Rokstu sagataveja: portals lakuga.lv

Nu 5. da 8. juņa Daugovpilī nūtiks “Teatra festivals Nr.3”, kurs kolpoj kai platforma, kur sasatikt – festivala organizātuojim, īsaisteitajim muokslinīkim i festivala izruožu apmaklātuojim, informej Daugovpiļs teatra puorstuove Janīna Ivanova. Festivala programu veiduos izruodis, kas izaceļ i ar naīrostu formu, i šudiņdīnys cylvākam aktualu i vajadzeigu saturu, kai ari sarunys ar skateituojim i profesionaļu sasatikšonys. Vīnā nu izruožu – “Dirty Deal teatro” pīduovuotajā “Montuojumā” – skaņ ari latgalīšu volūda.

“Teatra festivals Nr.3” tūp, sasadorbojūt “Dirty Deal Teatro”, Gertrudis īlys teatram, Latvejis Leļu teatram i Daugovpiļs teatram. Festivala veiduotuojus vīnoj puorlīceiba, ka laikā, kod sabīdreibu škeļ kai ekonomiski, tai politiski satrycynuojumi, teatris ir eistuo vīta, kur sasatikt cytam ar cytu, īsaklauseit daudzbaļseibā i kūpā izatāluot lobuoku byušonu iz prīšku.  

Festivala fokusā ir puormejis – kai īškejuos, tai uorejuos. Simbolisks ir ari ituo gods festivala sauklis – “Latgola ir tyvai”, kurs aicynoj veicynuot puormejis ituo regiona uztverē. Itys sauklis atguodynoj na viņ festivala gostim, tok ari Latgolys dzeivuotuojim par tū, ka Latgola nav kaida naaizsnādzama i nasasnādzama vīta Latvejis voi Eiropys kontekstā. Tei ir tyvai, tepat, “vīna spuorna viezīņa attuolumā” aba rūkys stīpīņa attuolumā, ir tik juogrib sasadūt rūkuos.

Festivals tiks atkluots Daugovpiļs teatrī 5. junī 19.00 stuņdēs ar Gertrudis īlys teatra izruodi “Rogona” (“Ragana”) (rež. Andrejs Jarovojs), kurā skaņ Aspazejis dzeja puļsiejūša hiphopa bīta pavadeibā. Izruodis rodūšuo komanda, sekojūt Aspazejis volūdys kruošņajam rokstam, ar bolsa i ritma spēlem izgaismoj “Rogonys” stuostā globuotū pavedīni par sīvītis pīredzi, pīpyldūt sovys ilgys i sapynus.

6. junī “Dirty Deal Teatro” aicynoj skateituojus iz leidzdaleibys izruodi “Konference vysumā lobim cylvākim” (“Konference visumā labiem cilvēkiem”) (rež. V. Sīlis), kurā kotram apmaklātuojam byus vareiba īsajust kaida konferencis daleibnīka tālā. Itamā dīnā Daugovpiļs teatris nūspielēs psihologisku dramu “Mali bez nūteikumim” (“Meli bez noteikumiem”) (rež. O. Šapošnikovs) – izruodi par manipulacejom, malim i tūs sakom caur meilys treisstyura mikrokosma prizmu. Piec izruodis nūtiks diskuseja par malu, manipulaceju i dezinformacejis temom, kurā pīsadaleis ari Lelbritanejis viestnīks Latvejā Pols Bramels (Paul Brummel).

7. junī “Dirty Deal Teatro” daugovpilīšim pīduovoj nūsavērt sāgu par variešonu i navariešonu “Montuojums” (Miglājs AJV), kas viestej par naradzamū pyuru, kurū vysaidu nūtikšonu īspaidā nas kotrys nu myusu. Portala lakuga.lv sarunu ar izruodis veiduotuoju Annu Belkovsku var skaiteit ITE. Sovutīs Gertrudis īlys teatris nūspielēs kusteibu izruodi “tys ir vyss, kū mes varim” (“tas ir viss, ko mēs varam”) (rež. Andrejs Jarovojs), kura, bolstūtīs tehno i elektroniskuos klubu kulturys tradicejuos, aicynoj pīvērst viereibu solidaritatei i īkļaunūšai ciļvieceibai – tam, kuo mums tik cīši datryukst kasdīnys attīceibuos vīnam ar ūtru.

Festivalu nūslēgs Latvejis Leļu teatris ar izruodi biernenim nu 9 mienešu da 2 godu vacuma “Čuči, Spiļveņteņ!” (“Čuči, Spilventiņ!”) (rež. L. Šmukste), kurei nūtiks 8. junī. Itei izruode ir vareiba sajiutu leiminī īpasazeit ar teatra vidi, tū vārojūt, sadzieržūt, aptaustūt i izruopojūt iz teatra skotivis.

Piec kotrys izruodis skateituoji ir aicynuoti pīsadaleit sarunā ar izruodis taiseituojim i daleibnīkim, kab daleitūs īspaidūs par radzātū.

Sovutīs skotivis muokslys profesionalim paradzātys treis diskusejis, kuruos tiks apsprīsti aktualī vaicuojumi par sadarbeibys īspiejom ar pošvaļdeibom, par tū, kai skotivis muokslai kūpeigai veiduot ilgtermiņa planus, i par datikšonys vareibu veicynuošonu teatra muokslā.

Ar pylnu “Teatra festivala Nr.3” programu var īpasazeit Daugovpiļs teatra sātyslopā.

Bileti iz izruodem jau daīmami Daugovpiļs teatra kasē, “Biļešu paradīze” kasēs i škārsteiklā.