Rokstu sagataveja: portals lakuga.lv

Nu 9. apreļa da 19. maja Latgolys viestnīceibys “Gors” Muokslys galerejā i pyrmuo stuova seminaru telpā eksponāta foto muokslinīka Juoņa Gleizda symtgadei veļteita izstuode “GAISMĀ. punkts”, informej “Gora” puorstuove Santa Kļaviņa. Izstuode sastuov nu Juoņa Gleizda aktu fotografeju reprodukceju, kai ari nu konkursa malnboltajā fotografejā “Juoņa Gleizda bolva fotografejā 2024” finalistu dorbu.

Izstuode “GAISMĀ. punkts” simboliski savīnoj kai fotografejis, tai cylvāka gaismjiuteigū dobu, kurā sevkurs gaismys punkts spiej puormeit apleicejuo pasauļa uztveri i tuo attāluojumu.

Juoņs Gleizds (07.05.1924.–17.04.2010.), kurs dzims niulejā Rēzeknis nūvoda Iļžukolna pogostā, ir nūpalnim boguots, pasaulī atzeits foto muokslinīks, Storptautyskuos foto muokslys federacejis gūda titula “ekselence” (EFIAP) sajiemiejs i Treju Zvaigžņu ordiņa kavalers. J. Gleizda nūpalni mierejami ar vaira nakai 600 diplomu i 170 medaļu nu vysu kontinentu, t.sk. Antarktidys. Muokslinīks pīsadalejs vaira nakai 800 izstuodēs i sajiems naskaitamys pasauļa leimiņa bolvys, nominacejis i gūdolgys, kas napazeist laika i vaļstu rūbežus.  

Foto muokslinīks dorbuojīs rešajā i sarežgeitajā izohelejis tehnikā, kai ari kotru dorbu muokslinīcyskai puorveiduoja ar retušiešonu – skruopiejumu, punktuojumu i gleznuojumu paleidzeibu, kas ir sarežgeits i dorbītiļpeigs process. Vysapyrma sovu vizeju izskicejūt iz papeira i tik piec tam tū realizejūt fotografejā, piecapstruodē J. Gleizds uzjimtuos fotografejis padareja par eistynim muokslys dorbim. J. Gleizda grybys spāku i talantu nūteikti pastyprynoj fakts, ka 24 godu vacumā nagadejuma rezultatā muokslinīks pagaisynuoja plauksts, tok tys nav bejs škierslis pylnveiduotīs muokslys jūmā i pīsavērst malnboltajai fotografejai, rodūt rysynuojumus na viņ fiziskim, bet ari rodūšim īrūbežuojumim. Foto muokslā J. Gleizdam vīna nu golvonūs temu vysod ir bejuse sīvītis skaistums. Īmyužynojūt sīvītis kermini, muokslinīks ari teik skaiteits par vīnu nu akta žanra calmlaužu Latvejā.

Igors Pličs, kas ir sataisejs muokslinīka pīminis ustobu i ryupejās par J. Gleizda montuojumā pamastajim dorbim i prīškmatim, sacynoj: “Lai daudzi myusu paaudzis foto muokslinīki nūsprauž sev mierki i izdora vysmoz daļu nu tuo, kū Juoņs ir sovā dzeivē padarejs.” Sagaidūt foto muokslinīka J. Gleizda symtū godskuortu, Rēzeknis nūvoda pošvaļdeiba sadarbeibā ar Latgolys fotografu bīdreibu izsludynuoja foto konkursu malnboltajā fotografejā “Juoņa Gleizda bolva fotografejā 2024”. Dorbus īsyuteja 282 daleibnīki nu vysaidu Latvejis vītu. Dorbus varēja īsnēgt pīcūs dažaidūs žanrūs. Portreta žanrā īsnēdze 211 autors ar 437 dorbim, ainovā – 196 autori ar 394 dorbim, akta žanrā – 82 autori ar 146 dorbim, klusuos dobys žanrā – 81 autors ar 119 dorbim i sporta žanrā – 53 autori ar 71 dorbu.  Izstuodē koncertzālis pyrmuo stuova seminaru telpā varēs apsavērt 30 žurejis komisejis vysaugšuok nūvārtātūs dorbus, nu kurūs vīns ir ari Grand Prix aba “Juoņa Gleizda bolvys fotografejā 2024” gūdolgys sajiemiejs. Foto konkursa nūslāgums nūtiks 10. majā Latgolys viestnīceibā “Gors”.