Rokstu sagataveja: Laura Spundere, portals lakuga.lv

Grupa “Dabasu Durovys” klauseituojim pīduovoj sovu sastū studejis albumu “Dīnys i nadīnys” i aicynoj iz koncertu Daugovpiļs kulturys pilī 17. majā. Itūreiz albums izdūts tik digitalā formatā i byus daīmams straumiešonys vītnēs. Kai pīzeist “Dabasu Durovu” liders Arņs Slobožanins, izdūt albumus fiziskā formatā eisti vaira nav pamata.

Grupa “Dabasu Durovys” pastuov nu 2006. gods i jau izdavuse pīcus studejis albumus: “Lepetnīks” (2008), “Styklu vītā skaņa” (2012), “Bāka” (2014), “Pādys runoj” (2016), “Perimetrs” (2020). Niulejā grupys sastuovā ir solists Arņs Slobožanins, Valdis Rundzāns (bass), Aleksandrs Tamans (bungys), Vladimirs Šuvalovs (tausteni), Māris Veliks (gitara). Tok vysod ar grupu ir bejs i ari itūreiz vairuokūs īrokstūs pīsadalejs Romāns Sladzis, kurs ir ari ituo albuma dzīšmu parteju leidzautors, taipoš ari Mārcis Lipskis ir īrakstejs vairuokys basa partejis. Albuma izveidē pīsadalejuši ari gostu muokslinīki, kai Artis Boriss, pyušamūs instrumentu ansamblis “Daugavpils Brass” i cyti.

Kai stuosta grupys solists Arņs Slobožanins, jaunajā albumā “Dīnys i nadīnys” ir desmit dzīsmis, nu kurūs ostonis pyrma tuo nav dzierdātys. Devenis nu desmit dzīšmu ir latgaliski, tikai vīna – latvīšu literarajā volūdā. “Kotrai dzīsmei ir sovs stuosts, ari pats albums ir konceptuals i veiduots kai stuosts,” stuosta Arņs. Jis ari darunoj, ka dzīsmis topušys vysaiduokuos pasauļa moluos i vysaiduoku emoceju, pīdzeivuojumu i nūtykumu īspaidā. Pīmāram, dzīsme “Cyta saule” ir īsuokta raksteit 2018. godā, atsarūnūt Baļtejis jiurā storp Reigu i Stokholmu, i pabeigta raksteit tik 2022. godā. Tok, pīmāram, dzīsme “Par daudz” topuse kūpmītnēs, kod Arņs vuicejuos Čehejā. Dažys nu dzīšmu ir radeitys Arņa dzeivūklī. Sovpus nūslādzūšuo albuma dzīsme, kas tik naseņ ir pabeigta, saucās “Pavasars”, tamā ir teksts: “Kotram ir sova taisneiba, bet patīseiba ir tik vīna, i jei kai eilyns nu maisa vysus mazglus raisa.” Arņs ari darunoj, ka jis grybātu izceļt vīnu dzīsmi, kas ir ar nūsaukumu “Karuseli”, kas īraksteita sadarbeibā ar Lauru Bicāni. “Kas ir drusku naparosti – mes itai dzīsmei sataisejom videoklipu ar muoksleigū intelektu.”

Arņs Slobožanins stuosta, ka jaunuo albuma “Dīnys i nadīnys” filozofeja ir baļsteita iz pretstatim – malns pret boltu, realitate pret atspaitu. Ilgi asūt dūmuots par albuma nūformiejumu, ari itūreiz, tū paleidzēja taiseit Aivars Bulis, kurs da šam ir veiduojs vairuoku cytu “Dabasu Durovu” albumu nūformiejumus. “Itūreiz ari vizuali gribieju paraudzeit attāluot cylvāka publiskū dobu, kaids jis grib byut, gon ari tū, kas atsarūn cylvāka privatajā dzeivē, kuru jis varbyut grib nūslēpt, i albuma vuoceņš tū labi simbolizej,” stuosta Arņs Slobožanins.