Rokstu sagataveja: portals lakuga.lv

Kulturys īsacejumus itai nedeļai sagatavejuse literate, pietneica i sabīdryskuo darbineica Ilze Sperga. Jei soka: “Pavasars ir rasāda siešonys i stateišonys laiks. Kab vosorā byutu loba tomatu, baklažanu i garbuzu raža, stuodi nadreikst izsteidzēt i jim vajag lobys saknis. Cylvākam ari vajag lobys saknis, kab jis varātu dzeivē realizēt sovus sapynus i sasnīgt mierķus. Laiks iz zemis nav gars, bet pošrealizaceja ļaun saceit – jai voi jam ir izadavuse dzeive. Iz prīšku!”

Satikt sovejūs

Kūpā ar saimi voi draugim nedeļgolā izstaigoj kaidu dobys stygu voi vīnkuorši aizej iz mežu. Kotram ir kaids “koč kod obligati sasatiksim” cylvāks. Aizroksti jam taišni šudiņ i pīduovoj: ejam sastdiņ pi dobys, cepsim buļbis i dasys!

Kūpā ar sovim voi rodu bārnim apsaver dzymtys vacuos fotografejis i izstuosti jim par sovim dzedim i babom: kai jūs sauce, kur dzeivuoja, kaidys jim beja īpatneibys, kur beja jūs spāks i sovpateiba. Ka, verūtīs albumu, atguodoj, kas tī par cylvākim karteņuos, jau šudiņ ūtrā pusē ar zeimuli pīroksti jūs vuordus. Ka naatguodoj, bet zyni kaidu dzymtys cylvāku, kas tū zyna, aizbrauc gostūs, aizved peirāgus, izdzerit kopejis i sarokstit, kū varit atguoduot.

Gols golā – pīzvoni sovam tāvam ar muoti, dzedam ar babu, ka ir kam zvaneit. Parunojit par laika apstuoklim, partū ka itūgod moz saulis. Varbyut jim vajag koč kuo, a varbyut koč kuo vajag tev.

Vēļ šūnedeļ salosi 12 pārnejuo goda biļdis i izdrukoj, īlepej albumā i apakšā pīroksti, kas tī nūteik. Tys byus tovys dzeivis albums.

Div koncerti

Ka dzeivoj Reigā voi gribi aizbraukt cīmā, Tev ir jau vasala pasuokumu programa VEF kulturys pilī. Runoj, ka piec remonta tī ir šmuki.

25. aprelī 19 stuņdēs ar draugim aizejit iz koncertu “Celīs, bruoļ!”. Koncertā skanēs kai Atmūdys laika himnys “Pīmiņ, Bruoļ!”, “Skaidra volūda”, tai myusu dīnu dzīsmis “Kalado”, “Screen”, “Pusnakts triādis”, “Tik lānai kai munys dūmys”, “Latgaleite”. Byus ari klasika – “Tuoli dzeivoj”, “Rūžeņa”, “Jezups” i cytys.

Vēļ šūnedeļ sovejim voi rodu bārnim nūpierc biletis iz bārnu i saimu grupys “Rupuči” koncertu “Runoj, dzīd i blieņojās…” tīpat VEF kulturys pilī  6. majā. Koncertā ak jau skanēs taids superhits kai “Div mozi eži”. Kab labi sasagataveit leidza dzīduošonai, šūnedeļ nūsaklausi digitalū muzykys albumu bārnim “Vuškeņa iz pļovys”.

Vajag spīstīs pi kulturys! Kas sovā volūdā dzīd, tys, skaiti, myužam dzeivuos. Partū ka dzīsme ir eisuokais ceļš i pi Dīva, i cylvāku.

Ej Bolsu tolkā!

Cikom solts, pajem teleponu i datoru lobai dzelai. Īrunoj šudiņ sovus pīcus teikumus Bolsu tolkā. Ka labi lūbās, īrunoj šudiņ i reit. Pats zyni – latgalīšim tolka svāta līta, i buļbem i runkulim, i volūdai. Kū vīns mūceitu nedeļom, pulkā var ļusteigai par puors stuņžu.

Pasoki sovim klasisbīdrim i sābrim, kai smejīs, jiusu pusē tok skaņ tei eistuo latgalīšu volūda! Pīruodit tuo vysim! Īrunuot vajag sovā izlūksnē, lai skaņ dzeivuo i skaidruo Tovys pusis runa, bet 1:1 pīsaturūt pi raksteituo teksta – taišni kai bazneicys gruomotā. Redzi pats, kai pagaist atminis par vacom karteņom albumā. Laiku reizem var, a reizem vairs i navar nūgiut aiz astis. A tī tok beja Tovi senči, kas runuoja sovā mēlē.

Ļauņ sovai i seņču volūdai palikt i dzeivuot digitalajā vidē, kab ka ni ar unukim, to prasu voi soltaunīku varātu apsarunuot sovā mēlē. Bet aizejit ari iz tū “Rupuču” koncertu 6. majā, tod varbyut latgaliski runuos i prass, i unuki.

Lai Tovā duorzā, saimē i sirdī labi aug tys, kū īsiesi itymā pavasarī!