Rokstu sagataveja: portals lakuga.lv

Da 9. maja Kruoslovys nūvoda muzejā apsaverama muokslinīka Valentina Zlidņa 85. jubilejai veļteita pīminis izstuode, viestej publiski daīmamuo informaceja. Ari kasdīnā Kruoslovys piļs kompleksa Omotu sātā var īpasazeit ar muokslinīka dzeivi i dailradi, jo tī īkuortuota jam veļteita ekspoziceja – gleznuotuoja darbneica.

Valentins Zlidnis (1939-2010) beja na tik muokslinīks, bet ari sliepuošonys treners. Jis dzims Rēzeknis nūvoda Bieržgaļa pogosta Meirānūs, vuicejīs Bieržgaļa vydsškolā i Latvejis Vaļsts Fiziskuos kulturys institutā. Piec tuo absolviešonys dzeivi saistejs ar Kruoslovu – 25 godus nūstruoduojs Kruoslovys Bārnu i jaunīšu sporta školā.

Gleznuot Zlidnis suocs jau školys laikā, pyrmuo juo akvareļu izstuode nūtykuse jau Fiziskuos kulturys institutā studeju gostūs. Piečuok jam bejušys personalizstuodis Kruoslovā, Rēzeknē, Ludzā, Daugovpilī i Dagdā. Zlidņa dorbi atrūnami na tik Kruoslovys nūvoda muzeja kruojumā, bet ari Daugovpiļs Nūvodpietnīceibys i muokslys muzejā, Latgolys Kulturviesturis muzejā Rēzeknē, kai ari privatkolekcejuos Latvejā, Kanadā, Rumanejā, Vuocejā, Australejā, Pūlejā i cytur.

2019. godā Kruoslovys nūvoda muzejā tyka atkluota jauna ekspoziceja “Gleznuotuoja Valentina Zlidņa darbneica”. Kruoslovys piļs kompleksa Omotu sātys mansarda daļā jis eistyn nazkod ir dzeivuojs i rodūši dorbuojīs. Ekspoziceja īkuortuota, piec vareibys saglobojūt muokslinīka poša veideotu darbneicys interjeru, paruodūt juo goreigū byuteibu i rodūšū pasauli. Ekspozicejis koncepcejis autore ir Marta Folkmane, bet tū realizēja juos vacuoki – Mairita i Ivo Folkmani.