Rokstu sagataveja: portals lakuga.lv

Vactiļžys folklorys kūpa “Saime” izdavuse jaunu dzīšmu albumu “Kuo gon myusīm tryuks?” Albumā ir devenis dzīsmis, kas kūpā dzīduošonys godu laikā pošim ir tykušys par meiluokajom i tautā pīpraseituokajom.

Folklorys kūpys vadeituoja Solveta Logina stuosta, ka albuma nūsaukums aizgiuts nu pyrmuos dzīsmis vuordu. “Tī vuordi itymā dzeivis breidī raksturoj myus vyslobuok. Nu, kuo gon myusīm tryuks? Myusīm ir vuss – gon dzīsmes, gon gribiešona, gon variešona i nauda ari ir. Vuss, kuo vajaga, lai cylvāks labi justūs,” sovys sajiutys raksturoj Solveta. Jei ari pastuosta, ka folklorys kūpa “Saime” kūpā dzīd napylnus 17 godus, pa itū laiku daudz kas ir izdzīduots, i ir pasaruodejušys ari pošim sovys meiluokuos i tautā praseituos dzīsmis, tuos ari īkļautys albumā.
“Albumā ir īkļautys treis dzīsmis, kas jau beja īdzīduotys, tok nabeja publicātys, leluokū daļu īdzīduojom pārņ novembrī “Bigmaar’s Records” studejā Upītē. Kūpā albumā ir devenis dzīsmis,” stuosta Solveta. Itys albums ir daīmams viņ digitalā formatā, dzīsmis var nūsaklauseit Solvetys YouTube kanalā ITE.

Kai stuosta Solveta, albuma īraksteišona nabyut nabeja vīglys dorbs. Dažom dzīsmem beja vajadzeigi vairuoki pīguojīni, kab dabuotu lobu īroksta verseju. Jei ari pīzeist, ka da šam kūpa nabeja dzeivē bejuse “Bigmaar’s Records” studejā, piec karteņu asūt ruodejīs, ka telpa ploša, sovpus nūbraucūt, palyka skaidrys, ka telpa ir stypri mozuoka, puorjāmušys švuorbys, voi vysi dalinīki ar vysim instrumentim varēs satiļpt, tok gols golā vysim beja gona vītys i albums īraksteits.

Vactiļžys folklorys kūpa “Saime” ir dybynuota 2007. godā, kūpa dorbojās Vactiļžys pogosta sporta i kulturys centrā, tok patīseibā leluokais vairums kūpys dalinīku īt nu vītejuo cīmata – Krutovys, deļtam ari folklorys kūpys nūsaukums nav najaušs – vysus dalinīkus sovā vydā vīnoj dažaidi roduroksti. Folklorys kūpa dzīd vysaidys vītejuos i sova nūvoda latgalīšu tautysdzīsmis Zīmeļlatgolys izlūksnē.