Rokstu sagataveja: portals lakuga.lv

Latgolys pūdnīku dīnys, kas itūgod byus jau 43. reizi, ar sovom aktivitatem aizsuoc muola meistaru aktivū dorba sezonu – intensivu dorbu ar muolu, izstuožu i meistarklašu organiziešonu, kai ari gostu uzjimšonu sovuos darbneicuos. Cyta storpā juopīmiņ, ka Latgolys pūdnīceiba ir ari daļa nu Latvejis Kulturys kanona.

Itūgod Latgolys pūdnīku dīnu vadmotivs ir puorinīks, kas caur sasatikšonu i ideju apmaiņu sasaista meistarus i jūs talanta cīneituojus. Tys aicynoj redzēt, sajust i svieteit Latgolys muolu. Latgolys pūdnīku dīnys itūgod ir īkļautys ari projektā “Satiec savu meistaru!”.

Golvonī pūdnīku dīnu pasuokumi paradzāti 26. i 27. aprelī. Pūdnīku dīnuos Latgolys Kulturviesturis muzejā Rēzeknē nūtiks zynuotniski pietnīcyskuo konference par lītiškuos muokslys vaicuojumim. Itūgod konferencis tema – “Muolā īraksteitais montuojums”. Ar pylnu konferencis programu var īpasazeit ITE.

Latgolys pūdnīku dīnu ceplis tiks kūrts Rēzeknis nūvoda Ūzulainis pogosta keramikys darbneicā “Cukrasāta”, tok pūdnīku dīnu golvonuo izstuode prīcynuos acs Rēzeknis nūvoda Lūznovys muižys “Kulturys škiunī”. Taipoš ari piec pūdnīku dīnu Lūznovys muiža 18. majā aicynuos iz sarunu vokoru ar vairuokim pūdnīku “puorinīkim”, kab veiduot atmiņu tyltus par sasatikšonu ar meistarim car ļaužu atmiņu stuostim.

Pūdnīku dīnys kasgadeji organizej TLMS “Rēzeknes apriņķa pūdnīki”, Latgolys Kulturviesturis muzejs Rēzeknē i Rēzeknis nūvoda pošvaļdeiba sadarbeibā ar TLMS “Latgale” (Daugovpiļs), A. Paulāna TLMS (Rēzekne) i Lūznovys muižu.