Rokstu sagataveja: portals lakuga.lv

Latgolys jaunīšim vacumā nu 18 da 30 godu ir vareiba dasasaceit “2×2” seminaram “Īspaids”, kurs itūgod nūtiks Daugovpilī nu 3. da 6. maja. Kusteibys “2×2” mierkis ir radeit vidi, kurā sevkuram jaunam latvīšam ir vareiba pylnveiduot sevi i Latvejis sabīdreibu i sasajust pīdareigam Latvejai.

Četru dīnu ilgajā pīdzeivuojumā dalinīkim byus vareiba īsadzilinuot kulturviesturē i politiskajūs tematūs, kas skar Latgolu. Taipoš byus vareiba vuiceitīs izkūpt sovys izdzeivuošonys prasmis. Kai sūla organizatori, tys byus eistyn jauns i da šam napīdzeivuots “Īspaids”, kas puorsteigs sevkuru! Vītu skaits ir īrūbežuots, daleibys moksa ir 50 EUR par naktsvītu, nūdarbeibom, iedīņreizem i transportu. Dasacejumi teik pījimti da 7. apreļa, dasacejuma anketa daīmama ITE.

Kai stuosta vīna nu nūmetnis organizatoru Lolita Čigāne, itys byus pyrmais “2×2” pasuokums, kurs nūtiks piļsātvidē. Daugovpiļs ir izvālāta sovys daudzveideibys, sarežgeituo viesturiskuo montuojuma i kulturviesturiskuos boguoteibys deļ. “Raudzeisim nasaļaut īspiejamim stereotipim, tok poši Daugovpili i konkreti jaunīšus īpazeit i pošim dabuot sovus īspaidus – kaidi ir Daugovpilī dzeivojūšī jaunīši, kaidys ir jūs ryupis, kaidys cereibys? Kū jim nūzeimej latvīteiba?” skaidroj Lolita Čigāne.

“Itūgod “Īspaidā” mes īgrimsim Daugovpiļs daudzveideigajā piļsātvidē i tuos apleicīnē, tai veidojūt dziļuoku izpratni par Latvejis dažaideibu i ari cīšuokys saiknis storp Latgolys, Latvejis i diasporys jaunīšim. Eipaši aicynojam dasasaceit ari jaunīšus nu Latgolys,” īdrūsynoj Lolita Čigāne. Jei ari pastreipoj, ka, ja kaidam jaunīšam daleibys moksa ir puoruok augsta, jis var vērstīs pi pasuokuma organizatoru, lyudzūt tū samazynuot. “Taida vareiba ir dūta tikai tim pasuokuma dalinīkim, kuri ir nu Latgolys,” nūslādz Lolita.

Pyrmuos “2×2” nūmetnis nūtyka 20. godu symta 60. godūs Zīmeļamerikā, kab styprynuot latvīteibu tūs jaunīšu vydā, kuri dzymuši i auguši uorpus Latvejis. Nu 2015. gods vosorys “2×2” nūteik ari Latvejā, apvīnojūt Latvejā i uorpus tuos dzymušūs latvīšu jaunīšus. Īprīšk “2×2” nūmetne Latgolā beja 2019. godā Augšdaugovys nūvoda atpyutys bāzē “Virogna”. Vaira par kusteibu var dazynuot ITE.