
/garamantas.lv/

Ainys Barsukovys Leldīnis deserts

Sastuovdalis:

• 0,5 kg bīzuo pīna
• 0,4 kg ībīzynuotuo pīna ar cukru
• 0,5 l soldonuo kriejuma
• 2 ādamuos lizeikys želatina
• 0,5 kg zemeņu (var izmontuot ari saldātys)
• 0,1 kg rozīņu
• 0,1 kg marmelada.

Pagataveišona:
Rozīnis īmārc iudinī, apeļsinu sulā voi rumā (piec izvielis). Želatinu aplej ar soltu iudini, kab uzbrīstu, līk soltaunīkā (ladusskapī) i tod iudiņa peļdē izkausej.

Saputoj soldonū kriejumu, kluot līk bīzū pīnu, ībīzynuotū pīnu i želatinu. Davīnoj sagrīztu marmeladu i rozīnis. Var gataveit vīnu lelū desertu voi daleit porcejuos. Pa viersu līk zemenis.

Svātku kriņgeļs ar sīra i galis piļdejumu nu lindasvirtuve.lv

Sastuovdalis meiklei:

• 450 gramu (lobuok izsejuotu) myltu
• 7 grami sausuo rauga
• 25 grami cukra
• puse čaja lizeikys suoļa
• 50 gramu soldkriejuma svīksta
• 250 ml pīna
• 1 L voi XL izmāra ūla.

Sastuovdalis piļdejumam:

• eļļa cepšonai
• 1 lels voi 2 videji seipuli, nūlaupeiti i sagrīzti mozūs gabaleņūs
• 3 casnāga daivenis, nūlaupeitys i sakopuotys
• 2 čaja lizeikys sovu meiluokūs garšvīlu (Linda līk soldonuos paprikys puļveri i Provansys garšvīlu maisejumu)
• sauve (čipierkstneits) suoļa
• 2 mozuos sorkonuos paprikys, sagrīztys gabaleņūs
• 200 gramu kiupynuota cyukys cauraudža, sagrīzts gabaleņūs
• 100 gramu saulē kaļtātu tomatu, sagrīzti gabaleņūs
• 200 gramu cītuo sīra, sareivāts iz rupuos reivis
• 125 grami mozuos mocarelys bumbeņu.

Dekoriešona:

• 1 vīgli sakulta ūla
• 1 ādamuo lizeika boltūs sezama sāklu
• 1 ādamuo lizeika malnūs sezama sāklu.

Pagataveišona:

Videja izmāra bļūdā sajauc myltus i sausū raugu, cukru i suoli. Svīkstu lieneišam izlaidynoj, dalej pīnu, samaisa. Davīnoj ūlu i vīgli sakuļ. Vysu īmaisa myltūs i maisa, cikom izaveiduojuse meikle bez myltu gabaleņu. Meikli meicej ar rūkom iz myltim nūkaiseitys viersmys, cikom tei palīk elasteiga i vīndabeiga (5-10 minutys). Meikli līk ītaukuotā bļūdā i puorkluoj ar ītaukuotu puortykys plēvi. Nūlīk syltā vītā raudzētīs iz 1 stuņdi voi cikom meikle ir dubultuojusēs apjūmā.

Cikom meikle ryugst, pagatavej piļdejumu. Uzkarsātā eļļā apcap seipulu, cikom tys palīk caurspeideigs, davīnoj casnāgus, garšvīlys i suoli, maisūt cap vēļ puors minutu. Davīnoj papriku i kiupynuotū gaļu, cap puors minutu apmaisūt. Lelū capamū ponnu izkluoj ar capamū papeiru.

Dorba viersmu nūbuorsta ar myltim. Meikli izveļ nu bļūdys i sadola divejuos daļuos. Meikli i meiklis ruli vīgli puorkaisa ar myltim, i ar meiklys ruli izrulej pyrmū pusi piec vareibys vīnaidā bīzumā apmāram 15×60 cm lelā taisnstyurī (pyrma ruliešonys meikli nameicej). Puori līk pusi nu sagataveituo piļdejuma, saulē kaļtātūs tomatus, puorkaisa ar pusi nu reivātuo sīra, līk pusi nu mocarelys bumbeņu. Sarulej garā dasā. Vysu procesu atkuortuoj ar ūtrū meiklis pusi.

Obejus piļdeitūs meiklis ruleišus nūlīk vīnu ūtram sūpluok puors centimetru atstatumā. Obeju ruleišu golus, kas atsarūn tuoļuok vīns nu ūtra, saspīž kūpā. Ruleišus savyn kūpā, līkūt vīnu ūtram puori. Saveituos peinis golus savīnoj kūpā, saspīžūt nūstyprynoj i izveidoj opolu formu. Meikli otkon atstuoj syltumā iz 30 minutom.

Cepeškruosni uzkarsej da 185 gradu. Kod kriņgeļs ir izryudzs, tū puorzīž ar sakultū ūlu, puorkaisa ar sezama siekleņom. Cap 30-35 minutys. Izjam nu kruosns, atdzesej i ād gordu muti.