Rokstu sagataveja: portals lakuga.lv

Par gūdu latgalīšu volūdys latiņu drukys aizlīguma atceļšonys godadīnai, kai ari sagaidūt Latgolys kongresa dīnu, 26. aprelī 11.00 stuņdēs Latgalīšu kulturys bīdreiba (LKB) sadarbeibā ar Latvejis Nacionalū biblioteku (LNB) reikoj diskuseju “Latgalīšu volūda medejūs”, informej projekta vadeituoja Ilga Šuplinska. Kluotīnē pīsadaleit aicynuoti medeju politikys veiduotuoji i medeju puorstuovi, bet tīšsaistē Latgolys kongresa sātyslopā diskusejai varēs sekuot i sovu vaicuojumu aizdūt sevkurs interesents.

23. aprelī 1904. godā tyka panuokts, ka atceļ latiņu drukys aizlīgumu Vitebskys guberņā, kur tūlaik beja Latgola. 26.–27. aprelī 1917. godā Rēzeknē nūtyka Latgolys kongress, kas pyrmū reizi aktualizēja ideju par sovys vaļsts izveiduošonu i pījēme lāmumu, ka Latgola ir gotova apsavīnuot ar Vydzemi i Kūrzemi, veidojūt Latvejis vaļsti.

Diskusejis pamatideja – atkuortuoti izgleituot par latgalīšu volūdys statusa i funkcionalitatis vaicuojumim, analizēt medeju pīduovuojumu i vareibu Latgolā, jemūt vārā kai sarežgeitū geopolitiskū situaceju, tai aktualuokūs pietejumu datus par sabīdreibys nūtureibu, medeju patiereņu, volūdys izvieli i diskutēt par īrūbežuojumim, kas vys vēļ naļaun latgalīšu volūdai skanēt ziņu raidejumūs kasdīnā, kai ari par īspiejom juos izmontuojumam, rysynojūt medejtelpys puormaiņu i sabīdreibys salīdiešonys pasuokumus Latgolā.

Diskusejā pīsadaleis: Latgolys kongresa lāmumu izpiļdis padūmis prīšksādātuojs Agris Bitāns, SEPLP prīšksādātuojs Jānis Siksnis, LTV golvonuo redaktore Sigita Ruoke (Roķe), Latgolys regionaluos televizejis žurnaliste Ausma Sprukte-Kozule, LNB Digitaluos atteisteibys departamenta direktore Karīna Bandere, radejis i TV raidejumu vadeituojs i veiduotuojs Arņs Slobožanins i režisors Viesturs Kairišs. Taipoš diskusejā ir aicynuoti daleitīs ar sovu pīredzi eksperti, kas darbojās ar latgalistikys, t. sk., ari medeju vaicuojumim: Enciklopedija.lv golvonais redaktors Valters Ščerbinskis, LNB bibliotekys ratumu zynuotuoja Ināra Klekere, i bīdreibys “Valodu māja” vadeituojs, norvegu volūdys tulkuotuojs i pedagogs Snorre Karkonens-Svensons. Diskuseju vadeis žurnalists Ansis Bogustovs.

Pasuokumam kluotīnē var dasaceit da 24. apreļa ITE.