Rokstu sagataveja: portals lakuga.lv

Sagaidūt latgalīšu volūdys latiņu drukys aizlīguma atcelšonu, kai ari Latgolys kongresa dīnu, Latgalīšu kulturys bīdreiba i Latgolys kongresa lāmumu izpiļdis padūme reikuos vairuokus pasuokumus: “Esi i dori” Latgalīšu volūdys forumu Varakļuonu Nūvoda muzejā 19. aprelī, nūvodvuiceibys stuņdis attuolynuoti kotram školys vacumpūsmam, kai ari diskuseju “Latgalīšu volūda medejūs” Latvejis Nacionalajā bibliotekā i tiešsaistē 26. aprelī, informej projekta vadeituoja Ilga Šuplinska.

1904. goda 23. aprelī tyka panuokts, ka atceļ latiņu drukys aizlīgumu Vitebskys guberņā, kur tūlaik beja Latgola. 1917. goda 26.–27. aprelī Rēzeknē nūtyka Latgolys kongress, kas pyrmū reizi aktualizēja ideju par sovys vaļsts izveiduošonu i pījēme lāmumu, ka Latgola ir gotova apsavīnuot ar Vydzemi i Kūrzemi, veidojūt Latvejis vaļsti.

Latgalīšu volūdys foruma pamatideja – atkuortuotai izgleituot par latgalīšu volūdys statusa i funkcionalitatis vaicuojumim, atsavērt iz padareitū gruomatnīceibā i digitalajūs resursūs 120 godu nu drukys aizlīguma atceļšonys, aktualizēt latgalīšu volūdys dzeivuotspieju, raksturojūt taišni Varakļuonu kulturtelpu, i diskutēt par īrūbežuojumim, kas vystik naļaun latgalīšu volūdai atgiut sovu dabyskū atteisteibys gaitu izgleiteibys i medeju sferā.

Forumā Latgolys kongresa lāmumu izpiļdis padūmis prīšksādātuojs Agris Bitāns stuosteis par aktualajim latgalīšu volūdys vaicuojumim nu juridiskuo aspekta, sovutīs literaturzynuotnīki, rakstnīki, Vaļsts volūdys centra lingvisti pīsadaleis diskusejā par padareitū i vēļ doramū latgalīšu volūdys kūpšonā 120 godu nu latiņu drukys aizlīguma atceļšonys. Byutyskai, ka pasuokums nūtiks Varakļuonūs i kluotīnē nūtiks diskuseja par latgalīšu volūdys dzeivuotspieju, analizejūt taišni situaceju Varakļuonūs. Tū vadeis Latvīšu viesturiskūs zemu atteisteibys padūmis puorstuovs Dainis Mjartāns.

Interesenti i daleibnīki 19. apreļa kluotīnis pasuokumam ir aicynuoti pīsaregistrēt ITE.

Nedeļu piec kluotīnis foruma, 26. aprelī, suocūt nu 8.15, nūtiks treis attuolynuotuos nūvodvuiceibys stuņdis: pyrmuo – školuotuojim (par daīmamajim digitalajim resursim latgalīšu volūdys i nūvodvuiceibys apgivē), ūtruo – pymsškolys i suokumškolys školānim par vīnu nu jaukuokajim kūpprojektim dzejā i muzykā “Vuškeņa iz pļovys”, a trešuo – pamatškolys i vydsškolys vacuma školānim. Tamā vaira tiks izcalta Latgolys kongresa dīnys nūzeime. Attuolynuotajom vuiceibom nav juosaregistrej, tuos varēs vērtīs tīšsaistē i piečuok īrokstā. Školuotuoji ir aicynuoti izmantuot video ari sovuos stuņdēs. Stuņdis vadeis sabīdreibā pazeistami cylvāki, latgalīšu volūdys kūpieji: literaturzynuotneica Ilga Šuplinska runuos ar školuotuojim, dzejneica Ilze Sperga sūpluok ar muziki Kristapu Rasimu prīcēs suokumškolys bārnus, bet īsavērt romanā “Bruoli” i apjaust latgaliskuos vierteibys varēs kūpā ar rakstnīku Aldi Bukšu.

26. aprelī 10.00 stuņdēs Latvejis Nacionalajā bibliotekā i tīšsaistē byus diskuseja “Latgalīšu volūda medejūs”. Kluotīnis daleibai tiks aicynuoti žurnalisti, medeju puorstuovi, eksperti bet attuolynuoti pasuokumā varēs pīsadaleit i vaicuojumus uzdūt sevkurs interesents. Vaira informacejis par itū pasuokumu sekuos.